#扮工時間表: 番外1：我的歲月靜好，你的身陷苦海

「家姐，我今日同朋友行街，完咗嚟搵你食飯。」
「可以呀！幾點？」
我沒有收到妹妹的回覆，卻收到了妹妹中學同學的電話。

「家姐，阿妹係咪冇覆過你？」
「係呀！做咩呀？你搵佢？」
「家姐呀……我估阿妹……俾人拉咗。」

我立刻打開電腦、看立場新聞的直播。
「早前警員就衝咗入時代廣場，開咗多發胡椒球槍……」





「你屋企咁好嘅，全家都黃喎，夫復何求呀！」
「係咩？哈哈！」

我有點尷尬，黃與不黃，生活也是一樣。細想一下，妹妹總會在大事情發生的日子夜歸；一有要事，爸媽想也沒想便會衝到街頭救「仔女」。不過，我和爸常常都會忘了樓下那間茶餐廳是「藍」的，我和我爸總會點樓下茶餐廳外賣。妹妹和媽媽總會重覆提醒我們到數個街口後的「黃店」，但是那間「黃店」真的很遠。
有時候會想著一家四口出一個「黃絲」也不容易，我家四人也是「黃」，少我一個人也不多。所以，我還是會忘了樓下那間茶餐廳是「藍」的。

「喂～你有冇見到罷工？如果我哋罷工……」
「吓，你諗住罷工呀？唔係呀嘛？」
這個intern朋友也挺有趣，香港人又怎會罷工呢？




「咁……問下姐。」
他也沒什麼智慧，有風骨和本事就別報紅色資本公司的intern，還是一間只有allowance的公司……
「一，中資。二，你罷咗要補鐘。三，補唔到鐘就扣allowance。」
「唉……扣allowance……」
很好，他打消這個念頭。

早上上班時間搭巴士簡直是折磨，但搭港鐵也沒有很舒服。幸好，我家是頭站，只要多等一班車就一定有位置坐。
「喂～你會唔會想返耐啲，返到8月？我哋都需要intern幫手跟project。」
我看了supervisor手上的資料，project是intern朋友一直幫忙，我沒有太多參與。
「可以呀！我都想幫手呀！」




希望這次不是allowance。
「好呀！因為阿晴唔會繼續幫手，所以呢排你多啲問阿晴，pick up多啲。」

看著阿晴又進入夢鄉裡，我也想小睡一回。問著無聊問題、上班睡幾個小時又一天，生活也是寫意。他好像聽到我的心聲一般，點了幾下頭，瞇成一線的眼睛看著我。

「行啦！阿晴」
「好肚餓……」
「去食嘢啦！上環有間車仔麵好好食！」
「有嘢做呀！你地食啦！」
「去邊呀？約左人呀？哦……約咗男朋友呀？」
「呃……都係咁囉」
「去邊啫？」
「過金鐘呀。」
「haha好啦，bye～聽日見。」





阿晴還在收拾，我和另一個intern先走了。他在隔壁部門，與阿晴是同系同學，因為阿晴而認識了他。
「你上次有冇見到接阿晴放工嗰個人？」
「冇呀！好靚仔㗎？」阿晴水汪汪的眼睛很可愛，他男朋友也不差吧？
「唔知喎。依家戴住口罩邊睇到架！不過都係孭住嗰啲飾物，咩連豬嗰啲囉。」
「阿晴咁黃，唔黃就飛咗條仔啦！」阿晴曾經問過「穿黑衣」、「罷工」，大概與妹妹差不多吧。
「都係！我哋呢個Faculty咁黃都少見，阿晴都好前㗎啦。」

「家姐，你可唔可以行遠幾步？唔好再食呢間藍店。」
「放工返嚟攰呀嘛，唔想行。」
「你明唔明有啲嘢而家唔做、而家唔講，之後就冇機會㗎啦！」
我沒有回應，以免影響大家關係。
我只是不小心選錯了。
妹妹揉了眼睛，眼睛通紅。
「而家拎住社工證幫人都要判刑，咁我第日出嚟做嘢，係咪都會俾人拉？」
他回了自己房間。





「家姐！家姐！你ok嗎？」
「係，sor！」
「家姐，我哋成班frd喺ig同tg認緊人㗎啦！你可唔可以幫手清屋？佢應該係有袋嘢，成袋唔要就可以㗎啦！」
「嗯，好呀。唔該晒你哋。」

腦袋空白一片。

「我哋成班frd喺ig同tg認緊人㗎啦！」
滑開手機，打開instagram、telegram。
instagram彈出一項notification。
「可唔可以幫手report阿晴ig？」

又再接聽了幾個電話。
「老豆！我哋要過北角警署。」




出門時，提著兩個紙袋。推開垃圾的門，把其中一袋扔了。

「喂～呢度做錯咗喎！幫幫手改返啱佢呀！lunchtime後俾我。」
「唔好意思，我改返呀。麻煩晒。」

whatsapp彈出一項notification。

「出唔出嚟飲嘢？」

看著朋友在哭，我呷了一口酒。
酒精有點嗆口，眼框也滲出一點淚。

我的歲月靜好是由你身陷苦海換來的。