「係我同佢講分手⋯」李穎容用衫袖抹眼淚,張子萊呃眉頭輕輕一皺,喺衫袋中拎咗包紙巾遞比佢

「咁你點解要喊?」張子萊問道,「既然係你同佢講分手。」

「唔捨得嘛⋯!唔開心嘛⋯!」李穎容用紙巾抹眼淚,用一個佢從來都唔會對住張子萊用嘅撒嬌般嘅語氣講道,「咁分咗手就係會唔開心㗎啦⋯!」

李穎容努力地忍着淚水同時,滔滔不絕地將自己嘅委屈講晒出嚟,而佢嘅「大冤家」就靜靜地坐喺佢旁邊,聽佢講出佢嘅委屈





「你今日帶住手繩嘅?」宋千辰留意到梁玥嘉嘅纖纖手腕上戴住咗一條手繩

「吓?哦⋯係呀⋯」梁玥嘉望一望手繩,即刻面紅耳熱心跳快起嚟,喺心中暗自高興:「佢留意到⋯!」

「你好熱咩?」宋千辰留意到梁玥嘉嘅臉頰紅彤彤的,「塊面紅卜卜⋯」

「有啲⋯」梁玥嘉雙手輕輕捧住臉頰,然後臉帶笑容,吐吐舌頭講道,「伸隻手出嚟。」

「做咩?」宋千辰疑惑地問道



「伸咗出嚟先!」梁玥嘉雙手插咗Hoodies嘅衫袋中,「唔會害你㗎!」

宋千辰半信半疑地將手伸出嚟,梁玥嘉笑了笑,然後從Hoodies嘅口袋中拎出佢琴晚整好嘅手繩,剛才已經喺口袋中解鬆咗條手繩,一拎出嚟,梁玥嘉就直接將手繩套到宋千辰嘅手腕上索緊

宋千辰稍微將雙眼瞪大,望一望套咗喺自己手上嘅手繩,然後抬頭望一望梁玥嘉,嘴角不禁上揚

「做咩突然送手繩比我?買㗎?」宋千辰臉上掛着爽朗嘅笑容

「咩買呀!我織㗎!」梁玥嘉微微鼓起兩泡腮,但好快又露出笑容,「靚唔靚呀?」



「Okay呀。」宋千辰嘅目光落喺梁玥嘉手上戴住嘅手繩,嘴角微微上揚,一手就捉住咗梁玥嘉戴着手繩着手,「款式咁一致嘅?想同我戴情侶裝?」

「咩、咩呀?」梁玥嘉有啲慌張咁將手抽回,「同款就一定係情侶裝㗎啦咩!兄弟裝、姊妹裝都得㗎!」

「哦~」宋千辰直勾勾地望住梁玥嘉,梁玥嘉怕心事被睇穿,於是移開視線,「兄弟裝呀?」

「嗯⋯!」梁玥嘉心虛地回答,「快啲食嘢啦,肚餓。」

宋千辰望住梁玥嘉臉頰淡紅嘅模樣,默默一笑



「呵~欠⋯」李穎容打咗一個大大嘅喊露,雙眼嘅紅腫仍未散去

「瞓到總站就起身啦?」張子萊講道



李穎容感覺到張子萊講嘢嗰陣,佢好似聽到有回音似的,感覺好近,佢抬頭一望,發現自己靠咗喺張子萊嘅博頭上,頓時坐好起嚟

「你⋯你做咩唔叫醒我⋯?」李穎容望向車窗外問道

「啱啱到站你就醒。」張子萊講道,「洗咩叫你。」

兩人落咗電車,沿路行着,張子萊冇講任何嘢,李穎容亦比平日安靜好多,兩人並肩而行,雖然彼此沉默,但大家都冇覺得尷尬

「喂⋯」李穎容率先打破沉默,張子萊眼尾瞄咗李穎容一眼,「你唔好同人講我同Joshua分咗手⋯」

「冇講嘅打算。」張子萊聳聳肩

兩人再一次回歸沉默,沿路一直走



李穎容忽然停低腳步,定睛望向前方,瞳孔微微顫動着;張子萊見李穎容停低,便跟住一齊停落嚟

「Joshua⋯」李穎容嘅雙眼再次濕潤起嚟,細聲地吐出一個人名

Joshua都見到李穎容,佢同李穎容對望着,但同時,佢亦留意到企喺李穎容身旁嘅張子萊

「咁快就搵到水泡啦⋯」Joshua輕輕一笑,眉頭一皺講道,「難怪同我講分手。」

「你講咩呀⋯」李穎容握緊拳,努力地令自己沉着氣,「我地都只係咁啱撞到⋯」

「你話我出軌,但睇嚟你都唔好得去邊⋯!」Joshua望向張子萊,張子萊嘅眉頭輕輕一皺

「Joshua,我從來都冇做過對唔住你嘅事,係你背叛我在先⋯」李穎容比剛才更用力握着拳頭

「李穎容,你冇咗我,你會後悔。」Joshua行到李穎容嘅面前,「你覺得你好高質咩?家境一般,又唔係名校生,冇咗我係你應該要覺得傷心嘅事。」



Joshua伸手輕輕地推咗李穎容一下,李穎容瞬間就向後行咗一步

「睇下你搵啲咩人,連搵個水泡都咁低quality,足以證明你係一個低Quality嘅人。」Joshua望向張子萊,將佢上下打量一番,輕蔑一笑

當Joshua想伸手再推李穎容一把時,張子萊伸手用力地將Joshua推開,Joshua頓時向後跌咗兩步




IG Link: https://www.instagram.com/nd_cotttocandy/?hl=zh-tw