兩人一同去到上次嚟過嘅大型書店,宋千辰跟住梁玥嘉一齊行,梁玥嘉好似有目的一樣,朝住賣飾身嘅小檔行去

「唔⋯」梁玥嘉尋找着啲咩一樣,將放喺陳列枱上嘅飾物逐一睇清楚

「搵緊咩呀?」宋千辰行到去梁玥嘉嘅身旁

「我之前見到有隻手鐲好靚,我每次嚟都要睇一次㗎!」梁玥嘉悶悶不樂地扁起嘴,自然地提手捉住宋千辰嘅衫袖,「但宜家冇咗⋯!」

「哦⋯係咩~」宋千辰點點頭,「呢度真係冇咗咩?」



「係呀!呢間鋪頭嘅飾物係獨一無二㗎⋯得一隻⋯」梁玥嘉扁着嘴望向宋千辰

「可能比人買咗啫~」宋千辰微微一笑,手溫柔地摸摸梁玥嘉嘅頭安慰佢,心裏笑着道:「我果然冇買錯,我買嗰隻果然係佢中意嗰隻手鐲~」

「早知我之前一睇到就買咗佢先啦⋯!」梁玥嘉一臉悶悶不樂地講道

「好啦好啦~唔好再睇啲傷心嘢啦~」宋千辰輕輕攬過梁玥嘉嘅肩帶佢走,「去睇下其他嘢啦~去唔去log-on呀?」

「好呀~」梁玥嘉頓時笑番,「我地去抽盲盒呀~」



梁玥嘉興高采烈地拉住宋千辰小跑起嚟

「喂喂,有必要跑咩?」宋千辰被梁玥嘉拉着跑起嚟同時問道

「有呀!」梁玥嘉回頭望一望宋千辰,嘻嘻一笑,「對住自己中意嘅嘢就要跑起嚟追逐呀~」

「咁⋯對我呢⋯?」宋千辰喺心中不禁問道,但佢問唔出口,「你又係唔係跑起嚟追逐我⋯?」

梁玥嘉拉住宋千辰嚟到log-on,直接就行到放盲盒嘅地方



「你睇~果然對住自己中意嘅嘢就要跑起嚟~」梁玥嘉沒頭沒腦地又講咗句

宋千辰靜咗落嚟,梁玥嘉拎起眼前嘅盲盒,臉頰忽然泛起淡淡紅霞,語氣夾雜咗少許羞澀地細聲講道:「因為唔係所有我中意嘅嘢都可以觸手可及⋯」

「嗯?你啱啱講咩?」宋千辰聽唔清楚梁玥嘉啱啱講咗啲咩

「冇!冇咩⋯」梁玥嘉頓時搖搖頭,然後指住盲盒,抬頭望向宋千辰,「今次抽邊款好呀?」

「冇咩所謂,你想要邊款呀?」宋千辰望住放喺陳列枱上嘅各款盲盒,佢都唔知要邊款好

「上次抽咗豬豬,今次抽其他~」梁玥嘉笑了笑講道,「好唔好呀?」

「好呀~嘉嘉話抽邊款,就抽邊款!」宋千辰笑了笑講道,伸手摸一摸梁玥嘉嘅頭

「嘻嘻⋯」梁玥嘉乖巧地笑了笑,然後拎起一公仔盲盒,「咁今次抽呢個啦!」





「呀⋯點解你成日都抽到隱藏款㗎!」梁玥嘉鼓起兩泡腮,扁着嘴講道

「噗⋯你宜家手上拎住嗰個唔係隱藏款咩?」宋千辰不禁笑出聲

「都唔係我抽到⋯!」梁玥嘉抬起頭,扁着嘴望住宋千辰,「都冇親手抽到嘅喜悅!」

「下次再抽囉!下次一定會抽到。」宋千辰笑了笑

「你成日都咁lucky嘅⋯」梁玥嘉無奈地講道,「成日都抽到想要嘅⋯」

「啲隱藏款就唔係我想要嘅~只係咁好彩抽到啫~」宋千辰聳肩,然後望向梁玥嘉微微一笑,「而且,我最lucky嘅,唔係識到你咩?」



梁玥嘉嘅臉頓時就紅起嚟,心跳都加速起嚟,抬頭見到宋千辰臉上掛着溫柔嘅微笑,梁玥嘉不禁又耷低頭

「你⋯!你又撩我⋯!」梁玥嘉害羞地講道

「不過,我有比隱藏款公仔更想要嘅嘢。」宋千辰直勾勾地望住梁玥嘉,認真地講道

梁玥嘉紅着臉微微低頭,但又不禁抬眼望向宋千辰;宋千辰似乎冇再講啲咩嘅打算,默默地將雙手插喺袋中

兩人各自番到屋企後,梁玥嘉第一時間去咗沖涼,企喺花灑下洗滌一下因為考試而感到疲倦嘅心靈

梁玥嘉合上眼仰起頭洗頭,一合上眼,宋千辰對佢講嘅嘢就自動地浮出嚟

「比隱藏款公仔,更想要嘅嘢⋯」梁玥嘉細細聲地講道,臉頰上嘅紅霞都已經分唔清係因為沖熱水涼定因為害羞嘅感覺,「識到你,我都好lucky呀⋯」

宋千辰總係可以面不改容講出令梁玥嘉心動得面紅耳熱嘅嘢,梁玥嘉都唔識面對,每次都覺得啲鹿要衝出嚟一樣



「心跳得好快⋯」梁玥嘉嘅手放喺胸口前,感受着心跳嘅速度,每一下強而有力嘅跳動都令佢知道自己有幾中意宋千辰

「嘉嘉!」

梁玥嘉腦海中浮現出宋千辰叫佢嘅畫面,唔知由幾時開始,佢就特別中意聽到宋千辰叫佢「嘉嘉」,親切而且總會有種心甜嘅感覺




IG Link: https://www.instagram.com/nd_cotttoncandy/?hl=zh-tw