「咁多位甲組足球隊嘅同學留意!嚟緊每個禮拜一、三、五我哋都會有訓練。」

「今日會有第一次嘅訓練,請所有同學準時出席。」

「喂,豪仔!聽講今年甲組啲對手都幾強喎,放學之後一唔一齊練波?」

「好啊!等陣紅場見!」

「咁多位同學,過多一個月就有一場學界比賽,今次嘅對手非常強,係上屆葵青區學界聯賽嘅亞軍——善德英中。」





「我哋學校以前嘅戰績一向都唔差,但近呢幾年成績就有所回落。」

「聽乙組嘅譚sir講,你哋呢屆幾有潛質。」

「有冇信心同我爭個聯賽冠軍返嚟?」

「有。」

「大聲啲!聽唔到!」





「有!!!」

「就係要咁樣,嚟緊你哋一直都要keep住呢個狀態,清唔清楚?」

「清楚!!!」

「Very good!我就係要呢啲!」

呢個就係陳sir,我嘅足球甲組主教練兼數學科
老師兼體育科老師。





所以啲人問我,「你嘅數學係咪體育老師教㗎?」

我都會好肯定咁答佢「係!」,咁真係呀嘛!

其實佢都好忙㗎,不過教隊波嘅時候又真係有心有力嘅。相比起乙組嘅譚sir,佢嘅執教能力真係高幾班。

「而家全部同學出嚟訓練,表現最好嘅可以揀波衫先。」

「唔使諗,我一定要拎20號波衫!」我心裏面同自己講。

其實啲訓練都唔算好難,都係好似以前練基本功咁樣,控下波,扭個人就已經過關。

話晒我都跟咗老竇係街場踢咗幾年波,呢少少野根本難我唔到。





「袁傑豪同我出一出嚟,你揀波衫先。」

「係嘅,陳sir!」

「睇都唔使睇,直接拎起20號波衫,然後就着上身。」

「呢個感覺真係好正啊!我感受到自己已經變咗雲佩斯啦!」我喺腦海入面FF緊。

「喂!喂!喂!」

「袁傑豪,你發乜鬼夢啊!開波啦」,教練大大聲咁喝我。

「係!係!係!而家落場。」

「真係頂你唔順,喺度烚吓烚吓!」
已有 0 人追稿