「吓⋯哦!」梁玥嘉回神過嚟,然後小跑着離開升降機,行到去宋千辰嘅身旁

兩人行出大堂,梁玥嘉抬頭望一望宋千辰,好快又耷低頭

「想食咩?」宋千辰一直行,「冇Idea嘅話,食唔食嗰間韓國嘢?你之前話想食嗰間⋯嘉嘉?」

梁玥嘉忽然拉住宋千辰嘅衣角,宋千辰感覺到自己被拉咗一下便回頭望,眼見梁玥嘉微微耷低頭,好似有嘢想要同佢講一樣

「嗯?做咩唔行?」宋千辰就好似明知故問一樣,明明見到梁玥嘉有啲嘢但都要問一句,「你唔肚餓咩?」



梁玥嘉死死地捉住宋千辰嘅衣角唔放,宋千辰唯有轉身企喺佢嘅面前

「你會等到我比回覆你⋯?」梁玥嘉問道

宋千辰對梁玥嘉突如其來嘅問題感到愕然,靜咗一靜

「係。」宋千辰回答道,語氣中一絲猶疑都冇,佢心底裏好清楚知道佢中意梁玥嘉呢一點,「會等到你比回覆。」

「幾耐都等?」梁玥嘉追問道,佢嘅心似乎總會喺某啲時候擔心起嚟



「係。」宋千辰語氣堅定地回答梁玥嘉

宋千辰認真嘅模樣,梁玥嘉都睇喺眼內,眼見宋千辰一臉認真,梁玥嘉嘅內心好似安心咗少少,嘴角不禁上揚

「咁我一直唔比答覆你,你係唔係一直等?」梁玥嘉開玩笑般問道

宋千辰靜咗一靜,腦海中都諗緊呢個問題嘅答案,佢一直都冇諗過呢一點

「唔⋯我冇諗過呢個問題。」宋千辰直接地直白回答梁玥嘉



「噗⋯」梁玥嘉笑咗出嚟,「你就咁有自信呀?」

「唔通你會唔比答覆我?」宋千辰見梁玥嘉笑,佢都笑咗一笑

「唔知㗎~」梁玥嘉笑着邁步走,轉一個圈,一蹦一跳地向前行,行咗兩步之後又停咗落嚟,回頭望向宋千辰,「千辰,行啦!我肚餓啦!」

宋千辰企喺原地無奈一笑,然後追上梁玥嘉嘅步伐

眼見梁玥嘉嘅笑臉,宋千辰嘅嘴角都不自覺地上揚起嚟

宋千辰望住梁玥嘉嘅背影,心裏諗起梁梁玥嘉啱啱問佢嘅嘢⋯

「咁我一直唔比答覆你,你係唔係一直等?」

「其實我從來都冇諗過呢個問題,因為我真係相信你一定會比一個答覆我。」宋千辰行到梁玥嘉嘅身旁,同梁玥嘉並肩而行同時心裏默默地道,「但如果真係有呢個如果⋯咁我都只可以認輸,知道係自己自作多情啦⋯」



「千辰!我地去嗰間度食呀!」梁玥嘉自然地伸手捉住宋千辰嘅前臂,另一隻手指住喺前面同佢相隔幾間鋪嘅食店,臉上掛首笑容望向宋千辰,「好唔好呀?」

「好好好,你話食咩就食咩啦~」宋千辰笑一笑,見到梁玥嘉一臉興奮,佢又點會忍心拒絕梁玥嘉?



「哎呀⋯你好煩呀張子萊⋯!」李穎容拎住手機大喊道,本來灘喺床上嘅佢一下子坐咗起身,「煩死啦!」

李穎容心情欠佳,只因為張子萊send過嚟嘅一個message⋯

張子萊:男人天生都中意睇靚嘢㗎啦~唔係睇咩啫

李穎容:咁你去睇靚女囉!



李穎容當然唔係淨係因為張子萊呢一句而嬲,仲加上今日喺學校嗰陣張子萊講嘅嗰一句:「睇你以外嘅都係靚女。」

「哎呀!」李穎容拎起放喺枱上嘅鏡,望住鏡中嘅自己怒氣沖沖咁講道,「我好醜樣咩宜家!張子萊你對眼生喺邊㗎!」

李穎容將鏡放低喺枱面,然後拎起手機望咗一眼,見到張子萊嘅回覆

張子萊:睇完啦!做緊功課

李穎容:你做功課?講笑呀?

張子萊:(反白眼)係呀我打算又欠咗佢㗎啦

「小學雞⋯」李穎容望住手機裏嘅訊息不禁失笑

李穎容:學期尾啦仲欠⋯乖乖地做下功課啦



最近李穎容同張子萊成日都私下傾計,應該話自從嗰次撞到Joshua,張子萊挺身而出後,兩人就開始成日私下傾計

張子萊:咁樣就到study leave

李穎容望到張子萊send出嚟嘅一句,心裏莫名其妙地覺得有啲失落

「點解個心會有啲唔開心⋯?」李穎容將手放喺胸口前,喃喃自語起嚟,「錯覺錯覺!一定係錯覺⋯!」




IG Link: https://www.instagram.com/nd_cotttoncandy/?hl=zh-tw