[陳子鋒系列] 大學入學篇: （八）O-Day（2）

迎新日當天，我如常地到天命道堂打坐，卻不見炎冰的蹤影。
 
正當我感到納悶之際，道堂中那形同擺設的電話竟然響了起來。
 
「呢度係天命道堂，你所打嘅電話未能接通，有無事都好，都唔好講低啦，呢度無留言嘅，by......」
 
我以為這是一貫的垃圾來電，故打算說一堆廢話便掛線，卻未想到電話那邊傳來熟悉的聲音。
 
「細路你係咪想死呀，拎我個道堂嚟較飛！」
 




那曾經一度令我感到厭煩的聲音，此刻竟有點懷念起來。
 
「大，大叔。點解你會無啦啦打返嚟？呀，唔係，應該問你究竟帶住小詠去咗邊？粒聲唔出掉定個道堂走咗去算咩意思？」
 
「細路你唔好一輪嘴住先，我咁大個人你唔駛擔心嘅。」
 
「擔心你條命呀，我擔心小詠咋，連子鋒你都無聯絡，我哋以為你去咗見耶穌添呀。」
 
「你個死仔包就見耶穌，不過，如果你唔小心啲，可能真係見耶穌都唔出奇。」
 




「咩呀，咩意思呀？」
 
「雖然我哋唔喺香港，但小詠其實每日除咗修練之外，都有幫你個死仔包卜卦嘅。我簡單講啦，你呢個月咩都唔好做，喺道堂等到開學，你要用嘅嘢我會幫你準備好。」
 
「痴線咩，咁咪啫係要我匿喺度成大半個月，唔好玩啦。」
 
「我先唔得閒同你玩，你要知道，今次我同小詠唔喺度，炎冰師傅同炎冰嘅父母因為解咒之後嘅事，都唔會出到手幫你。今次，真真正正得你一個人面對。」
 
聽到這邊，我大概了解天命叔所擔心的事。
 




「一個人咪一個人囉，無事嘅。」
 
「你應該知道，離你畢業愈近，危險嘅程度會越高。況且，今次呢支卦，只係衝住你而嚟，你避開咗就可以，唔會影響其他人。」
 
聽到這邊，我也略為猶豫了一下，畢竟只要稍為容忍一個月左右，就能避過此劫，而且亦不會影響到其他人，似乎很值得考慮。
 
「七年。」
 
「吓？咩七年？」
 
「由我中一開始，經歷過各式各樣嘅怪事，已經有七年。我逃避過，懦弱過，怕死過，但我至少仲生存緊。避得一次，避唔到第二次第三次，如果我真係過唔到三年後嘅一劫，呢段時間就我最後嘅日子，我要好好咁過一啲想過嘅日子。」
 
我雖然怕死，但更怕到死時才後悔沒有盡力生活過，我不想再給自己任何藉口去浪費生命。
 
「小詠，我都同你講咗佢唔會聽㗎啦。」




 
「小詠？小詠佢喺你嗰邊咩？佢依家點呀？」
 
「佢梗係喺度啦，佢之前失去咗大部份力量，依家仲閉緊關，努力恢復緊佢嘅力量，希望可以趕得切之後返嚟幫你。你唔駛擔心佢，擔心下你自己好過啦，既然你決定咗，我只能夠提醒你，小心晨星。」
 
「晨星？」
 
「我能夠提嘅係咁多啦，你自己再參透下啦。」
 
「吓？得一句咋？整多幾句好喎。」
 
「你個死仔包啱啱咪好威嘅，無啦，就係得一句咋。要我補多句嘅話就係，唔好死啦吓。收線啦，有咩事我會再打返嚟㗎啦，係咁。」
 
「喂！喂喂！唔交低啲秘笈都起碼講聲點搵到你呀，頂你個肺。」
 




掛線後，我便重新打坐，思考着天命叔的話。
 
「小心晨星，乜鬼嘢晨星呀，咁鬼玄。唉，唔諗啦，有咩事再算啦。」
 
等到差不多到達迎新日的集合時間，我便結束打坐，起行前往位於九龍塘的大學學府。
 
直到我離開道堂前，炎冰還是沒有出現。