自從女神做咗我讀者之後: 誰才是救美的英雄

「衝阿，殺阿，喂！你條pk做咩唔郁阿？」就係我同肥聰打緊團，諗住大殺四方嘅時候，我個鍵盤壞咗… 

「唔係阿聰哥，我個鍵盤壞l咗無反應阿。」 

「你條pk又係累事嘅，明明叫咗你買個好啲，阿你又唔肯，而家你成碌柱棟係度你開心啦，滿意啦，而家咁仲點玩阿，阿軒哥你教我啦，點玩阿，嚟啦教我啦。」原本諗住買個平平哋嘅抵用啲，點知平嘢無好嘢，就係我來回重新插個usb幾次都係失敗之後，我決定去深水埗黃金買個新鍵盤算。 

「那有錢阿你老母，個個都用垃圾鍵盤，唔通個個都想用垃圾鍵盤咩？我去深水埗買鍵盤阿，遲啲或者聽日再打過啦。」 

就係咁我去咗黃金買鍵盤 



「呢個好似幾好，咦？個個又幾好喎，呢個有led添。咁多軸嘅？有紅有青有啡，揀邊個好呢？定係買返之前個啲文書鍵盤算？」係面對面前林林總總嘅鍵盤嘅時候，我做唔到決定，於是… 

我決定去問店員佢哋賣得最好係邊個咁我就買邊個，於是個店員指咗個鍵盤俾我，咁我就俾完錢就走人。 

就係我決定搭車去樂記買下午茶返屋企食嘅時候 

我見到一個著黑色背心藍色牛仔褲紋晒身嘅金毛mk係一個角落到聊一個著t-shirt熱褲嘅女仔，但係我見個女仔又好似唔係佢女朋友咁，因為個女仔嘅表情都好似好唔情願咁，於是我就行埋去聽下佢哋講咩。 

「靚女,一個人阿？陪哥哥去食餐飯阿，你唔想咁快食都ok個喎，你俾你聯絡我阿，我哋到時再約都ok個喎。」 



死mk咁無賴用啲咁低級嘅招聊女仔都有嘅。就係我係心入面講緊呢句嘅時候，我睇清楚啲個女仔，原來佢係可柔！ 

係呢個時候，我更加深信佢哋唔係啲情侶係到玩，而係一個女仔俾一個mk纏繞住，因為我覺得可柔係唔會做呢啲人嘅女朋友。我當時候諗住見義勇為上去做架兩，但係見到個mk仔紋晒身咁，我就覺得佢唔係啲善男信女，分分鐘仲係出嚟行嘅添，呢個時候我就協啦。 

「可柔應該走到嘅，佢求其俾個電話敷衍個mk就得架啦，當睇唔到拿拿聲搭車買外賣返屋企打機啦。」 

「你咁樣同其他行人有咩分別阿，你咁冷漠走咗去，可柔著成咁，咁惹火，分分鐘俾個mk溶咗個喎。」 

就係我腦海中嘅魔鬼同天使交戰緊時候，我見到個mk仔好似想侵犯女神，我又見到女神個無助希望有人見到然後伸出援手嘅樣，我就決定上去拯救女神。 



「bb sorry阿我揀耐咗。你啱先話去個廁所你搞掂未阿？搞掂就行啦，我哋去睇衫啦。」 

呢個時候我見到個mk仔係睥我，我就望一望個mk仔之後又望返女神。 

「係喎，你哋啱先好似傾緊偈喎，呢個係bb你嘅朋友阿？之前未見過佢嘅？無阻住你哋阿麻？你哋傾完未阿？」 

個mk仔可能都無癮，諗住放棄。 

「死臭雞，有條仔又唔早講，係度又講嘢細聲到蚊叫咁，仲有阿，你著到咁唔係為咗姣仔都唔知為咩。係度晒我時間」佢想走，但係啱先佢個翻說話已經激嬲咗我「先生！首先佢唔係雞，更加唔係你講嘅臭雞，佢係我女朋友，唔該你尊重返佢，其次我女朋友靚就鍾意著咩就著咩架啦，佢有自由亦都有本錢著，我唔知你係妒忌我有個咁靚爆鏡嘅女朋友定點，同埋以你咁樣嘅性格唔怪之得要咁樣周圍撩女仔啦。」 

呢個時候個mk仔就好嬲咁走咗啦。 

「好彩我係度揸，你又會一個女仔嚟啲咁嘅地方嘅？」 

「其實我唔係一個人嚟…」 



呢個時候我係遠處見到一個高大，黑黑實實有啲肌肉嘅男仔，一睇就知係充滿陽光，係夏天雜誌封面出現嘅男仔出現啦 

「bb，我揀耐咗，有無悶親你阿？」咦？點解咁似曾相識嘅？ 

「無阿，你啱先應承咗我等陣去西九行街架，快啲去囉」 

「呢個唔係唔係你朋友咩？你哋啱先傾緊個喎。」好似邊度見過… 

「無阿，我哋傾完架啦，快啲去啦，我想去食嘢阿。」 

「咁急做咩喎，招呼都未打，你好阿，我叫Michael，係阿柔嘅男朋友，nice to meet you。」 

「你…你…好，你叫我阿軒得架啦…」 



「打完就快啲行啦，我好肚餓啦。」呢個時候女神好似做咗口勢，如果我無估錯應該係「唔該晒」同「thank you」。 

「得啦得啦，成日都咁為食嘅你。拜拜啦阿軒。」Michael係俾女神扯住一條手嘅情況下講完就走咗。 

「拜…拜…」剩低我一個人係原地無力咁揮手。