「輕粵文小說」《新世代魔法界異聞錄》: 新秩序第五章 降位者嘅原罪

「咳咳！」比桶水淋醒咗嘅單當家俾啲水濁親忍唔住咳咗兩聲，艾當家就繼續問話：「係咩風吹你過嚟啊？」

「艾⋯⋯艾當家？」見到艾當家嘅單當家即刻好似見到一個凌駕於佢實力之上嘅一個人。「照道理如果有啲咩事嘅話寄封信過嚟咪得囉，叫得你過嚟一定係一啲好緊要嘅事啦！仲有⋯⋯」艾當家攞起咗佢喺單當家身上搵到嘅來自本部嘅信。

「哦⋯⋯原來係被降職啊，你犯咗啲咩事呀，蘭斯？」原來單當家嘅名係叫蘭斯，但重點係佢好似係本部犯咗啲錯事，被調職到呢個地方。

望住咩都唔講嘅單當家，艾當家唯有自己估下：「等我估下先⋯⋯同格雷希亞拉波斯有關？」就算單當家被譽為現時魔法界嘅新一代天才，但佢始終避唔開而家身為英屬香港魔法部主管，有舊時代天才之稱嘅艾當家嘅雙眼。

「七十二柱魔神本身就係禁忌嘅存在，你仲要同佢地定下契約咁我真係救你唔到啦⋯⋯」艾當家講到一半嘅時候，單當家突然之間好激動咁樣講話：「我呢種人注定要墮落㗎啦，當其時天眼系統要㨃冧我家族嘅時候又唔見得你哋魔法部救我嘅家族！而家仲好聲好氣話想救我？」





點知原來呢件事都講中咗艾當家心裏面嘅傷口：「你以為我唔想救咩？你哋家族同嗰個成個魔法界嘅叛徒集團搞到全世界一鑊粥啊！仲要影響埋天眼系統嗰班大佬，你覺得佢哋唔會郁手㨃冧你哋咩？如果唔係因為我嘅話，你都死埋呀！家陣你仲要偷左七十二柱魔神其中一個，本部唔殺你已經係一個笑話嚟啦！」

聽到如此無奈嘅消息，單當家忍唔住喊咗出嚟，但艾當家都堅持要講埋嗰一句：「你而家冇路走㗎喇⋯⋯留返喺度啦⋯⋯」

過咗一陣已經平復左心情嘅單當家跟咗艾當家行咗出審問室就見到馬先生同陳艾迪，單當家就對住艾迪講咗句話：「I’m so sorry！啱啱用我嘅使魔令到你中咗招⋯⋯」心知觸碰過自己嘅惡魔，所產生嘅恐怖副作用，單當家連忙向艾迪道歉。

「冇嘢！雖然係恐怖咗啲⋯⋯唔係話用黑魔法唔得嘅，但一嚟就影響咗我哋魔法部啲人嘅磁場，加上你嗰陣時咁近聖壇，聖壇固然有反擊啦！話時話點解你而家好似冇咁暴躁啦喎？」艾迪解釋到啱啱單當家遭受反噬嘅原理，隨後艾當家見到佢知識上嘅增長都講話：「九成因為佢隻使魔囉！係喎！冇見一個禮拜姐，進度都OK呀嘛？」艾迪連忙講話：「多謝當家嘅關心，都可以啦暫時！」

隨後艾當家就叫咗馬先生去埋一邊傾野：「本部嘅消息！嗰班人又返嚟啦！」聽到嗰班人又返嚟嘅馬先生都嚇咗一嚇：「今鋪佢哋又想搞咩啊？」艾當家就打開封信照住咁樣讀話：「暫時唔知道佢哋返嚟香港嘅目的⋯⋯」





另外喺後面單當家好好奇點解艾迪會完全冇事，艾迪見到對方好似有嘢想問就話：「加咗好多層保護㗎！」單當家就對呢個新來嘅人感到好奇怪：「但聽講你嚟咗一個星期咋喎，七十二柱魔神冇可能咁易就擋得到落嚟⋯⋯」聽到話魔神但因為艾迪仲未知道呢一樣野係乜嘢就繼續問同思考：「七十二柱魔神？因為始終我用自創咒語，之後基本上每日都用好多嘅精油同蠟燭，基本上如果我擺喺屋企個聖壇冇出事嘅話，應該都冇事嘅，惡魔嘅話我就唔知道你所講嘅七十二柱魔神防唔防到？」

聽到如此有自信喺度解釋嘅艾迪馬先生嘆咗一口氣話：「咁睇你個樣屋企個聖壇應該失效啦⋯⋯」聽到如此驚人嘅消息艾迪突然之間頹左：「吓！枉我之前咁辛苦整咗佢出嚟，一次就失效啦？」馬先生繼續回答話：「因為七十二柱魔神能量太勁，就算唔摧毁你個聖壇，都一定要重啟㗎啦！」單當家對於呢一個新來但對魔法有咁樣熱誠嘅人感到有趣，亦都笑咗一下。

「係喎，艾迪！你仲未有拍檔呀嘛，蘭斯你去做佢拍檔啦！」見到如此對黑魔法同埋白魔法各自有差唔多咁上下造詣嘅兩個人，艾當家就安排咗佢哋兩個一組：「有冇問題？」

「我冇問題！呢個人有啲有趣，我都想接觸下！」蘭斯回答，唯獨剩低艾迪好奇話：「咁突然嘅？」