自從女神做咗我讀者之後: 考試
話咁快就到7月，當然途中都仲有持續同女神係ig上面傾偈啦，我哋嘅關係都好咗好多。但係本來6月嘅考試因為停課嘅關係所以延遲到7月，而我為咗可以讀到商科亦努力緊。
「喂肥聰，呢題數點計阿？」
我哋好難得開住discord唔係打機而係一齊溫書，事關肥聰都唔想留班，但係佢上學期又考到成pat屎咁，唯有下學期嘅而家努力拉返平均分。
雖然佢文科例如歷史個啲唔好但係其他例如數學個啲都算唔錯，所以我先問佢呢條數。
「咪@）；：（@再+&”（）#；”咁揸架你。係咪掛住溝女唔記得要點計阿？平時你無理由唔識個喎。」
「唉，停課咁耐無操數係咁架啦，喂，phy chem bio又有咩要搵？」
「有）；“（（#-@）+（”；同$（“+！+#阿，仲有（“+$！#：+”唔好唔記得+&（；$+$”（；$」
「屌那星，咁乸多？無計啦，唯有棄車保帥，對唔住啦黃Sir Miss Lee Miss Chan，我都係被逼架，再見chem，再見phy，再見bio，再見理科。」
經歷數小時同問題同埋問題ssssss嘅搏鬥之後，我終於同肥聰講：「唔掂啦，聽日再嚟，我要食飯啦,聽日再溫過。」
「咁好啦，我都要休息下，拜拜。」
就係我忙裏偷閒諗住打機輕鬆下嘅時候，我IG迎來咗一位不速之客。
「菠蘿先生，呢條數好難阿☹️ 我唔識阿，你教下我阿🥺」女神係個msg下面加多張相，而入面有一條數學題，咁啱就係我頭先問肥聰個條。
「哦，都唔係好難阿，咪就係$+”-（；$（_+咁就得架啦。你唔問你學校入面啲同學，走嚟問我咁得意嘅😂」
「我係學校無朋友...」女神竟然話佢學校入面無朋友？但係佢係學校入面好受歡迎個喎🤨
「係咩？係咪因為唔啱傾所以搵唔到朋友阿？定係其他原因？唔介意可以同我講喎，我唔會同其他人講。」
「入面啲人個個都好虛偽，無一個係真心想同我做朋友，每段關係好似都係得返利用嘅價值，所以...我好少主動搵佢哋，廢事人哋覺得我煩啦...」
原來女神都唔係我想像仲咁受歡迎...的確有時識得多人都唔係好事。呢個又傾下個個又傾下，根本冇時間去將一段關係變深，咁又點會識到真心friend呢...
「唔緊要啦，你仲有我架！呢度嘅對話唔會流出去。你咪當你發緊夢囉，一個開口夢啊，呢度嘅對話就係你個開口夢講嘅嘢，講完都唔會對你現實生活有任何影響，所以你絕對絕對可以係呢到暢所欲言。冇論開心定唔開心我都會聽㗎，只要你肯講我就肯聽架啦，我嚟做你個真心fd阿yoyo317。」
「明明你只係一個網友，一個所未謀面嘅陌生人，但係你竟然俾到我日對夜對嘅同學都俾唔到嘅嘢我，真係好多謝你阿菠蘿先生，但係我仲要溫書阿，得閒再傾啦，菠蘿先生。」
望一望個鐘我先發覺原來個時已經唔早，所以我決定早啲訓，唞足精神考好之後嘅試。
--------
「考試完畢，同學可以收拾好自己嘅嘢離開。」監考老師係收完同點完啲卷之後向全班宣佈，我亦即刻鬆一口氣感覺如釋重負。因為今日已經係最後一日考試，而呢一科都係最後一科。
「阿軒，終於考完試囉喎，可以盡情玩啦！」
肥聰係老師一離開個班房就過嚟同我講。
「唉，都唔知考成點，仲要揀科同補課阿，你以為而家真係放暑假咩？」其實我唔止擔心自己,我仲擔心女神佢考成點。內心一直都好想可以繼續同佢同班同讀同一樣嘅科，所以我先成個人心不在焉咁，一直都為呢啲事心掛掛。
「聽日嘅事聽日先算啦，做人邊擔心得咁多嘢架，你簡直就杞人憂天，今晚一於就打通宵，我唔信個排位咁都升唔去！」其實有時有個好似肥聰咁樂觀，咁充滿正能量嘅朋友都唔錯，係就係有時煩啲，但係勝在份人真，同埋唔開心嘅時候又可以氹到你，可能女神正正就係身邊缺少呢啲人，先覺得無朋友。
------
後來成績出咗，結果可以話意料之中，都係唔上唔落，中中間間。其實呢個成績都可以話得來不易，因為我基本上係放棄咗理科，係靠其他科先拉返均勻。
仲有一個對女神嚟講可能係壞消息，但係對我嚟講係好消息嘅消息，就係女神都係入唔到精英班，亦即係我同佢仲有機會同班。
佢係成績公佈個日成個人可以話崩潰咗。
「點解？點解我付出咗咁多時間，日溫夜溫，點解得出嚟都係咁架，唔係有句說話叫一分耕耘，一分收穫嘅咩？點解最尾會變成咁架？我真係唔明...」呢段嘢就係女神係個日係ig度send俾我嚟問我嘅。其實「一分耕耘，一分收穫。」呢樣嘢好錯，因為一分耕耘未必有一分收穫，呢句嘢就係俾咗一個假希望人，相信呢句嘅人最尾點？咪當佢哋發現原來付出同收穫唔係成正比嘅時候，就好似女神咁崩潰囉。當然我唔會咁直接就同女神講「係架，呢個世界係咁唔公平，有啲人唔洗點溫都可以輕鬆攞高分，但係有啲人搏晒命係咁溫係咁溫，最尾都係勉勉強強合格，歡迎理解現實。」
