[陳子鋒系列] 大學入學篇: （七）O-Day（1）

「點呀，搵唔搵到天命叔呀？」我在天命道堂裡邊打坐邊向炎冰提問。
 
「仲係搵唔到，可能佢又去咗啲無咩人嘅地方。」炎冰搖了搖頭。
 
「個大叔成日神出鬼沒，之前帶住小詠去咗修行，點知去救你阿爸阿媽嗰陣佢無啦啦又出現。好啦，諗住問下佢同小詠嘅情況啦，又粒聲唔出咁走咗去。」
 
「算啦，我諗天命叔會有佢嘅打算，同埋佢應該有睇實我哋，如果唔係無理由我哋上次去台灣搵我父母，一有危險佢就現身。」
 
「講係咁講啫，同我哋講聲有幾難啫，佢衰到連天賜都唔聯絡。仲有，上次佢出現，我都唔見小詠有跟住佢，唔知小詠依家點呢？」
 




想到小詠之前因為幫助天命叔和我，失去了大部份力量，我便一直擔心他的狀況，而且我和小詠之間的連結已經切斷，無法再像以往一樣感受到對方的存在。
 
「你唔好諗啦，我咪講咗天命叔應該有自己嘅打算，小詠跟住佢唔會有事，你顧下自己好過啦。」
 
「唓，我有咩好顧啫，咪又係起身食飯行街睇戲同打機，都不知過得幾爽。」
 
事實上經歷過無數次死裡逃生後，我每天都會抽時間打坐和學習新的道術，但不知道是否習慣了從天命叔身上觀察並偷學他的道術，從典籍中學習甚為困難。
 
「得啦得啦，繼續吹，繼續吹。」
 




炎冰知道我學習道術方面有點停滯不前，於是每星期也會抽空陪我練習，她亦可從中提升自己的能力，一舉兩得。
 
「話時話，上次你咪話大學嗰邊啲結界有問題嘅，之後有無發生啲咩事。」
 
「你仲好講，我都話係你問題㗎啦，你離開咗學校之後，成間學校即刻靜晒落嚟，唔好話咩古怪，連遊魂都唔見有呀。」
 
聽到這邊，我真的無法反駁，這討厭的體質自從中學後就愈來愈嚴重，除了在天命道堂可以稍作喘息外，基本上每天都上演着與鬼同行的劇情。
 
「係喎，話時話你準備好未？」炎冰突然沒頭沒腦地問。
 




「吓？準備？準備啲咩？」
 
「吓？O-day呀，迎新日呀，你上次報咗迎新營，通常之前會有一日畀你哋互相認識下先，你唔係唔記得咗呀？」
 
「有啲咁嘅事咩？」
 
我邊說邊查看從大學帶回來的文件，發現真的有迎新日這回事。
 
「咦，聽日就係？」
 
「聽日？無理由㗎，正常應該會有人聯絡你先啱，無理由到依家都無收到通知㗎？」
 
「你望住我做咩啫，我點......咦......好似呢幾日，有個陌生電話一直打嚟，我連留言都無聽......」
 
「唉，你個白痴，快啲聽啦，九成九係啲組爸組媽聯絡你啦。」（注：2007年即時通訊軟件仍未盛行，智能電話也仍未十分普及）




 
我接通到留言信箱，打開了擴音。
 
「你有五則留言，第一則留言......」
 
炎冰聽到後，白眼差點反到上額頭。
 
「你好呀，請問係咪陳子鋒同學，我叫Judy，係你迎新營嘅組媽呀，因為我哋一個禮拜後有迎新日，想睇下你會唔會參加。你方便嘅話打返畀我啦，我電話係9251......」
 
之前的四則留言，除了一則是垃圾訊息外，其他都是名為Judy的女生來電。
 
「我真係服咗你，快啲覆返人你去定唔去啦。」
 
「做咩啫，依家覆囉，不過我唔明，我去個迎新日啫，駛唔駛咁緊張？」
 




「其他人去迎新梗係無問題啦，但你知你咩身世㗎啦，你去大學做個登記都搞到一鑊粥，我真係唔知你去迎新日會搞成點。而且，到時又係會有一大班新生，我有預感會有事情發生。」
 
炎冰回想起當日新生登記時，有個奇怪的女生盯上了我，雖然最後沒有發生甚麼事情，但實在不能不小心一點。
 
「你唔好又預感啦，次次啲衰嘢都中。」
 
我回想起以往跟炎冰的經歷，十次有十一次都會有怪事發生，那已經不是預感，而是預言了。
 
「你咪鬼嘈啦，你驚嘅就唔好去！」
 
「唔得，我畀咗錢㗎。同埋，我仲要喺度過三年，如果一有事就退縮，我仲點樣過完呢三年。」
 
下定決心後，我便致電回覆Judy，可能真的沒有緣份，這次輪到我留言給她，留言中簡單交代了我會出席後，便跟炎冰商討要預先準備的事情，希望一切能順利吧。