《霹啪文壇頒獎典禮》: 最佳音樂特效

「燈鄧凳鄧燈凳敦凳躉凳躉……」
-
歡迎嚟到《霹啪文壇頒獎典禮》。今日係頒獎典禮嘅最後一日，我哋會頒埋最後一個獎，亦都係唯一一個唔係由觀眾投票嘅獎，就係「最佳音樂特效」。
-
「最佳音樂特效」得獎故事係……
-
係你喇- 《共的迫奶》
-
《共的迫奶》
作家-Rachel




封面設計-Rachel
網站設計-澄澄
網站編輯-澄澄
-
我哋不如重溫故事精選片段先。
-
「小餐檯沙發雪櫃及兩份紅茶，尹智娜諗起佢同老公喺屯門山頭食住心形士多啤梨蛋糕曖昧。別望著那熱茶暗中的計算，茶包浮起、沉澱。紅茶都灘凍咗，夕陽西下嚟到寂靜嘅晚上。
-
尋回一碗湯、清清的小菜，尹智娜食住溫暖嘅住家飯，長路漫漫是如何走過。沖個靚涼，輕鬆渡過一天。「拿來長島冰茶換我半晚安睡」尹智娜loves drinking tea very much。」
-




相信大家從短短2段文字都搵到唔少嘅歌詞。我哋而家有請《共的迫奶》作家-Rachel講兩句。
-
Rachel：「澄澄故事台正一6uo，叫我講得獎感言。有咩咁開心啊家下？篇嘢擺明充滿仇恨㗎啦，「感」乜嘢言啊，等睇season 2啦。你哋班嘢同我聽住啊，好好做足個人衛生，我唔想見到竹君喺記者會講「某某故事台群組」啊。澄澄有精神病㗎，雖然是精神病但沒關係啦。」
-
多謝Rachel嘅分享。佢真係好忙㗎！平時搵佢，冇十日八日都唔覆，所以大家快啲叫佢出文啦！今日差啲要重金禮聘先請到佢嚟講兩句。《霹啪文壇頒獎典禮》都差唔多接近尾聲，澄澄好似有啲嘢想講，我將個台交返俾澄澄先。
-
澄澄：「呢幾日嘅連載係咪好戇鳩，感覺好似攝時間呢？好似自己喺度自High咁。其實本身呢個頒獎典禮真係好想邀請唔同嘅嘉賓上嚟講兩句，亦都想感謝各位一直以嚟都咁 支持我嘅讀者。初頭真係諗住頒發最佳愛心大獎俾like得最多嗰個，但最後因為時間唔夠，同埋驚大家冇興趣寫，所以就擱置咗呢個project。所以就淨係得返讀者投票嘅環節，入面投票我係一票都冇投過，全部由大家去投。真係好多謝大家投票，雖然得15票，但已經遠超我嘅想像。」
-
澄澄：「故事台入面嘅故事雖然唔多，但我 覺得每個故事都睇住我嘅文筆一步一步咁進步。故事台曾經喺其他發佈媒介曾經收到負皮，話文筆差。但每一篇文都係練習嘅地方。雖然係負皮，但都冇我最想收到「屌你老母」嘅留言。但我好開心，正所謂當局者迷，旁觀者清，有時自己會自己喺腦入面補充情節，但讀者們係唔會知道你個腦諗咩。呢啲負皮，令一個少少嘅故事台逐步做到最好。」
-




澄澄：「故事台接近運行一年半，從佛系隨緣更新，到上年8月停咗5個月，去到今年逐漸有咗一個出文時間表，目標係一週發佈兩篇文或更多。或許我出文嘅頻率唔係最密、或許我一篇文嘅字數唔係最多、或許我嘅文筆唔係最好，但故事台發佈嘅所有文章都要跟到自己嘅標準先出街見人。」
-
澄澄：「最後賣下廣告先，嚟緊《夾出一個她》喺暑假內都會keep住逢星期三、日連載，開學後無論幾忙，都希望最少每個禮拜發佈到1篇文。或許8月可能有特別嘅文啦！大家敬請留意喇！」
-
澄澄：「唔阻大家時間喇 ！夜喇！大家要瞓喇！我喺度正式宣佈《霹啪文壇頒獎典禮》正式圓滿結束 ！我哋下年有機會再見。」

IG：chingchingstory