《波唔是咁踢的》: 4

「強仔好波！」我喺佢隔離講。

「邊有你咁好波呀，門前射飛機。」強仔串柒柒咁講。

「使唔使咁mean啊⋯⋯」

「咁你下次就咪早啲柒野啦！」

「係喎！一陣放學去唔去紅場練波？」我突然間醒起明仔今日約練波。





「踢一陣囉，晏少少約咗人食飯。」

「咦？約女仔食飯喎⋯⋯」

「係又點，唔係又點⋯⋯？」佢有啲唔耐煩。

「明嘅明嘅。」我回答。

有啲驚訝就連佢條毒撚都有人約，但我冇⋯⋯真係估佢唔到。





強仔係我以前嘅小學同學，都已經識咗成十年，因為成績差唔多，所以我地年年都喺B班見。

強仔比我細兩個月，但就生得牛高馬大，而且四肢發達，腳下力量好強，啲盆球基本功一流。

我地約好咗喺紅場等。

紅場係學校附近嘅硬地足球場，我哋成日放學之後都會去踢波。

「明仔、輝少有冇帶波啊？我今朝唔記得拎出門。」我對住球場門口方向大嗌，





「估到你啦！點會唔記得帶。」明仔回應我。

「咁埋位開波啦！」強仔大嗌。

「不如今次試下tiki-taka呢？」我對住強仔講。

「冇問題。」強仔答。

註：tiki-taka係著名足球豪門巴塞隆拿嘅足球戰術，特點係短距離傳送和頻繁跑動，以制造出順暢嘅進攻，亦都有效防止對方搶奪足球。

一開波我地就一直互傳，明仔同輝少好似馬騮咁喺度搶個波。

「你mark實傑豪，我去中間搶個波。」明仔同輝少講。

「好！你去封佢位。」輝少回應道。





正當輝少以為我要傳波嘅時候，我突然黎個假傳，成功fake到輝少。

之後我大力將個波向前推，再用力衝過去門前， 然後一個割草式射波， 撞到左邊門柱彈入網。

「咪咁鬼蠢至得㗎！戰術講到咁大聲，聾嘅都聽到啦！」我高傲咁講。

「 咁串！嚟多球，我要射到你跪喺到！」輝少唔忿氣咁講。

「嚟咪嚟！驚到時係我射到你喊咋！」我把握機會叫囂。