隻馬騮怪衝入戰場,不停對無眼怪物吼叫。由於佢強大過啲大馬騮好幾倍,我終於明白對敵人吼叫嘅意義。
被馬騮怪對住吼叫嘅無眼怪物,會一嘢飛出幾米遠。有時仲會四、五隻一次過飛起。所以我推測,吼叫並唔係威嚇,而係攻擊手段。馬騮咆哮嗰陣,其實係好似射砲彈咁,將一股力量噴出嚟以達致傷害。
好恐怖……
馬騮怪嘅出現令無眼怪物處於劣勢,好快就死嘅死、散嘅散。冇幾耐戰場上就淨係得馬騮。
突然,馬騮怪啤咗我一眼, 我先發覺自己做咗件好白痴嘅事────頭先做咩嘢唔走入地鐵站入面走呀!
好彩,班馬騮冇理我,好快就走咗,看嚟馬騮對我冇咩興趣。唉…好彩!
我依家個腦極其混亂,點解我會變喪屍?嗰啲怪物邊度嚟㗎? 點解會有隕石?仲有…… 我瞓咗幾耐?
我望一望我隻錶,哇!一年?!咁多?!唉!算啦!
不過話時話,人吔變成喪屍唔係兩隻手十隻手指都有利爪嘅咩? 點解我淨係得一隻手指有㗎?睇落好水皮咁喎。
唉!算啦… 反正我而家有個更加實際更加重大問題:我好肚餓。




以前就話有餐廳啫,不過而家全部變曬做廢墟…點算呀?
我嘗試喺嗰啲荒廢咗嘅餐廳度搵下有冇淨低嘅嘢食,結果渣都冇淨過。 咁又係嘅都過咗三個月乜嘢都被人搶曬啦。
我喺街口揾到間7仔。好啦,搵埋呢間搵唔到就…… 就真係冇啦。
「唉!真係冇,我……等陣嗰個咩嚟㗎?」我喺零食架下低,發現一個露出一半嘅打火機。
「好嘢!仲用得㗎!」我撻著個打火機,撻到火出嚟。我代佢入袋, 留低以後用。
「呀~~~呀~~~呀~~~~」一隻雀企喺對面一間荒廢文具店門口。我仔細一望,喺一隻啡黃色嘅鷺鳥。只不過佢有三個頭,兩對翼。
「睇嚟… 今晚餐飯有著落啦!」反正我有打火機,捉咗燒熟佢,攞嚟當晚餐都好。
我靜靜吔靠近隻雀,然後快速咁撲過去!
「呀~呀~呀呀呀呀!」 不過可惜都係慢咗一拍,隻雀已經飛咗入舖頭入。
我同佢不停交纏住,將啲貨架推冧曬,最後喺收銀台捉到佢!
已有 0 人追稿