《十七歲嗰年，我做咗Miss隻兵》: 第六章（4）
過了一會兒，Miss Lam拿了一鍋盛滿辣椒、花椒八角和雞肉的鍋放到墊了布的桌面上，拿開鍋蓋的那刻，熱霧裊裊升起，香氣瞬間蒸進阿祖的鼻孔，走近一看，那份椒麻香更是吸引得口腔忍不住分泌出口水來。
然而，當他拿出筷子準備偷吃時，Miss Lam卻護住了那煲宮煲雞丁，說：「咪食住先！」
「你都炒好菜，又拎埋碗筷，咁都未食得？」
「你唔好咁心急，等多陣先啦。」
Miss Lam從廚櫃拿出兩個長方形的透明飯盒。飯盒分了兩個部分，Miss Lam先盛了些飯和西蘭花在左邊，然後把宮堡雞丁放在右邊那格。
「哇，咁好，準備埋我聽日嘅午餐添呀。」阿祖高興地說道。
「Sorry喎，無你份。」
「吓，咁你又用兩個盒？」阿祖的笑容瞬間凋謝。
「嗰盒唔係比你架，年輕人，不要想太多。」Miss Lam把蓋子蓋上，續說：「OK，可以食啦。」
「咁係比邊個？」
「唔話你知呀。」Miss Lam把一塊雞肉放進口裏，滿足地說：「哇，好好食，估唔到咁耐無整都咁好食。」
「你唔好話我知係準備比Leung Sir食呀？」
「就算係咁又點？」Miss Lam不耐煩地說。
「點解要整比佢食？」
「咁佢上次幫咗我呀嘛，當報答佢囉。」說罷，Miss Lam又吃了口香脆而麻辣的雞塊。
在Miss Lam眼中是小事一樁，可在阿祖眼中，卻像獵物明明已握在手中，卻要與人共享。
「唔得喎，咁我唔食啦。」阿祖像小孩一樣耍脾氣地說道。
「喔，咁你唔好食，我食埋佢。」沒想到，Miss Lam對此毫無反應，繼續自顧自地吃着，露出心滿意足的表情。
看着Miss Lam這滿足的樣子，加上已餓得咕咕作響的肚子，阿祖還是屈服了，夾了一塊雞肉放進口。
雞塊被炒得非常脆而不老，加上花椒八角的麻香和干辣椒，還有炸過的蒜蓉、芝麻、其他他無法分辨的調味料⋯⋯味道豐富卻又不會太複雜，使他忍不住一夾再夾。
「又話唔食？」Miss Lam得戚地說。
「吓，我唔知你講咩喎。」阿祖夾了幾塊雞肉，配上一大口白飯，好像能明白Miss Lam的滿足，又說：「不如你裝多兜比我聽日做Lunch呀，我可以慳返啲飯錢。」
「好呀，100蚊。」
「哇，你唔好去搶？」
「講笑咋，裝比你唔係問題，但萬一比人見到我地食一樣嘅飯盒咁點算？」心思細密的Miss Lam問道。
「喂，你係教員室食，我係課室食，邊個會知呀？」Miss Lam還是猶豫，阿祖又說：「唔該你啦，慳得一蚊得一蚊呀。」
「唉，怕咗你，好啦，但你聽日千祈唔好比人見到你個飯盒呀吓。」
「得啦，長氣。」
於是Miss Lam又從廚櫃拿出一個盒子來替阿祖盛飯菜。
「睇唔出你煮野食都⋯⋯幾好食喎，邊個教你整架？」阿祖吃着說。
「細個睇呀媽整得多咪識。」
「咁你仲識整咩餸？」
「好多架喎，仲有水煮魚啦，涼拌雞絲粉皮、麻婆豆腐，仲有⋯⋯」
「麻婆豆腐，我都識整喎。」阿祖自信地說。
「你一定無我整得咁好食。」Miss Lam也不甘認輸地說。
「係咪架？你講到天花龍鳳都得架啦。」
明明你依家就食得咁滋味，都好質疑我？Miss Lam心想，說：「好呀，咁聽晚一於一人整一碟，睇下邊個好食啲！」
「好呀，驚你呀！」阿祖昂着頭回應道。
在這小房子裏，雖然沒有阿祖專屬的位置，這也不是他的家，卻給了他一種比家更溫暖的感覺。
