「輕粵文小說」《新世代魔法界異聞錄》: 新秩序第六章 無聊工作之餘嘅談吐

望住一疊又一疊嘅研究資料，陳艾迪好仔細咁樣研究，與此同時單當家亦都攞咗對自己要研究黑魔法嘅資料，艾迪一睇到係各種寫住新世代新型嘅黑魔法咒語同法陣就提出左自己嘅意見：「單當家呀！我覺得唔使急住去研究新嘅魔法，反而係需要多啲進行冥想或者研究加強自己嘅能量護盾之類，因為我見你上次都反噬得有啲勁⋯⋯」

聽到艾迪所分析嘅結果，單當家就笑住咁樣答：「下次叫我蘭斯得㗎啦，你講嘅嗰啲我係住處都有做到啊，上次我只不過係因為準備唔夠充足所以先至反噬啫，不過講到底都係太過衝動，哈哈！」隨後兩個人繼續進行自己嘅研究工作，不過諗返起上次嘅法鬥艾迪都諗翻起要為聖壇嘅缺口做返啲補充。

蘭斯見到艾迪專心咁樣係聖壇嘅缺口畫返新嘅魔法陣同點上蠟燭，心情好似非常之開心就喺度問：「話時話你就甘心成世做魔法部聖壇組嘅建構者咩？冇諗住轉去破陣者部門？」面對從來都未聽過嘅詞彙，艾迪就喺度問話：「破陣者部門係咩部門嚟㗎？」

「你竟然會唔知？不過都啱嘅，先嚟左一段時間⋯⋯英屬香港政府魔法部係白魔法嘅代表，利用白魔法守護香港嘅未來，破陣者雖然目前都係隸屬英屬香港政府魔法部，亦都聽講之後會同魔法部分開，但佢反而就係黑魔法嘅代表，分咗兩大班人：復仇者，利用黑魔法去制裁嘅人，通常目標係國家或者魔法界罪犯；破壞者，以摧毁黑魔法嘅根源法陣為主。」蘭斯好詳細咁喺度解釋。

「原來我哋有呢種部門㗎？」艾迪對呢件事感到非常驚訝，但蘭斯就喺度嘆氣話：「不過呢！睇嚟暫時嘅我入到魔法部行動組都已經差唔多㗎啦⋯⋯係呢！你訓練期仲有幾耐？」





艾迪照直咁樣答佢話：「剩低十一個月有多。」蘭斯聽到咁長時間，就諗返起當年無止境嘅訓練，拍咗一下艾迪嘅膊頭：「雖然係長咗啲㗎啦，一年訓練期，但你一定會獲益良多。更何況你本身已經訓練到自己體質有咁強嘅能量磁場同護盾，相信未來你一定係一個好強嘅白魔法師。」

艾迪就突然之間好好奇咁樣問：「咁你覺得足唔足夠顛覆世界，即係例如令到全世界嘅人都向善？」蘭斯只好勉為其難咁樣答佢話：「你咁樣會唔會誇張得滯呀？太誇張啦，不過我哋可以試吓用預言牌組嚟預測一下。」蘭斯用洗好咗嘅一副牌叫艾迪隨便抽一張，之後解牌話：「雖然你做唔到，但你嘅後代應該就做到啦！」

再次見到咁神奇嘅卡牌，艾迪就叫蘭斯教佢：「唔該教吓我用呢一副牌啊！」但始終學預言牌組要記嘅嘢有啲多，但見到艾迪咁有興趣就講話：「我盡量嘅咋，我都唔係識好多！」

另外一邊收到搜索組報告嘅艾當家同馬先生喺度同搜索組嘅同事喺度討論緊話：「話說九龍嗰邊⋯⋯最近好似唔係幾咁太平⋯⋯戾氣有啲重⋯⋯九龍寨城最為嚴重⋯⋯」艾當家就目前嘅情況講話：「咁嗰邊通常都龍蛇混集㗎嘛，呢啲應該交由警察處理，唔輪到我哋出手啊！」不過馬先生睇住手上嘅報告似乎有另外一番見解就講話：「但依個戾氣嘅程度⋯⋯有兩種可能性：第一，使用咗黑魔法令到戾氣增加；第二，因為黑魔法嘅祭祀而令到戾氣持續增加，當然啦唔排除咩事都冇，但係睇咗呢份報告先⋯⋯」

馬先生攞咗另外一份行動組嘅報告俾艾當家：「我哋嘅行動組去調查嘅時候發現咗有個魔法陣，但解唔到，相關人士已經拘捕左，但就係⋯⋯」艾當家擔心到話：「咁我哋嘅人冇受傷呀嘛。」馬先生繼續匯報分析話：「係冇人受傷嘅不過個魔法陣有啲難解，我覺得我可以親自去一趟，但係⋯⋯」





「你係驚教會啲人？」從艾當家口中所講出嘅教會亦即係之前佢所講魔法界嘅叛徒集團，的確係馬先生驚嘅一個地方，見到雙腳都震晒嘅馬先生，艾當家就話：「的確到而家仲係你心裏面嘅嗰口釘，亦都聽講教會啲人而家就潛伏係寨城裏邊，嗯⋯⋯個魔法陣需要一個強大嘅黑魔法師同白魔法師嚟解，如果唔係嘅話反噬會即刻置人於死地⋯⋯」

「我諗我哋需要準備工作，我哋預計一個月後可以進行破解⋯⋯」馬先生喺度講話，相反艾當家就喺度為挑選魔法師而感到煩惱話：「咁你覺得派邊個會好啲？」

馬先生望住窗外面嘅艾迪同埋蘭斯正喺度研究緊預言卡牌就話：「一個月後⋯⋯比佢哋試吓！」