［愛情純愛］由嗰一個Kiss開始，我地唔再係青梅竹馬: 79. 分手了⋯

「呼～」梁玥嘉從廁所行出嚟，沖咗個涼之後成個人都舒服晒

梁玥嘉閂上廳燈後瞬間急步行番自己學，閂上房門後，將書枱嘅枱燈開着，將睡房嘅大燈閂上，今晚真係得佢自己一個喺屋入面啦

「咦⋯？」梁玥嘉拎起放喺枱面嘅手機，啱啱急住去沖涼都冇留意到係邊個搵佢，宜家手機解鎖後先見到原來係宋千辰搵佢，梁玥嘉嘅臉上頓時掛上甜甜嘅微笑

「啱啱去咗沖涼，未瞓呀～只係冇睇到手機」梁玥嘉回覆宋千辰道

「仲以為你瞓咗」宋千辰好快就回覆梁玥嘉嘅message



喺另一邊廂，有一個人反覆地將梁玥嘉嘅IG story睇咗一次又一次⋯

「真係⋯好討厭⋯！」楊楠恩雙手緊緊地握住手機，一次又一次咁睇梁玥嘉嘅story，都已經唔知睇咗幾多次，「本來都覺得你個人唔錯，但識得過嘅朋友⋯但你同宋千辰太close啦⋯」

楊楠恩一開始同梁玥嘉做朋友嘅原因，就只係因為梁玥嘉同宋千辰好friend，所以先想同梁玥嘉「做朋友」，借佢同宋千辰嘅關係令自己同宋千辰都可以親近啲

「睇少咗佢兩個嘅關係添⋯」楊楠恩不忿地講道，心裏又默默地盤算着下一步計劃，「睇嚟唔可以咁簡單⋯對唔住啦玥嘉，邊個叫你喺宋千辰身邊，你會係我最大嘅阻礙⋯」

⋯



翌日朝早

「唔知穎容點呢⋯」梁玥嘉仲灘緊喺床上面賴緊床唔願起身，「唔知佢有冇事呢⋯」

梁玥嘉之所以咁擔心李穎容，係因為呢幾日都冇收到李穎容嘅message，平時李穎容有咩大小事都會同佢講，就算只係喺IG睇到啲po都會send比梁玥嘉，但呢幾日完全冇收到

打開IG會見到李穎容po咗嘢喺story，但都唔係啲咩特別嘢

而喺啱啱，梁玥嘉先睇完李穎容新po嘅story，見到李穎容出咗街



「佢會唔會同Joshua已經好番呢⋯」梁玥嘉自言自語一樣講道，「唉⋯有啲擔心佢⋯」

但梁玥嘉嘅注意力好快就落咗喺新嘅message上

宋千辰：起咗身未呀死懶鬼？

宋千辰：一唔一齊食嘢？

「嘻⋯」梁玥嘉頓時歡喜地笑起嚟，然後喺賴咗床一個鐘之後終於捨得起身去刷牙洗面，順便回覆道：「食！出去食嘅話要等我一陣」

同一時間，李穎容一個人行到電車站上咗一架剛停站嘅電車，扶住扶手上咗上層，行到一個雙人位，坐低喺窗邊嘅位置

電車緩緩向前駛着，微風輕輕吹着，李穎容一手托住腮，另一隻手將頭髮繞到耳背後，有點惘然嘅雙眼望住窗外嘅街道

電車緩緩地駛到下一個站，李穎容都冇點理會亦冇心情去理會電車停唔停落嚟，佢嘅雙眼冇焦點地望住外面



正當李穎容嘅雙眼快要放空嘅時候，有人拍咗佢一下

「喂，你喺度嘅？」

李穎容回頭望向佢後面嘅座位，見到張子萊坐咗喺佢身後嘅座位

「嗯，咁啱嘅。」李穎容無力地笑，佢嘅笑容只係強擠出嚟

「得你嘅？你條仔呢？」張子萊自然地問道

因為宜家係假期，李穎容呢啲有拖拍嘅人通常都會同男朋友一齊，所以見佢唔係同Joshua一齊便問道

「得我自己一個咋⋯」李穎容微微低頭苦笑，然後再次抬頭望向窗外



張子萊覺得今日嘅李穎容怪怪的，平日李穎容一定下下都窒住佢，今日竟然咁正常咁同自己對話

本來張子萊同李穎容一樣坐喺窗邊，但張子萊坐咗去走廊位，雙手搭喺前面嘅座位嘅椅背，佢望向李穎容，見到李穎容一直望住窗外面

「喂⋯」張子萊見到李穎容忽然提起手，用衫袖抹一抹臉頰嘅位置，張子萊伸手拍一拍李穎容

「咩呀⋯」李穎容嘅聲音都變得有啲沙啞，張子萊見唔妥，即刻就起身坐到前面嘅座位、李穎容嘅身旁

「你做咩呀？」張子萊問道，「唔開心？你唔搵你條仔呻？佢唔聽你呻？」

「唔係⋯」李穎容抽抽鼻子，雙眼嘅眼眶微微泛紅，然後苦笑道，「我同Joshua分咗手啦⋯」

張子萊冇出聲，只係靜靜地望住李穎容，腦海中諗緊點樣安慰佢先啱

「咁⋯佢同你講分手，咁咪算囉，搵過個囉⋯」張子萊講道，眼尾一直偷瞄李穎容呃表情變化






IG Link: https://www.instagram.com/nd_cotttocandy/?hl=zh-tw