咁我最後點覆佢？咪「係架，一分耕耘未必有一分收穫，但係你唔耕耘，你唔努力，就一定唔收穫。我相信你已經盡力啦，既然件事已經過咗，就由佢停留係過去啦。」唔好話你，我自己都覺得我講嘅嘢好心靈雞湯feel，但係無計啦，我唔識安慰人，唯有講啲標準答案。
------
係暑假嘅某一日
「上帝阿！我知我平時都唔係好虔誠，但都係唔該你保佑我哋3個同班阿，唔該你阿。」
我而家係個電腦面前等緊學校係9點15分公佈選科同分班結果，其實我呢次都好擔心，因為如果同唔到班，我驚我同肥聰就會疏遠，我驚以後無得係一邊望下女神。所以我真係真係好想未來3年同班。
就係我仲幻想緊同唔班嘅結果嘅結果嘅時候。原來已經過咗個個時間。我即係係學校個網頁到禁f5。
由於我唔係入精英班，所以我直接係升F4嘅cd班到搵，陳小明chem phy …何子朗geog acc…
何永聰econ acc 搵到啦！搵到肥聰啦！同班阿！之後就睇下搵唔搵到我同女神個名，黃浩軒 econacc ！我同肥聰同班！剩低個個就係女神…吳美麗va bio 李穎芝 chem bio…. 搵到啦！陳可柔 econ acc 阿！多謝你阿上帝！
係見個結果嘅瞬間，我就打咗電話俾肥聰。
「喂，結果出咗啦，我哋同班同科阿！即係話我哋將來三年都會同班阿！一唔一齊食餐飯慶祝下阿？」
「好阿，但係我要執埋啲樂器先，你去樓下樂記茶餐廳度霸定位先啦，我好快到。」明明而家都同放緊假無分別，都唔知肥聰佢咁勤力練結他同夾band做咩，不過算啦等下佢姐。
「你之前咪話你哋學校今日派分班同選科結果嘅咩？最尾點阿，揀唔揀到？」我問佢係因為想佢知我同佢同科，令佢之後有咩唔識都可以問下我，睇下我解唔解答到佢。
「而家啲人連等佢個兄弟一陣都要做低頭族，係到玩手機，係度溝女，唉，果然我係你心目中都唔係咁重要，你話係咪阿？」肥聰帶住個結他係個次電話嘅60分鐘之後終於到咗樂記。而我個陣咁啱等到煩，所以先攞部手機出嚟，搵一搵女神傾偈。
「收皮啦你，咩原來好快到即係要成個鐘嘅？拿拿聲落柯打仲好啦。」
「講下笑姐，你又唔係唔知我夾band嗰度遠。伙記，我要個常餐A飲凍檸茶阿唔該。」
「我同佢一樣阿。」
「好嘅，馬上到。」好彩而家都差唔多兩點，唔係啲煩忙時段，如果唔係？個伙記唔屌到你走已經算好人。
「今日啲句子都好少人睇...」雖然話唔係咁在乎多定少人睇，但係有時個日會淨係得一兩個人睇，其中有個人可能仲係我用手機睇返再po上ig...不過算啦，因為我知道有女神呢位讀者已經足夠。
「係咁架啦，先唔講你作嘅嘢，紙言呢個平台本身都唔多人睇啦。」肥聰一邊食住腸仔太陽蛋飯一邊答我，其實佢講嘅嘢都啱，可能就係因為咁，女神成為我讀者先變到咁神奇，咁不可思議。
「你知唔知黃可柔都同我哋同班同科阿。」係我講完呢句嘅時候，肥聰即刻停止食佢嘅常餐a，變做一個目瞪口呆嘅狀態。
「可…可…可…柔bb同我…我…我…哋同班？我哋？真係我哋？你有無睇錯？」
「係阿可可可柔同我哋同班阿，你洗唔洗咁大反應阿，陳可柔姐。」講係咁講，但係諷刺嘅係，當我知道果陣嘅反應都同佢差唔多。
「你唔明架啦，佢就好似一個活活生嘅動漫角色，你話佢肯cosplay嘅話幾好呢。果然今日真係好值得慶祝，伙記！要多隻炸雞翼阿！」
本身諗住叫佢食少啲，不過既然今日開心就算啦。
就係我行緊返去屋企既時候，我終於收到女神既回覆。
「最尾都揀到econ同acc阿，至於分到咩班呢啲嘢我已經唔係咁在乎，反正個個都係利用我，都無一個係真心嘅，次次一需要佢哋嘅時候都唔知走晒去邊，每個都無你咁好阿，咁你又揀到咩科？」
「同你一樣阿，以後有咩都可以問我阿，如果我識嘅話😂。」
「好阿，咁以後就多多指教啦，菠仔💛」冇錯，女神係叫我菠仔。點解佢會叫我菠仔，其實係因為女神唔想次次都打菠蘿先生咁麻煩，所以佢就係菠蘿先生呢4隻字到改花名,有：菠菠、菠仔、菠兒……雖然係好似好close咁，但係呢種close都只限於「菠蘿先生」同「yoyo317」呢兩個IG ac，而唔係「黃浩軒」同「陳可柔」呢兩個現實中嘅人。明明網上好fd好fd ，咩都可以傾，但係現實又嘢都唔講多句，呢種感覺真係好矛盾…每次一諗到咁，我就會好sad，好灰，感覺好似都係同佢無熟悉過咁，因為我哋兩個現實生活中根本就無交接。