我要逃出無人島沙洲！: 第一章 沙洲的街渡

第一章:
今日係暑假第一日，見考完試，就約咗班friend出海玩，去香港西北部嘅沙洲玩下。呢個島仔雖然唔大，不過又幾多嘢睇，等陣再介紹下。

電話響起，係米通揾我。「喂，阿文你到未，船夫話10點要起程。」
「嗯，我落左車行緊，5分鐘啦，而家先9點半，唔使咁急呀。」我回應。
「哦咁好啦，拜拜！」米通就咁收左線。

出發嘅集合地點係屯門碼頭附近嘅岸仔，Tany見到我之後即刻揮手示意。
我:「你地咁早到呀，福仔呢？」
米通:「頭先call咗佢，話就到喎。」




學霸:「我冇帶乾糧，去一去士多買先。」此時，福仔咩住個大背囊行左過嚟，面帶一個好威水嘅表情。
福仔:「唔使買啦，我帶左個百寶袋喎，蝦條、軟糖、魷魚絲樣樣齊！」

我們邊傾計邊喺海濱踱步，話咁快就10點正喇。船夫坐上咗艇仔，叫我地上船起步。
船夫:「係咪齊人5個。」
Tany:「冇錯，係咪開得船？」
船夫:「可以，預十幾廿分鐘到。」

就咁，我地就開始左[沙洲之旅]。喺船上，福仔已經食緊帶嚟嘅瓜子，學霸就同Tany講緊籃球野，而我同米通仲用iPhone打緊食雞雙排。





我:「咦，連接失敗？點解會咁！」學霸見到我疑感嘅樣，笑咗出嚟。
學霸:「沙洲呢d偏遠地區點會有網絡？」
我:「你又唔早講呢度收唔到？跌Level喇，車！」
米通:「夠我慘？我個皇冠段位冇咗呀！」
Tany:「好心出嚟玩就咪打機啦！到咗沙洲喇，仲唔快d行？」

喺一片歡笑嘅吵鬧下，已經到咗目的地。我地每人夾120蚊交船費，船夫臨走前，提左一句:「陣間2點準時接番你地，回程嗰300蚊啱啱已經比埋，一共600收左。」