[陳子鋒系列] 大學入學篇: （十三）拉斐爾與炎冰（2）

「好強嘅邪氣。」
 
炎冰看着星空上的黑色星星，不舒服的感覺雖然消失，但心中總是有一種燥動感驅之不散，仿佛只要稍為放鬆，人就會變得瘋狂。
 
「本來，晨星嘅光芒唔應該係咁。」
 
阿爾的語氣帶着一絲感慨。
 
「唔得，我個腦就嚟轉唔到，雖然我有好多嘢想問，但我唔知點問，亦唔知你邊啲答得。你可以簡單話我知到底發生咩事？」
 




阿爾沉默良久後，像是下定決心似的。
 
「黃炎冰，既然你同陳子鋒扯上關係，我相信你已經了解到陳子鋒體內嘅邪惡。嗰個，係所有邪惡嘅起點。」
 
「先唔反駁你扯上關係嘅部份，子鋒嘅事我略知一二。」
 
「神雖然全知全能，但係正因為全知全能，先可以做到持平，絕對嘅持平。縱使係邪惡，只要未出手，佢就只係一個普通嘅存在。亦因為咁樣，喺創世後嘅漫長時間入面，反抗神嘅勢力一而再，再而三咁出現。而當中，晨星嘅背叛，係我有記憶而嚟，其中最為慘痛嘅一次。」
 
「但據我所知，晨星喺聖經入面，並無頻繁出現，對佢嘅描述亦只係短短幾句。而且，要講最慘痛嘅經歷，我以為你會話係受傷嘅嗰次添。」
（請參閱：澳門旅遊之陰魂不散的傳教士 彩蛋三：裏 創世記 － 亞當、夏娃與蛇）




 
「受傷嘅原因，係因為意想不到嘅突襲。但如果要講慘痛，一定係晨星嘅背叛，而之所以無喺聖經嘅出現，係因為被刪除咗。」
 
炎冰露出驚訝的表情，畢竟這不是普通的書籍，而是一教之本，很難想像會有人對其動手腳。
 
「可能我用字唔係咁好，本身呢段歷史係有寫入去嘅，只係喺製作成書之前出現咗意外，部份嘅章節受到破壞，其中一段就係描述晨星嘅事，仲有好多零零碎碎嘅部份，當時製作嘅人無辦法修復失去嘅部份，只能夠用仍然存在嘅部份去製作。」
 
聽起來雖然疑點重重，但畢竟這不是炎冰可以插口的話題，故亦識相接受。
 
「唔好意思，有啲離題。晨星嘅背叛之所以慘痛，係因為佢率領咗其他嘅原同伴一齊叛變。可能你會聽過，我哋有七位御前嘅侍奉者，侍奉全能嘅神。」




 
「米迦勒，加百列，烏列爾同埋，你。其他我都唔肯定。」
 
「拉貴爾，沙利葉，雷米爾。但其實，原本仲有一位同米迦勒並列，就係貴為晨星嘅路西法。只可惜，晨星嘅傲慢，令佢忘記佢嘅本份，佢唔願意有任何事或物存在喺佢嘅頭上，包括神。爭鬥持續三日三夜，最終晨星隕歿，我哋亦損兵折將。只係，隕歿的晨星並無被徹底消滅，大概係神嘅仁慈，又或者，傲慢嘅晨星，唔允許自己墜落到最底層。佢一直都積蓄住力量，準備復活。」
 
「歷史就講完啦，但點解會係呢度，點解會係子鋒？」
 
「陳子鋒，作為一個復活嘅容器，係十分之優秀。就算係佢體內已經有另一種邪惡存在，對晨星嚟講根本唔係啲咩問題。本來所謂嘅邪惡，佢哋唔會有所謂合作或互讓嘅概念，有嘅只會係利用或吞併。所以陳子鋒就好似一塊磁石咁，會吸引各式各樣嘅存在接近。至於點解係呢間大學，你有無聽過晨光教？」
 
「晨光教？」
 
炎冰一臉疑惑，大概是第一次聽到。
 
「嗯，未聽過都好正常，佢唔係一個正式嘅教派或組織，在表面嘅世界大概唔會有咩人認識佢。簡單講，佢哋係一班信奉路西法主義嘅狂熱份子。」
 




「聽起嚟好可怕。」
 
炎冰由衷的這樣想，畢竟怪力亂神縱使可怕，亦不及人心的醜陋，而且，聽說宗教上的狂熱份子尤其可怕。
 
「我之所以以教師嘅身份潛入呢間學校，係因為收到消息呢度有晨光教嘅信徒，只可惜過去一年完全無任何發現。不過，當陳子鋒確認會入讀呢間學校之後，一切都唔同咗，晨星開始露出佢嘅獠牙。依家呢度，都係我最近先發現。」
 
「既然你已經知道咗佢哋嘅存在，咁你仲唔出手處理？」
 
「唉，我唔係唔想，只不過當對方無出手，我可以做嘅嘢係有限。但我唔係無準備，我已經安排咗彼得同安德烈入嚟，佢哋會幫手調查同處理。只要陳子鋒佢肯唔出席迎新營，避開今次嘅危機，我相信一年，唔係，半年內，我哋可以處理好晨星嘅事。」
 
「半年，我諗就算只係一個禮拜，佢都唔會應承。」
 
「你一定要想辦法說服佢，以陳子鋒依家嘅力量，唔可能對付到佢。」
 
炎冰看了阿爾一眼，臉上露出了笑意，似乎對阿爾的說法不以為然。




 
「雖然，你哋嘅力量好強大，但會唔會太睇小我哋？」
 
炎冰說話同時，拿出了一道符咒。
 
「破邪咒？」
 
阿爾皺眉看着炎冰將符咒丟向晨星，晨星的光芒變暗淡，然後慢慢消失，扭曲的空間慢慢變回原狀，兩人再次面向LT401。
 
「或者，我哋比你想像嘅更為堅強。」
 
阿爾欲這又止，仿佛找不到合適的詞彙，思考良久後，便對炎冰說。
 
「晨星嘅力量愈嚟愈強，之後唔會咁易應付。」
 




其實炎冰心裡明白，阿爾說的全部都是事實，剛剛炎冰亦只是擺脫了晨星的束縛，而非將其消滅。
 
如果現在的晨星並不完全，再恢復下去，別說消滅，可能連擺脫束縛也做不到。
 
但，要勸說陳子鋒，好像消滅魔鬼還比較輕鬆。