［愛情純愛］由嗰一個Kiss開始，我地唔再係青梅竹馬: 84. 留堂獨處

「所以你咪仲企喺佢隔離。」宋千辰講道

梁玥嘉感覺到宋千辰就嚟要嬲，伸手捉一捉宋千辰嘅手

「咦⋯？」梁玥嘉捉住宋千辰手腕嘅手感覺到有嘢喺佢嘅冷衫衫袖入面，「呢個⋯」

宋千辰見梁玥嘉一臉訝異冇太大表示，而梁玥嘉則將宋千辰嘅衫袖向上推，見到佢嘅手腕上戴住咗佢送嘅手繩

梁玥嘉因訝異而一時語塞，佢抬頭望住宋千只可以用神情表達出佢嘅驚訝



宋千辰冇講任何說話解釋，只係默默地將衫袖拉番落嚟，蓋過手繩

一種甜絲絲嘅感覺喺梁玥嘉嘅內心蔓延開，望住宋千辰手上戴住嘅手繩，佢感覺到自己受重視，宋千辰將佢放喺重要嘅位置，所以先會一直戴住手繩

李子迪企留意着呢兩個人嘅一舉一動，梁玥嘉對宋千辰露出咗從來唔會對佢展露嘅笑容，佢知道呢個笑容同平時嘅笑容唔一樣，但呢種唔一樣難以言喻

「你做咩戴住佢番學嘅？」梁玥嘉難以抑壓心中嘅興奮問道

「冇除咪戴住咗⋯」宋千辰迴避着梁玥嘉嘅視線，嘴角悄悄地小幅度上揚



「咁大條手繩你都可以唔記得除嘅？」梁玥嘉嘅臉頰泛起淡淡嘅紅霞，臉上掛着嘅笑容甜絲絲的

此時有人從後拍一拍梁玥嘉嘅膊頭，梁玥嘉一回頭望，見到楊楠恩笑容滿臉咁同佢打呼呼

「玥嘉，早晨！」楊楠恩微笑着講道，喺梁玥嘉嘅眼中，楊楠恩嘅笑容同平日一樣溫柔好看

「早晨！」梁玥嘉微微一手，朝楊楠恩揮揮手

楊楠恩行到梁玥嘉嘅身旁，第一件事就係將宋千辰由上而下打量一番，佢感覺到佢同宋千辰嘅距離近咗，都要多謝梁玥嘉



⋯

「宋千辰，你份功課呢？」Miss望住手上嘅點名紙，「得你仲未交，冇做呀？」

「嗯，冇做。」宋千辰無奈地點一點頭

「咁大份功課都可以唔做嘅⋯死蠢⋯」梁玥嘉望向宋千辰，心裏無奈地講道，「睇下Miss今次點罰你⋯」

「死仔，咁大個人都可以唔做功課嘅？中六啦！生性啦！」Miss語重心長地講道，「罰你今日放學之後留喺課室同科長一齊幫手mark分。」

宋千辰毫不在意，但楊楠恩嘅內心就開心到飛起，因為佢就係Miss口中講嘅科長，佢聽到Miss咁講就當然開心，因為係好難得可以同宋千辰有嘅獨處時間

接住落嚟嘅時間，楊楠恩一直都期待着放學，想快啲可以放學留低同宋千辰獨處

放學嘅時候，楊楠恩第一時間就去Miss嘅簿櫃，拎咗Miss要佢做嘅嘢上番課室，上到課室嘅時候，見到課室只剩低小貓三四隻，梁玥嘉企喺宋千辰面前



「洗唔洗等埋你先番屋企？」梁玥嘉問宋千辰，楊楠恩豎起耳仔仔細聽佢地嘅對話

「我冇所謂，你想等咪等埋我先走。」宋千辰聳肩裝作唔在意，但內心當然想梁玥嘉等埋佢先走

「咁呀⋯咁我番屋企啦～」梁玥嘉點一點頭，然後轉身就邁步，帶着小跳步朝課室門口行

「喂！」宋千辰比梁玥嘉嘅反應激死，眉頭輕輕一皺

「得啦！我喺圖書館等你啦～你走得話我知。」梁玥嘉回頭對住宋千辰調皮一笑，比咗一個Okay手勢，然後就行咗出去

宋千辰沒好氣地笑，佢望向楊楠恩，見到楊楠恩捧住Miss交比佢嘅嘢行過嚟佢嘅座位，將疊簿放到宋千辰嘅枱上

楊楠恩將宋千辰前面座位嘅櫈拉開到一旁，然後將枱拍到宋千辰嘅枱前，佢坐喺宋千辰嘅對面



「將每一份功課嘅分寫喺呢張Name list度就得啦～」楊楠恩遞咗一張寫滿佢地班嘅人名嘅Name list遞比宋千辰，「你做A簿，我做B簿啦！」

宋千辰坐低開始做嘢，順手地將冷衫衫袖稍稍向上推，手腕上嘅手繩露咗出嚟，楊楠恩望到宋千辰手上嘅手繩，臉色一沉同時坐低喺宋千辰嘅對面

「你帶住手繩番學嘅？」楊楠恩擠出笑容，假裝好奇地問道，心中有啲疑惑：「但上次撞到佢兩個，見佢帶住手繩，已經係3日前嘅事⋯」

「冇除到落嚟。」宋千辰不以為意地講道，頭都冇抬一下，一直專注喺手上嘅Name List同功課分上

「你條手繩好靚，八卦一下，喺邊度買㗎？」楊楠恩嘅視線一直停留喺宋千辰嘅手繩上

「唔係買㗎，係嘉嘉送比我。」宋千辰抬起頭望一望手繩，然後望向楊楠恩笑咗一笑

楊楠恩怔了一怔，宋千辰嘅笑容並唔係因為佢，而係因為佢提起嘅手繩

「呢個笑容⋯根本唔係對我露出⋯！」楊楠恩內心更加覺得不忿，更加妒忌，「憑咩係梁玥嘉！」






IG Link: https://www.instagram.com/nd_cotttocandy/?hl=zh-tw