「輕粵文小說」《新世代魔法界異聞錄》: 新秩序第七章 行動！Action！
「呢個魔法陣⋯⋯」見到如此龐大且複雜嘅黑魔法陣，艾迪捂住個鼻完全唔想靠近，因為呢個黑魔法陣已經獻祭左太多嘅生物，例如：兔仔、雀仔、老鼠咁樣，周圍都係血腥嘅味道，但反而就係因為血腥嘅味道令到蘭斯有啲興奮：「呢個魔法陣，能量好勁喎！」
守住喺魔法陣隔離嘅行動組成員問咗一句艾迪佢哋：「你哋係咩人？」兩人都攞出咗證件話：「我哋係艾當家親自派過嚟嘅。」點知行動組啲人一望到兩個嘅證件上面都寫住聖壇組嘅英文就嘲諷到話：「估唔到啊，而家連聖壇組嘅人都可以插手我哋行動組嘅事⋯⋯」
點知蘭斯聽到人哋嘅嘲諷就有啲唔憤氣咁樣喺度話：「家陣唔信呀！」艾迪拍咗一下蘭斯嘅膊頭令到佢冷靜咗一陣：「你需要嘅係咪呢樣嘢？」隨後就同蘭斯開始演練，蘭斯講咗句話：「格雷希亞拉波斯！」
「格雷希亞拉波斯？」齋講個名出嚟隔離嘅嗰啲行動組嘅人就已經嚇到退後左，點知原來蘭斯只係叫自己嘅使魔去吸收魔法陣所發出嘅過多戾氣，之後就用粉筆喺地面畫咗兩個圈之後就話：「艾迪你企喺另外個圈嗰度，咁就準備開始㗎啦！」兩人企好位置就準備施法，蘭斯最後都講多咗個要求話：「其他人幫我睇住個場，唔好俾任何人入嚟打攪我哋！」
就啱啱嘲諷艾迪佢哋兩個嘅行動組組員好奇咁問咗一下佢哋嘅組長：「呢兩條友咩來頭啊？點解艾當家好似好睇好佢哋⋯⋯」
一個已經有一把年紀似乎係佢哋組長嘅人回答話：「一個原本係本部嘅，新一代嘅天才有冇聽過？先唔講佢本身有住極高嘅黑魔法造詣，可以駕馭到格雷希亞拉波斯嘅人少之又少，可能如果我哋組裏面有人喺外面同佢法鬥應該冇咩人可以鬥得贏佢⋯⋯」
「賈老嘢真係識講嘢嘅啫，不愧係我之前嘅組長呀！」蘭斯臨做破壞嘅時候都冇唔記得佢之前嘅上司，組長就笑咗一下勸喻佢一句話：「希望你由頭嚟過重新學返啲好嘢啦！」
「原來係前輩大佬，咁另外一個呢？」組員又繼續喺度問組長，組長就回答話：「傳聞可以擋住格雷希亞拉科斯嘅，我哋魔法部冇幾個⋯⋯」組員就非常之唔明白咁樣講話：「咁咪派嗰個黑魔法嘅人嚟囉，根本唔需要用到另外嗰個人⋯⋯」已經聽過辦公處傳聞嘅組長就笑咗一下話：「我哋即管睇吓佢有啲咩料⋯⋯」
「根源之處！外層！破！」黑魔法陣似乎對蘭斯嘅咒語有啲反應，正作出反擊，艾迪就及時補上話：「寰宇之守護，八星連結，六芒星陣，護！」利用白魔法同黑魔法嘅反擊作抵銷。
「呢個係⋯⋯」組員聽到艾迪用嘅係自創咒語都非常驚訝，必須通過自己同自身能量嘅協調，並且同宇宙連結進行創建嘅新咒語，睇來佢對自身嘅能量了解都非常之徹底。「而且佢絲毫一啲都唔覺得辛苦，證明誤差同排斥一啲都唔大，呢位年輕人睇嚟都有啲料到。」組長繼續解釋話。
「準備最難嘅嗰一層啦！」蘭斯提醒艾迪，「三、二、一⋯⋯砰！」突如其來嘅炸彈襲擊係艾迪同蘭斯隔離發生，行動組嘅人即刻俾炸彈嘅衝擊力彈飛咗，未見過如此狀況嘅艾迪即刻縮低，蘭斯連忙講話：「唔好縮！」點知艾迪都係縮低咗，令到魔法陣變得非常之唔穩定，在場嘅所有人隨時都有生命危險。
行動組嘅組長醒咗之後隨即就命令到話：「淡定！」隨後佢背後藍色嘅靈體就接近黑魔法陣令到魔法陣暫時穩定咗落嚟，但突然之間一個男人出現咗係所有人面前，佢笑咗一聲之後就跑走咗，隨即組長就發覺唔對路講：「第一組剩低嘅人同我追！之後搵人幫我叫救護車！」幾位組員即刻追緊正係喺度逃走嘅男人。
「繼續！ 根源之處！中層！破！」蘭斯捉住左手繼續喺度破壞黑魔法陣，艾迪重新振作起來，就算腳震都堅持企實喺度唸咒：「寰宇之守護，八星連結，六芒星陣，護！」本身雖然話都係會遭受到黑魔法嘅反擊三個人應付係綽綽有餘，但始終黑魔法對每個人嘅影響都係有姐，所以本身應該係安全拆解會比較好啲，點知⋯⋯
「砰！」一粒子彈打中左組長嘅膊頭，因為佢集中精神喺現場協調能量上面，忽略咗自己身上嘅護盾同白魔法組合，令到敵人成功射傷佢嘅右手。「老嘢！」如此恐怖嘅場面就連蘭斯都未見識過，佢都分咗一下心，但經驗老道嘅組長依然指揮到話：「談定！第二組分一半人追查槍聲！你兩個同我繼續解！」
「係！」艾迪同蘭斯忍住心中嘅怒火破解最後一層嘅法陣。
「根源之處！內層！破！」蘭斯講埋最後一句咒語，艾迪亦都迅速咁樣補返白魔法：「寰宇之守護，八星連結，六芒星陣，護！」之後就踢亂法陣上面嘅擺設，蘭斯就沖左上去幫組長止血，而組長亦都強忍着話：「睇嚟係佢哋啦！呢啲嘢得個班人先做得出！」
另外一邊追緊神秘男人嘅組員見到男人停低咗腳步話：「雖然同目標有啲偏差，但三帝，剩低兩個⋯⋯不過點解會多咗兩個閑雜人等嘅，哼哼！有啲有趣喎！」行動組嘅組員即刻攞起槍袋裏面嘅槍話：「咪郁！」
「你覺得你哋鬥得嘅我咩？」男人即刻釋放背後強大而且明顯嘅血色靈體，在場嘅組員除咗啱啱諷刺艾迪佢哋嘅嗰個組員其他都暈低咗，男人見着就話：「勁喎抵受得住佢嘅能量，你應該係三帝嘅後代嚟，而且好大機會係賈維斯嘅後代⋯⋯」似乎俾人識穿左身份嘅組員都驚左一驚：「點解你會知道㗎？」
「哈哈！我勸你都係返去同佢地講，我返嚟啦！」隨後個男人就一躍而下，跳咗落去有布承接住佢嘅一樓，組員即刻追上去話：「咪走！」