我要逃出無人島沙洲！: 第二章 連島沙洲

(今章同下章係講玩，當遊記睇lo@@)

第二章
由沙洲碼頭落船，眼前見到有左、中、右3條路。身為全级頭十嘅學霸即刻發言:「呢次旅程我做足功課架！左邊係地質公園嘅正路，中間就係行山，右邊呃…係冇野睇嘅爛路。咁我建議嘅行程就係先行左邊沙地，盡頭參觀埋天后宮之後，折返由中間行山返嚟呢度。」

我地啲凡人聽到咁有說服力嘅「高見」，緊係紛紛附和。說時慢，動時快，學霸一講完嘢就帶頭行左邊路。

福仔:「哇，望下呢舊石，幾似個大饅頭！」
Tany:「遠啲嗰舊係心形架！唔通係代表愛嘅石？」
米通:「邊有咁Q，唔通海面嗰舊似腳趾嘅石頭代表臭腳……」




我:「哈哈哈！代表你隻腳囉。」
學霸也笑起來:「呢度有好多奇形怪狀嘅石頭，引起我地嘅想像力，係呢條路嘅大特色之一。」

我有啲疑惑:「乜唔係成條路都係得怪石咩？仲有其他特別？」
學霸:「你地行落去咪知，未到呀。」
米通嘟住嘴:「懶神秘，哼！」
我地一直沿住呢條500米長嘅步道行，行幾步又停一停，途中實在有太多石頭啦，第一條路就咁精彩，揀沙洲去玩係冇錯㗎！

行完條石頭地質步道，見到對面有個更细嘅島仔，更神奇嘅係兩島之間居然有條好窄嘅自然通道，世界真奇妙！





學霸又出埸:「嗱，第二個特色就係呢個。條路叫連島沙洲，係海水沖涮多年而成。要潮退(即係海平線低過1米)，先至出現。你地可以理解成條路係水底，潮退就浮出嚟。」
Tany:「所以我地行過去？」
福仔:「係呀，都話去天后宮…」

我地穿過呢條連島沙洲，好快就到天后宮。話說通道左右都係海，好似前所未見，發現新大陸咁興奮。

Tany:「到喇！原來唔係皇宮，係間石屋仔。」
學霸:「咁天后宮係佢個名嘛…」
米通:「入嚟睇下，掛左條大魚骨啊！」
我:「係喎！成兩米長喎。」




學霸:「呢條就係鯨魚骨，不過可惜查唔到邊個擺上去。」

呢個時候，福仔已經拎左幾包乾糧出嚟。
福仔:「喂！開餐喇，我已經好肚餓。」
學霸:「好呀，橫掂食完就行山。」
Tany:「呢包芒果乾我要！」

我揀左兩盒最飽肚嘅雪芳蛋糕。路線過半，準備回程！