是因為她的住家飯，還是她的笑容？他不知道，只知道如果可以，他願意永遠睡在那張軟得會使他腰骨酸痛的沙發，陪她去逛超市，拿沉甸甸的餸菜，被她威脅不做功課就趕他出門⋯⋯但他清楚知道這一切都有期限，終有一天他要把這短暫借來的幸福還回去，——她不再可憐他，或他不再需要她可憐的時候。
「咦，你都食三文治呀。」Leung Sir說，手上正拿着夾了蕃茄、生菜、火腿和雞蛋的雜匯三文治問道。
「係呀，今朝起得切身咪整囉。」Miss Lam呷了一口豆漿說。
「你個三文治咁特別嘅，中間綠色嘅係咩黎架？」Leung Sir盯着Miss Lam手上的三文治問道。
「牛油果囉，我仲加咗少少蛋碎同沙律醬係裏面添。」
「牛油果？我未試過喎，我嗰個都係今朝親手整，好足料架，不如交換半份試下呀。」
「可以呀。呀！差啲唔記得，你今日有無帶飯盒？」Miss Lam問道。
呃⋯⋯你咁問係想我答有定無呢？Leung Sir心想，猶豫了幾秒才說：「無呀，做咩？」
「咁就啱啦，我整多咗個飯盒，諗住順便多謝你上次幫我，我反而仲整污糟你咗件衫。我擺咗係Pantry左邊個雪櫃，面頭貼住張寫咗我名嘅Memo，你叮返熱就食得架啦。」
「哇，咁好！但其實我嗰日都只係順便，你唔洗咁客氣喎。」Leung Sir按捺着內心的歡喜，客套地說。
「我都係順便整多份姐，你唔好覺得難食就真。話時話，你個三文治好好食，由其係塊方包，又厚又鬆軟，你邊到買架？」
「真係架？我自己整架。」Leung Sir沾沾自喜道。
「哇，好犀利呀你，點整架你？咁鬆⋯⋯」Miss Lam未說完，Leung Sir竟打斷她，說：「你琴晚唔係已經為咗份筆記做到好夜啦咩，做咩你呀頭塊面咁窿嘅。」
Miss Lam順着Leung Sir的目光看過去，發現Miss Chan正朝自己的座位走來。
「Miss Lam呀，你記得今日要睇堂呀可？」Miss Chan問道。
Miss Lam連忙咽下口中的雜匯三文治，惶惑地問道：「呃⋯⋯唔係後日咩？」
「後日我同你都有堂，我無可能約你後日架喎，應該係今日先啱。」
「但⋯⋯你琴日真係講大後日⋯⋯」Miss Lam為難地說。
「姐係你今日未Ready？咁就弊啦，今朝咁啱撞到校長，佢話想睇下新老師堂，我仲話好添。」
吓，咁點算？Miss Lam心想，一時不知作何回應，只繼續為難地看着Miss Chan。
「咁唯有再約過啦。」Miss Chan沒想過Leung Sir會搭嘴，但經驗老到的她還是很快反應過來，說：「其實我真係無所謂，再下星期，又或者下個月先睇我都OK，但校長唔係呀嘛，佢咁忙，都唔知佢仲有邊日得閒，佢仲要講明新老師要睇兩次堂喎，Miss Lam你今日真係唔得呀？其實好似平時咁就得架啦，唔洗準備啲咩特別野架喎。」
Miss Lam微笑，腦子還在糾結。
這時Miss Chan又補刀，說：「我驚影響你下年續約咋，有睇好過無睇過呀嘛。」
「但如⋯⋯」Leung Sir想替Miss Lam說話，Miss Lam卻說：「好呀，我一陣去準備下。」
「咁就太好啦，唔該晒你呀Miss Lam。」Miss Chan說，微笑得雙眼快要合成一條縫。
待Miss Chan身影遠去，Leung Sir才說：「佢咁賤，你做咩應承佢？」
「閻王要你三更死，不得留人到五更，我有得揀咩？」Miss Lam無奈地說，把三文治狼吞虎咽進肚子後，便從書架拿起教科書趕往課室準備。