[陳子鋒系列] 大學入學篇: （二十八）米迦勒的提示
「陳子鋒，我知你有自己嘅諗法，唔太想我哋干涉你，不過你要明白，呢件事已經唔係你一個人嘅事，所以阿爾先會不顧後果咁出手。」
「唉，講真，我唔係話唔想你哋出手，我只係唔想再加入邊個邊個嘅陣營，又要守啲唔知咩規矩咁，對我嚟講，平等相處嘅話，所有嘢都有得商量。但如果一定要高高在上咁阻頭阻勢嘅話，我寧願自己一個去面對。」
「我尊重你嘅選擇，同樣地，我都尊重阿爾嘅選擇，所以先會留係度同你講埋以下嘅說話。貝爾菲格嘅事你已經知道咗，但你仲未明白貝爾菲格嘅恐怖之處。」
我聽到米迦勒的說話，回想起與貝爾菲格的戰鬥，要說是否強大，他絕對是一個強大的敵人，但要說是恐怖，路西法及別西卜好像要比他可怕得多。
「貝爾菲格之所以被稱為怠惰，係因為佢嘅出現，會令人變得富有，變得靈巧，變得聰慧。」
「吓？咁唔係好事咩？」
「如果以上嘅變化，係真實嘅，的確對人嚟講會係一件好事。但如果只係夢境，只係錯覺；當人夢醒，察覺到現實之時，虛假的成就會蒙蔽人嘅雙眼，令人相信虛假嘅夢先係現實，從而變得想逃避現實世界，浪費時間追求不存在的夢境，呢個就係怠惰嘅能力。」
聽到米迦勒的說法後，我腦海裡浮現出很大的疑問，就是我在戰鬥時，明顯是掉入了貝爾菲格的陷阱之中，但當中的情景，與其說令我變怠惰，倒不如說是色慾的表現。
想到這裡時，我眼角看到沉沉睡着的炎冰，回想起夢裡的他，臉上變得通紅。
不知道米迦勒是否察覺到我的變化，還是窺視了我的內心，他續說。
「當然，貝爾菲格目的是滿足人類的慾望，令佢哋依賴夢境變得怠惰，所以佢令人沉醉夢中的能力是七大原罪中最犀利嘅。只要你有慾望，唔理你係食慾，性慾定係其他慾望，佢都可以滿足你。而佢之所以能夠透過夢境令人樂而忘返，是因為佢會忠實地反映出人類深處，可能連自己都無察覺到嘅慾望，換言之，夢裡所見的一切，都係造夢者自己最想要嘅嘢，所以基本上無人可以從夢中醒返。」
米迦勒說到這裡時，我感到臉上一片火熱，所以我在與貝爾菲格戰鬥時出現的夢，就是我內心深處最想擁有的願望嗎？
「子鋒，拉斐爾呢？」
我還在胡思亂想之際，炎冰也悠悠醒轉過來，害我差點嚇得叫出聲來。
「佢佢佢被人捉咗返天界啦。」
「吓？天界？咦，你係？」
「我係米迦勒，我為阿爾啱啱對你做嘅嘢講聲對唔住。正如陳子鋒所講，阿爾因為打破規定，唔單止解除咗力量嘅限制，仲對普通人出手，就連命運之矛嘅複製品都用埋，我哋已經將佢帶返天界，佢暫時應該返唔到嚟。」
「吓？咁晨光會嘅事......」
「呢層你唔駛擔心，阿爾臨走有同我講，佢已經交代咗十一位門徒去處理。」
「原來係咁，但點解......」
炎冰看着面前的米迦勒，似乎不清楚他在此的目的。
「我只係嚟幫手提醒你哋啫，之前講嘅就唔重覆啦，你再問陳子鋒啦。接落嚟我要講嘅係，貝爾菲格會用咩方式對付你哋。由於貝爾菲格將全部人都視為敵人，所以佢無任何盟友，連手下都唔會有，取而代之嘅係，佢會以操控生物嘅方式去幫佢做嘢。你要有心理準備，你接落嚟嘅對手，除咗貝爾菲格，仲可能係你身邊嘅任何人。」
說到這邊，我又想到迎新營大概是那傢伙復活的時間，亦是他會選擇對付我的日子，如果他在那個時候把人都操控了，那我不就要面對百多二百人，而且還要綁手綁腳般不能傷到那些人，想到這邊頭都痛了。
「另外，除咗貝爾菲格，陳子鋒你要小心身邊嘅猶大。」
「猶大？佢唔係喺澳門已經......」
「正如十一位門徒一樣，佢哋都只係繼承咗前人嘅本質，而當中猶大嘅背叛係最大嘅特質，無論對你嚟講有幾密切都好，佢都有可能係猶大嘅化身，摧毀你嘅一切。耶穌可以復活，但陳子鋒你只有一條命，好好保護自己。」
「貝爾菲格已經令人頭痛，已經仲要對付其他普通人，仲要驚猶大嘅襲擊，不如你都係收我做第十二位門徒算啦。」
「陳子鋒，機會無咗就係無咗，同埋，呢個都唔係你嘅真心話，所以，你都係乖乖地接受你嘅命運。喔，差啲唔記得，門徒石同命運之矛複製品，門徒石對你嚟講係無意義嘅，但阿爾畀得你嘅話，都係好好帶喺身邊啦。另外，命運之矛，阿爾已經講咗最重要嘅部份，既是死，亦是生，記住佢對你有好處，當然，如果用唔着就最好啦。好啦，我要交代嘅嘢都差唔多啦，彼德同安德烈我就帶走啦。」
「咪住，答我最後一個問題，如果貝爾菲格完全復活，依家嘅我有無可能對付佢？」
「陳子鋒，你覺得天使惡魔同人類真係可以比較咩？如果唔係有世界嘅法則規範住我哋，人類根本無可能觸碰到我哋。如果貝爾菲格完全復活，以你依家嘅能力，贏嘅機會係零！不過阿爾既然選擇相信你，你就即管掙扎到底，證明畀我睇，我嘅諗法係錯嘅。如果失敗咗，我哋自然會出手，到時候就唔係你哋可以插手嘅時候。」
米迦勒話畢，便抱着彼德和安德烈從兩人眼前消失。
「唔似你喎，做咩會問埋啲咁嘅嘢，你唔係咩都唔驚嘅咩？」
「知己知彼啫，都唔係第一次被人睇死㗎啦。呀，係喎，你之前都被貝爾菲格襲擊，有無被佢帶入夢境度？」
「夢？無喎，之前我同阿爾一齊，而且佢目標係你，所以好快就被我哋擊退咗。做咩你會咁問？」
「無，無咩，八卦問下咋嘛。」
「奇奇怪怪咁。」
我無視了黃炎冰的疑惑，硬是把話題帶回對付貝爾菲格的事情上，我倆決定在迎新營到來前，嘗試找出貝爾菲格，希望能在迎新營前將事情解決。