[陳子鋒系列] 大學入學篇: （二十九）迎新營 - 前夕

在與拉斐爾與米迦勒碰面後，了解到自己能力不足，只好回到天命道堂繼續修行。
 
但說真的，不到一個月的時間，修行也不會有很大的幫助，頂多令我對道術的運用更加熟練而已。
 
而同一時間，我和炎冰亦嘗試在校園內尋找有關貝爾菲格的痕跡，只是完全沒有任何發現。
 
另外有關晨光會的部份，雖然有跟彼德和安德烈聯繫，但得到的資訊都是在處理中。
 
我愈是希望事情有所進展就愈是不順利，時間就這樣一直流走，到了迎新營前一天都沒有任何好消息。
 




「拉斐爾，唔好望啦，你應該知道佢哋只係浪費時間，貝爾菲格喺完全恢復之前係唔會被佢哋發現。」
 
「米迦勒，道理我明白，但我被禁足喺呢度都無咩嘢做，咪睇下佢哋有咩進展囉。係呢，晨光會嘅事進行成點？」
 
「十一位門徒已經令大部份晨光教嘅教徒了解到事實，佢哋基本上都脫離咗晨光教，但仍然有少部份忠實嘅信徒，喺一個外國祭師嘅帶領底下，避開晒所有外來嘅資訊。而且佢哋全部都秘密行事，好難接觸到佢哋，短時間內應該無辦法瓦解佢哋。」
 
「啫係貝爾菲格應該會成功復活？」
 
「機會好大，不過呢個都係預計之內嘅事，你應該好明白有啲嘢唔係可以咁易改變。」
 




「道理我都明白，或者好似陳子鋒咁講，我好似愈嚟愈人性化。」
 
「好事？」
 
「唔知道，至少今次嚟講唔知係好定壞事。本來貝爾菲格復活，打破規則對付陳子鋒嘅時候，我就可以出手，雖然可以預計陳子鋒會喺生死之間徘徊，但可以救返佢嘅機會好高。而我選擇咗去勸誘陳子鋒，失敗嘅後果令我被禁足，變相就算貝爾菲格打破規則，我都無辦法出手，就算你哋幫手都好，可能已經遲咗。是好是壞，我真係睇唔透。」
 
「但你已經將門徒石同命運之矛交咗畀陳子鋒，你唔係已經相信佢可以靠自己捱過呢次嘅危機咩？」
 
「呢個只係無辦法之中嘅辦法。以人之軀對抗七原罪，本來就係一件唔合理嘅事。」
 




「算啦，事情嚟到呢個地步，你只可以睇住佢進行落去。」
 
「或者，米迦勒你可以......」
 
「呢邊唔係我負責，我唔可以越界，而且，我只會喺有人對神出手嘅時候，先會出面阻止，呢一刻嘅我唔會亂用我嘅力量。」
 
米迦勒拍了拍拉斐爾的肩膀便轉身離開，餘下拉斐爾一人透過天之池繼續觀望着陳子鋒的行動。
 
「唉，都過咗差唔多成個月，乜都做唔到。」
 
我在天命道堂裡看着月曆，抱怨甚麼都沒有做到。
 
「都唔係呀，我見你呢個月同你迎新營班組員玩得好開心呀。」
 
炎冰在邊整理着道堂裡的雜物邊揶揄我。




 
「說話唔可以咁講嘅，我哋分工分得好啫，你負責處理貝爾菲格，我負責處理迎新營入面嘅人際關係，到時迎新營發生咩突發事都好，我都可以有熟人幫手呀嘛。」
 
「係係係，你啱你啱。咁你嘅人際關係搞成點呀？」
 
「還可以啦，不過我哋組個OC唔知搞咩，聽日都迎新營，我哋全部人都未見過佢。」
 
「可能太忙啩。嚟，呢個錦囊畀你嘅。」
 
「錦囊？哇，你都好似維園大叔咁算到我幾時出事呀？」
 
「我無咁犀利，呢個錦囊只係放咗一堆符咒，邊啲有用邊啲無用我都唔肯定，你自己研究下啦。」
 
「唓，咁渣㗎。」
 




「唔要就拎返嚟。」
 
黃炎冰伸手抓向錦囊，幸好我眼明手快，早一步把錦囊收進褲袋裡。
 
「我又無話唔要。」
 
「隨便你，好啦，我返屋企先啦，你今晚都早啲休息，聽日就係迎新營第一日，無人知貝爾菲格幾時會出手。」
 
「好啦，喔，我送你返去啦。」
 
「吓？你係咪有咩問題？平時都唔會講啲咁嘅嘢。」
 
黃炎冰瞪眼看我，仿佛想看穿我在想甚麼似的。
 
其實自從上次從貝爾菲格的夢中逃出來後，我就一直不自覺地對黃炎冰在意起來，但也不是說有甚麼特別意思，就是會多注意他一點點而已。




 
「無，我諗住順路啫。」
 
「吓？邊度順呀？」
 
「唉，無嘢啦，我亂講啫，你返去啦。」
 
「係啦，你返去好好抖下，養精蓄銳，捱過呢一關之後，就可以享受大學生活啦。」
 
「如果之後無咩奇怪事發生就係，好啦，我都返屋企啦。理佢貝爾菲格定路西法，等我一口氣搞掂佢哋。」
 
「好啦，咁我走先啦，聽日見。」
 
我下意識地也回答了「聽日見」，但明天應該見不到才對吧。