[陳子鋒系列] 大學入學篇: （十二）拉斐爾與炎冰（1）

在大學新生登記後，炎冰在我離開學校後，在大學範圍下了不少功夫。
 
「我讀咗成年明明都無事，條友仔一嚟就搞到呢度啲磁場亂七八糟。」
 
炎冰邊埋怨邊在大學四周奔波着，來到鄰近南山邨出入口位置，確定沒有人在附近後，便拿出了令旗及符咒，準備為結界進行修復。
 
「得你一個咁辛苦？」
 
炎冰聽到一把聲音從背後傳來，不禁嚇了一跳，分明已經確認過四周的情況，而且她亦一直有所戒備，但竟然有人能在她不察覺的情況下靠到她背後，絕不是甚麼等閒之輩。
 




於是在回頭的同時，運起劍指便向後方刺了過去。
 
「冷靜啲，係我，拉斐爾。」
 
拉斐爾擋下炎冰的劍指，並臉帶微笑地說。
 
「我就知道係你。」
 
炎冰收回劍指後，便重新開始修復結界，畢竟也不是需要隱瞞阿爾的事情，再說，應該也隱暪不了吧。
 




「駛唔駛我幫手？」
 
「幫手？唔駛啦，我知道呢一套同你哋唔係好夾。你搵我到底咩事？」
 
「嗯，我嚟提醒你啫。同埋，睇下你會唔會勸到陳子鋒，叫佢唔好參加迎新營。」
 
炎冰聽到這邊，不禁眉頭一皺。
 
「你應該知道，無人可以講得掂子鋒。」
 




阿爾聽罷，沉思了一小會，便搖了搖頭。
 
「不過，既然你特登嚟搵我提醒佢，應該都唔係啲咩小事。我姑且問一問，今次又係咩事？」
 
「嗯，喔，嗯嗯......﹞
 
阿爾閉眼沉思，好像十分掙扎。而在他掙扎期間，炎冰已經完成了結界的修復。
 
「我仲要去LT401修復結界，你唔想講嘅我行先啦。」
（*LT401，大學泳池旁的演講室）
 
「等，等等。因為我有受到制約，唔可以好直接講，咦，你頭先話要去邊？」
 
「LT401。」
 




「嗯，咁啱啦，我哋一路行一路講，順便展示畀你親眼睇啲嘢。」
 
炎冰雖然還是感到疑惑，但想着既然目的地一樣，也就和阿爾一起向LT401移動。
 
「黃炎冰，你有無聽過晨星？」
 
「晨星？你係指天上嘅星星？」
 
「嗯，佢都可以算係天上嘅星星，但我唔係想講呢種星星。」
 
面對着欲言又止的阿爾，炎冰稍為分析了一下。
 
「唔通，你係指啟明星 - 路西法？」
 
阿爾沒有回應，但臉上露出了笑容。




 
「晨星，本來係天上最閃耀嘅星星，我同加百......我嘅朋友，都好鍾意晨星嘅光芒，佢嘅光芒雖然傲慢，傲慢到想掩蓋其它嘅星星，但佢嘅光芒，真係好靚。只可惜，唔知幾時開始，晨星嘅光芒變弱......唔係，係變得奇怪、扭曲、不純粹，而且，變得極為危險！」
 
阿爾和炎冰已經來到LT401的前方，炎冰本打算進入LT401先處理結界的部份，但阿爾卻阻止了炎冰。
 
「我啱啱，咪話要畀你親眼見識嘅。」
 
阿爾話音剛落，四周的景物突然變得扭曲，本應還是白晝的天空，突然變得漆黑一片，而在漆黑的夜空中，卻有一顆黑色的星星，發出一陣奇異的光芒。
 
炎冰不期然盯着星星，才不過五秒的時間，炎冰突然感到體內莫名的燥動，五臟六腑好像在翻騰着一樣。
 
「冷靜，深呼吸，唔好被佢嘅光芒影響，想像下陽光嘅模樣。」
 
在阿爾的提醒下，炎冰調整呼吸，加上降伏心魔指印，那種不舒服的感覺終於消失。
 




「到底咩事？呢個就係晨星？」
 
「正確嚟講，係不完全嘅晨星。」
 
「咩話！」
 
炎冰着實嚇了一跳，若然這狀態是不完全，實在無法想像變得完整的晨星會帶來甚麼樣的影響。
 
「呢個，就係陳子鋒，今次要面對嘅試煉。」
 
炎冰聽到後，心裡只有一個念頭，又是陳子鋒闖的禍。