打機射喪屍係會報應㗎…(改咗名): 呃…我同隻曱甴食緊飯？

「先生，我冇惡意㗎。如果你唔願意嘅話，我依家就走。」隻蟲人話
「唉！算啦！我分少少俾你喇。」我冷靜過後，答返佢。我見佢可以進行一啲簡單嘅語言問答，應該同我一樣掛？
我用利爪將我未咬過嘅部份斬出嚟俾佢 。「多謝！多謝！」佢一攞到手就大大啖咬落去，完全唔在意手上嘅肉其實都未熟透。
我仔細觀察下佢，發現其實佢並唔似啲咩危險人物，反而更似我呢隻款嘅學生哥。
「呃…朋友，請問我應該點樣稱呼你呀？」
「我叫…麥康。」
「咁…啊康，你幾大呀？」我反而對呢樣嘢有啲好奇， 希望係啲差唔多年紀嘅人啦！
「兩個月又12日，換算做人類年齡應該係16歲。」
「兩個月？？」我只係問咗兩個問題，已經得到一個驚奇嘅答案。呢個麥康到底係咩嚟㗎？
「吓？你唔知㗎咩？我係由曱甴變異成嘅變異體嚟㗎。」




「what？！？！」我依家竟然同隻曱甴一齊食飯？！唉！算啦！反正我自己都已經唔係人啦！又有咩資格嫌棄佢係隻曱甴喎！
「不過…你頭先講嘅「變異體」係咩呢㗎？」
「變異體即係所有末日後出現嘅生物，分高智商同低智商。高智商即係我吔，低智商即係其他野獸、家畜型生物，例如我吔食緊嘅呢隻雞。」
「哦!」
跟住之後，我同啊康邊食邊傾咗成晚， 估唔到竟然佢竟然知道幾多嘢㗎喎。
當個火完全熄曬嘅時候，我哋搵咗間荒廢旅行社做臨時住宿。入面嘅梳化已經爛咗，不過我哋都唔理七三二十一就瞓咗落去算。
「嘎嘎！！！！」
我同啊康俾啲不明嘅怪聲嘈醒咗。一望向門口，▉！ 係一隻雀鳥型嘅變異體。 佢個頭係紅色嘅，頸下面嘅身體漸變成綠茶製品嘅顏色。四肢都鋒利而短嘅鳥爪。仲有十幾條好似魷魚鬚咁嘅尾巴。 當佢意識到我哋發現佢嘅時候， 佢嗰十幾條尾好似孔雀開屏咁展開成扇形。 我嚴重懷疑呢隻係孔雀。
門口已經畀佢擋住咗，啊康又用佢對螳螂爪擺出攻擊姿勢。更重要嘅係，呢隻打靶雀竟然夠膽嘈住老子瞓覺！冇辦法，開戰！