[陳子鋒系列] 大學入學篇: （五）再遇拉斐爾

在一陣手忙腳亂過後，我總算與黃炎冰再會合。
 
「喂，黃......Irene，你去邊搞咁耐呀？」
 
我本想喊黃炎冰的全名，但想起她剛剛那憤怒的扭耳朵攻擊，我還是乖乖的順她意思比較好。
 
「你仲好講，我啱啱去查下究竟發生咩事，但沿路就遇到幾隻小鬼阻頭阻勢，我喺度讀咗成年都未試過咁嘅情況。」
 
「哇，你唔係又想屈我搞成咁呀？我嚟註個冊啫，關我咩事先？」
 




「點會唔關你事！你又唔係唔知自己咩體質，仲有頭先木人巷隻小鬼擺明係衝住你而嚟。」
 
「喂，佢用我個樣啫，唔代表衝住我嚟喎。七孔流血還七孔流血，死還死，兩回事嚟喎。」
 
「哇，你個無賴呀！念在你解決咗頭先隻小鬼無搞到更大鑊，我唔同你計。」
 
「咩唔同我計呀，根本唔關我事。咦？解決咗？乜頭先隻小鬼唔係被你......」
 
我疑惑地看著黃炎冰，而黃炎冰也疑惑地看著我。
 




「奇怪啦，我仲以為隻小鬼係你收服咗......」
 
正當我在思考之際，不遠處卻有三個身影逐漸向我們靠近。
 
「Hey，子鋒，我哋又見面啦。」
 
「呢把聲？點解你會出現喺度？」
 
眼前這名混血男性來到我的面前，在聽到他的聲音後，腦海裡瞬間便浮現出澳門那苦不堪言的經歷。在加上之後天命叔稍為透露過跟這名男性的交情後，我便一直祈禱不要遇上他，但可惜事與願遺，想不到在踏入大學新生活的第一天，便碰到這個倒霉的存在。
 




「唉，我明明日日祈禱唔好再見到你，點解會咁㗎？神你係咪捨棄咗我啦？」
 
我右手按著發痛的前額，無奈地看著眼前這名男性，那雙紅綠分明的眼睛，相信我這輩子也忘不了。
 
「哈哈，果然有其師必有其弟子，口不擇言你兩師徒真係似到十足。不過請你搞清楚，我都係侍奉神嘅其中一人，當你同神祈禱嘅時候，我都會感受到一二。見你咁有誠意，我點都會嚟見下你嘅。」
 
混血男性用爽朗的笑聲和話語回應我的無奈。
 
「又話神係全知全能，點解要放任你嚟騷擾我？」
 
「神的確係全知全能，但祂更尊重自由意志。你有自由唔想見我，我都有自由嚟見你。」
 
混血男性露出了賤笑，我就知道這傢伙能跟天命叔打交道多年，絕不會是甚麼正經的傢伙。
 
在我還想多抱怨幾句之際，一旁的黃炎冰忍不住搭話。




 
「拉菲爾......先生，點解你會出現喺度嘅？唔係子鋒身上又發生咩事呀？」
 
「我無記錯你應該係張天命嘅師侄，差啲唔認得你添。」
 
阿爾完美無視黃炎冰的提問，開始自顧自地聊起天命叔及黃炎冰等人的近況。
 
「阿爾先生，閒話家常就嚟到呢度啦，唔好忘記我哋仲有使命。」
 
「係囉，阿爾先生，我哋仲有緊要事做，趕快起行吧。」
 
本來在阿爾身旁靜靜待著的兩人，看到阿爾好像沒有完結對話的意思，終於忍不住開口說話。
 
直到兩人開口說話，我才注意到兩人跟阿爾一樣，擁有著混血的外貌。只是看來跟阿爾不同，兩人雖然也帶有一點奇妙力量的感覺，但沒有阿爾那種超然及壓倒性的感覺。
 




而且兩人的廣東話口音，的確像是外國人學習廣東話但不太純熟的感覺，不像阿爾這種活了不知多少年的混帳，以混血的外表卻能說著比我還要流利的廣東話。
 
「係囉係囉，你兩位朋友似乎好趕咁，唔好再嘥時間同我哋吹水啦。你都係走罷啦。」
 
難得兩人開口打斷了阿爾的說話，我也乘勢希望他趕快離開，畢竟我總感覺跟他相處愈久，只會惹來更多麻煩。
 
「子鋒你收下把口啦好無！唔好意思呀，拉......阿爾先生，我會叫天命叔好好管下佢把口㗎啦。」
 
「哈哈，唔緊要。叫張天命管佢咪仲衰過唔管，不過陳子鋒，估唔到你仲可以企返起身。」
 
阿爾若有所思地盯著我看。
 
「聽你語氣，好似唔認為我應該企返起身喎？」
 
「哈哈，當然唔係，我相信你無論結果係點，一切都係神嘅旨意。」




 
「唔好意思，比起你所講嘅神，我都係信自己多啲。如果你所講嘅神真係咁全知全能，就唔應該搞啲咁嘅爛攤子出嚟留返畀我。」
 
我回想起當初阿爾跟天命叔對話後，害我差點被殺點，封印靈力亦令我吃盡苦頭，我實在無法用甚麼好的語氣來對待他。
 
阿爾聽到後臉上沒有太大的表情，反而在他身旁的兩人神情明顯變得不滿，好像很介意我的說話似的。
 
兩人好像想對我作出反駁之際，阿爾便搶先開口阻止了兩人。
 
「彼德(Peter)，安德烈(Andrew)！陳子鋒，有自信係好事嚟，不過神都有佢嘅旨意，唔好嘗試猜度佢嘅意思。」
 
「係係係，咁你繼續信仰你嘅神，我繼續我嘅生活啦吓。」
 
我再次以不耐煩的語氣嘗試結束對話。
 




「陳子鋒，時間已經唔多啦，無論點都好，你已經身處喺呢件事嘅中心點，無論你想定唔想，我哋都一定會再見面。希望下次見面嘅時候，唔單只係你，我希望可以為呢件長久嘅事畫上一個句號。神會與你同在。」
 
阿爾作出祝福的手勢後，便和身旁的兩人一同離開。