［愛情純愛］由嗰一個Kiss開始，我地唔再係青梅竹馬: 83. 醋王出現？

梁玥嘉嘅身子微微向前傾，稍微湊近咗宋千辰，直盯着宋千辰望

「千辰？」梁玥嘉叫咗宋千辰一聲，但宋千辰因為太入神，完全都冇留意到梁玥嘉叫佢，梁玥嘉再開口，「千辰！」

梁玥嘉嘅聲量提高咗，宋千辰頓時回神過來，一望向聲音嘅來源就已經見到湊得好近、目不轉睛地望住佢嘅梁玥嘉

宋千辰下意識將上身向後傾迴避，梁玥嘉仍然定睛地望住宋千辰

「做咩⋯？」宋千辰抑壓着自己嘅緊張，平淡地問道，同時將手插入Hoodies嘅口袋中分散自己嘅專注力



「見你唔出聲嘛，咪睇下你做咩。」梁玥嘉微微一笑講道，「你唔舒服呀？」

梁玥嘉一隻手拉住宋千辰，另一隻手從Hoodies口袋中抽出嚟，放到宋千辰嘅額頭上，宋千辰整個人顫咗一下，怔了怔，定睛望住梁玥嘉

宋千辰嘅心臟比咗最強烈而又最秘密嘅反應，心臟跳動嘅強烈程度大概係強到可以感覺到成個人都跟住心跳突突跳動

「唔⋯冇唔舒服呀睇嚟⋯」梁玥嘉自言自語地道

望住眼前嘅女仔一副天然呆嘅模樣，宋千辰真係哭笑不得，都唔知梁玥嘉幾時係有心幾時係冇心⋯宋千辰嘅內心再一次出現「不如直接表白」嘅衝動，總覺得到咗下一秒，自己就真係會衝口而出講出心聲，為咗壓抑內心嘅衝動，宋千辰微微耷低頭，將視線從梁玥嘉嘅身上移開



「你做咩唔講嘢？」梁玥嘉帶着疑惑將手放低，微微側着頭望住宋千辰

「嘉嘉⋯」宋千辰忽然深呼吸，緩緩地抬眼望向梁玥嘉，梁玥嘉用微笑表達佢正專注地聽宋千辰講嘢

「咦⋯！」梁玥嘉一臉震驚，因為就喺啱啱，宋千辰彎下腰，額頭靠喺梁玥嘉嘅膊頭上

「頭有啲痛⋯」宋千辰細聲地講道，心中又道：「你咁遲鈍，我點會唔頭痛⋯」

「你⋯你有冇事呀⋯」梁玥嘉嘅聲線夾雜咗少許羞澀，臉頰隨即泛起紅霞



「冇⋯」宋千辰微微搖頭，然後悄悄地伸出手將梁玥嘉溫柔地攬到懷中，雙手喺佢嘅腰後交叉搭着

「你做咩呀⋯！」梁玥嘉有啲慌張地問道，宋千辰嘅舉動總可以殺佢一個措手不及

「你企得有啲遠⋯」宋千辰故意將聲線壓下，而且將聲量收細，令聽起嚟更加似唔舒服

「又聞到佢陣味⋯」梁玥嘉喺內心講道，臉上滿是羞澀，「搞到我好想攬住佢⋯」

宋千辰嘅心臟跳動得好快，佢總會用呢啲舉動去試梁玥嘉嘅反應，佢知梁玥嘉唔會推開佢，但佢比較想知道梁玥嘉唔推開佢嘅原因

「番去啦。」宋千辰抬起頭企番好，就好似咩都冇發生一樣對梁玥嘉講道

「你Okay？冇頭痛啦？」梁玥嘉因為擔心而輕皺起眉頭

「好番啲啦。」宋千辰不禁一笑



「你笑咩呀？」梁玥嘉見宋千辰笑起嚟時便問道

「冇咩⋯」宋千辰微笑着搖頭，佢就係中意見到梁玥嘉嘅緊張佢在乎佢，「番去啦。」

⋯

「嘟嘟嘟嘟、嘟嘟嘟嘟—」

梁玥嘉從床上爬起身，今日冇得賴床，因為今日要番學啦，聖誕假期已經結束

「呵～欠⋯」梁玥嘉打咗個喊露，伸手打開房門出房去洗面刷牙，然後番房換衫

今日同平時一樣，完全冇因為新一年嘅到來而改變咗啲咩，一出門口，依舊係見到宋千辰企喺佢屋企門口隔離等佢



「早晨。」宋千辰微笑講道

「早晨！」梁玥嘉高興地笑道，一大清早就可以見到宋千辰，對梁玥嘉嚟講係一大幸事

喺學校外面嘅時候遇到李子迪，梁玥嘉行喺中間，但佢主要係同李子迪講嘢，宋千辰都冇妒忌之類，直至李子迪做咗一個舉動⋯

「都話你真係好好人㗎啦梁玥嘉，不過我今次已經將啲功課全部都做完啦！」李子迪一臉自豪地講，好似想人讚佢做晒功課真係好叻一樣，然後李子迪伸手摸摸梁玥嘉嘅頭頂，當住宋千辰嘅面

「喂！整亂晒啦！」梁玥嘉一下子撥開李子迪嘅手，輕皺起眉頭講道，心中又道：「千辰會嬲！唔好令千辰誤會！」

梁玥嘉下意識望向宋千辰，宋千辰沉着氣睇手機，李子迪循住梁玥嘉嘅視線望去，佢都望一望宋千辰

「望佢做咩？」李子迪笑問道，「佢又唔係你條仔，你驚佢會嬲咩？」

「我係佢條仔嘅話你死硬。」宋千辰朝李子迪微笑講道，皮笑肉不笑嗰種笑



「但你都唔係。」李子迪將事實講出口，梁玥嘉生怕宋千辰真係會嬲，宋千辰嘅心都因為呢個事實而「咯蹬」一下




IG Link: https://www.instagram.com/nd_cotttocandy/?hl=zh-tw