李穎容雙手拍拍自己嘅臉頰,打起精神

「就算我真係唔開心,都唔會係因為張子萊囉!」李穎容唔知係對邊個立flat,只見佢自信滿滿咁講

另一邊廂,宋千辰同梁玥嘉喺間小店食緊嘢

「你食咩呀?」梁玥嘉坐喺窗前嘅位置,回頭望向拎住餐番嚟嘅宋千辰

「牛肉飯。」宋千辰將飯盒放到梁玥嘉身旁嘅位置,然後先坐低



呢間小店內嘅堂食位置唔多,全部都係貼住窗嘅高枱,位置都幾鬆動

「哦~」梁玥嘉望住宋千辰盒飯點一點頭,然後拎起餐具,「我唔客氣啦~」

梁玥嘉打開飯盒嘅蓋,望到入面有佢唔中意嘅瓜同芽菜,諗都冇諗直接就將所有嘅瓜同芽菜夾晒去宋千辰嘅飯盒裏

宋千辰望住自己嘅飯面多咗一個小山丘,只好默默接受梁玥嘉嘅好意,其實佢都已經習慣咗要接收梁玥嘉唔中意食嘅飯菜

「我要夾走一塊牛肉啦~」梁玥嘉一邊講一邊將牛肉從宋千辰嘅飯盒裏夾走



「你根本完全就係單純咁知會我一聲你要夾牛肉⋯」宋千辰望住梁玥嘉無奈地笑道,「完全冇打算問我比唔比你夾⋯」

「一直都係咁㗎啦~」梁玥嘉望向宋千辰,臉上掛上天真可愛嘅笑容,「咁多年都唔習慣咩?」

「唔慣都要慣啦⋯!」宋千辰沒好氣地講道,拎起木筷子就食,一啖瓜、一啖菜、一啖飯

梁玥嘉望住宋千辰一臉無奈,宋千辰望住梁玥嘉笑嘻嘻嘅模樣

梁玥嘉享受宜家可以盡情撒嬌耍任性,對住其他男仔,佢唔會咁做,但對住宋千辰,好似⋯都係不自覺就會撒嬌,不自覺就會任性



「好彩千辰嘅青梅竹馬係我~」梁玥嘉嘅心裏驕傲地講道,每一啖飯食起嚟都特別好味

梁玥嘉不經意望向宋千辰打橫平放啖枱上嘅手,喺衫袖稍微被拉高嘅情況下見到宋千辰手腕上露出咗少少嘅手繩邊

梁玥嘉移開視線望向街外,嘴角微微上揚;宋千辰用眼尾嘅餘光偷偷地留意着梁玥嘉

「你做緊咩呀?」梁玥嘉見宋千辰拎咗手機出嚟便問道

見宋千辰po緊IG story,當梁玥嘉望過去嘅時候,宋千辰已經po完IG,梁玥嘉嘅手機亦喺呢個時候震咗一震

拎出嚟一睇,係IG嘅通知,原來啱啱宋千辰po嘅story中@咗佢

梁玥嘉嘅嘴角又不禁上揚,心裏有一份莫名其妙嘅甜意

「好似宣示主權咁⋯」梁玥嘉喺心裏諗道,明明就只係普通嘅一個IG story po,或者只係對佢兩個嚟講意義有啲唔同



宋千辰放低手機繼續食飯,梁玥嘉同宋千辰對望咗一眼,相視而笑



到咗星期六,宋千辰早就換好衫同坐喺梳化度等梁玥嘉

宋千辰:你行得未呀?

此時企喺門口著緊鞋嘅梁玥嘉感覺到手機一震,見到係宋千辰嘅message

「得啦著緊鞋啦!」梁玥嘉直接錄音比宋千辰

宋千辰聽完錄音之後行到玄關著鞋,開門出去



「仲以為要等到下世紀添~」宋千辰邊行邊講道

「咩呀!我都只係遲咗少少起身咋嘛!」梁玥嘉反駁道,「宜家我都唔係遲好多咋嘛!」

梁玥嘉前腳先啱啱踏入升降機,手機就震咗兩震

李穎容:你到邊呀?

「邊個?」宋千辰見梁玥嘉耷低頭睇手機便問道

「穎容問我到邊。」梁玥嘉講道

梁玥嘉:啱啱出門口

李穎容:吓,好啦,咁你快啲嚟



梁玥嘉望一望手機左上角嘅時間,明明仲有半個鐘先到本來約定嘅時間,但李穎容已經催緊佢快啲到

「邊個?」宋千辰見梁玥嘉咁專注咁睇手機便問道,同時瞄咗佢啲手機螢幕一眼

「穎容。」梁玥嘉講道,手繼續打字

梁玥嘉:得你一個到咗?

李穎容:仲有張子萊喺度囉

「穎容同張子萊到咗。」梁玥嘉望向宋千辰講道,「佢兩個又會咁快到咗嘅⋯」

喺自修室嘅李穎容同張子萊兩人你眼望我眼,一臉嫌棄地將對方上下打量一遍,然後反一下白眼,撇開臉






IG Link: https://www.instagram.com/nd_cotttoncandy/?hl=zh-tw