🏫 👩🏼❤仲講中學生「應否」拍拖？不如講下「如何」拍拖啦！🏫 【校園】【愛情】【鬥智】: Ch.7.4 人生的抉擇
7月17號，是日暑假第七日。
喺屋企食完開心早餐，突然聽到電話鈴左一下，原來係David wts 我。
David：一齊去睇戲
我：得你同我咁dry?
David：同埋阿Chris
我：When and where?
David: 12點去Megabox等啦
講返起新校長果件事，我就趁朝頭早上網google下。
㩒入去我哋學生喺fb度開嘅學生group，已知嗰個新嘅男校長叫陳裕鳴。
跟據近日同學group嘅言論，似乎佢都係一個幾惡劣嘅人。
誤打誤撞，我搵到高登講佢嘅衰野。
啲人有埋校長個樣，應該係佢以前接手嘅學校，裡面啲學生開post嘅。
原來佢試過同老師夾唔埋，聽講佢試過挪用學校啲錢，但由於金額過少，加上佢做事又小心謹慎，結果因為證據不足而告唔入，事件不了了之。
真唔明白點解學校校監同校董會請左d咁嘅人返黎。
Google, FB同 高登 search 到嘅野始終有限，我最多只係搵到一啲 cap圖，同埋大部分有關呢位校長嘅意見。
Anyway, 校長拆散情侶嘅事，最多人講，睇嚟消息都有啲可信性。不過而家不宜武斷，始終真人未嚟之前都係唔知點。
關於我同阿玲未來嘅發展，今朝早塔羅又出咗張「權杖七」俾我。要衝破難關？或者未來我同阿玲要一齊諗計仔。
Google再搵落去就唔夠時間趕去見David，最後我著件有領衫同一條灰色錐形褲出街。
David: 型bo, 你件新衫邊度買架。
我：h&m
我地3人一齊睇完場戲，再食個下午茶，吹下水，已經係4點半。
我：跟住你地有咩節目?
David：上DR(一間女僕cafe的店名)啦
我：唔好啦，又maid cafe悶唔悶啲呀?
Chris：我要返屋企啦
David：咁大家散水喇
我：David，不如一齊去尖沙咀海邊行下啦。
(我靈機一動)
David：係喎，我醒起神魔之塔有活動要開GPS先玩到。
我同佢黎到尖沙咀已經5點，David做完遊戲任務，我地再吹下水，快樂不知時日過，行行下行到廟街已經7點。
David：最近你做咩呀？咁多負能量嘅，唔似你平時作風啵！
我：第一，Maths衰左少少，會有少少影響情緒；第二，新校長嘅事存在未知之數；第三，我阿媽上星期返左嚟一次，我諗緊幾時將我同阿玲嘅事公開；第四，我仲諗緊食唔食阿玲好？
David：上次同阿Fred食飯，你都安慰過我啦，天無絕人之路，有乜理由你睇唔開啫?
我：我當然知啦，但係我要時間適應環境轉變。
David: 咦，坐係果檔嘅女仔都幾靚女啵。
又有女吸引David目光。
我：死性不改
(我哼笑)
David: 格離有檔抽簽占卜，30蚊一條問題，玩唔玩下?
我：我都有塔羅啦，仲洗乜玩佢啲野喎?
(我微笑)
David：玩下啫，唔洗咁認真喎，風水佬講嘅嘢你咪當耳邊風聽完算數囉。
David：講返Grace 件事呀，其實我覺得你都係想搵返以前嗰種開心感覺啫。
係咩？
David: 人要向前望，去識返個新女仔，開心感覺自然會返嚟㗎喇，你就好快忘記佢㗎喇。
David: 男人最緊要係咩？貪新忘舊呀！
（懶係幽默地笑道）
雖然爛gag，但我都假笑了一聲。
我地坐到該阿叔檔攤前，睇佢個樣頭髮唔係好花白，皮膚唔係好老，50幾60歲吧。
攤檔阿叔：細佬，有野就問啦，我一定答到你。
David諗左一陣，然後開口：我將來有冇大學讀？
個占卜流程好簡單，阿叔首先叫人提供出生年月日，然後諗住個問題，再好似去車公廟求簽咁，搖個簽筒直至一枝簽跌出黎。
阿叔：71簽，上簽，你行緊少年運，一定考到。
所以啲人話一個風水佬可以呃你十年八年，不無道理。
阿叔：冇錯，但我唔鼓勵人迷信。
(佢望向我，好像回應我心底話)
佢識讀心？竟然知我諗乜？
阿叔：比你問到好結果，你唔努力，又係冇用；比你問到唔好嘅，你仍然可以改變未來。
阿叔：如果我而加同你講你今年會賺100萬，你又會唔會真係日日坐響屋企訓教，個天就跌舊錢比你呢？冇可能啦係咪？
David：又係嘅⋯⋯
阿叔：你地應該都係學生哥啦？我比你地免費問多一條，就當收你半價。
(佢又對我說)
又幾好人wor。
David：Issac到你問喇！
於是我問愛情，問將來高中有冇拖拍。最後我抽到支中簽。
阿叔：我諗你以前應該錯過咗一個桃花機會。
嗯，冇錯係Grace。
阿叔：蘇州過後冇艇搭，緣份過左就係過左。
我默不作聲，也沒有任何表情。
阿叔：你今日唔見左10蚊，你仲會唔會為左嗰10蚊，而令到自己聽日唔見埋20蚊呢？
David：唔會囉。
阿叔：咁咪係囉，所以冇咩話放唔放得低，你讀過書應該知咩叫「沉沒成本」啦係咪？
阿叔望返我講。
阿叔：命裡面有時終須有，命裡無時莫強求；同埋你而家再唔主動，想等幾時？你地學校應該都有其他美少男啦？阿叔40幾年前讀書又係經歷過，你唔hold住粒桃花，佢轉個頭就悿人擇左黎食喇。
(阿叔望返我講)
占卜嘅野，玩下就好，唔好咁認真。
話雖如此，但呢一刻俾個阿叔講完之後，嗰粒火又返返嚟。
命運在自己手上，都係buy因果定律果套。
所以，我唔應該再因為Grace而冇埋阿玲。