打機射喪屍係會報應㗎…(改咗名): 食餐飯都要搞到咁麻煩， 好攰呀！

「呀~呀~呀~呀…呀……」我咋咋臨用利爪將佢解脫，我先發現喺佢嘅腹部有幾個傷口，啲傷口以三條為一組。換句話講，即係喺我捉佢之前，佢已經被某啲嘢襲擊而受傷。
捉一隻受咗傷嘅鷺鳥我都要花費咁多氣力，試問聲我靠咩嘢喺呢個咁危險且瘋狂嘅世界繼續生存落去……
我依家意識到一個更麻煩嘅問題:隻雀畸形到咁嘅樣，仲食唔食得㗎？
不過我自己變成咁嘅樣，唔通怕隻雀毒死我咩！
好，聽到啊媽話以前佢啊嫲點劏雞嘅話？好似話…放血！我喺嗰三條頸用利爪割一刀，鮮血即刻流曬出嚟。嘔！好腥！跟住好似係…用水浸，然後掹毛？冇水喎，點算呀？
冇辦法，唯有用手掹啦！我不斷掹，掹到毛啲甚至係連皮帶肉咁。好唔容易掹完之後隻雀都已經變到溶溶爛爛。唉！ 食餐飯啫，使唔使咁辛苦呀？
最後，應該燒得喇掛？我跑勻成條街，終於喺荒廢餐廳度執到半張爛木櫈。 雖然真係冇嘢食，不過至少可以攞啲嘢燒下。我用打火機點著佢，再放個同樣喺餐廳搵到嘅鐵遮架。 應該燒得啦掛？
救命呀！ 唔係放咗血㗎喇咩？點解啲血水仲可以滴到夠整熄個火㗎？
我好唔容易燒熟隻雀，大大啖咬落去嘅時候。救命呀！半生熟㗎！都唔知夠唔夠五成熟㗎！？
「呃…先生，可唔可以將你隻燒…雞(？)分少少比我啊？我三日冇嘢入過口喇，求吓你啦！」




「啊！你…你…你你你你你唔好過嚟呀！」喺我面前嘅係一隻半人半蟲嘅怪物。佢全身披滿昆蟲嘅外骨骼，一對乾廋嘅手，同埋一對帶刺嘅螳螂爪，加埋對腳，啱啱好係昆蟲嘅三對肢體。佢腰部以下，昆蟲嘅腹部。眼皮入面嘅眼球變成一對複眼，下巴兩側生咗一對螞蟻嘅大顎。外形可謂極其恐怖！