《十七歲嗰年，我做咗Miss隻兵》: 第六章（5）

「起立。」Miss Lam站在教師桌前叫道。

         平日的Miss Lam不大喜歡擺老師架子，所以很少要學生起立，加上這是早上第一節課，學生還未清醒，學生的動作極度遲緩，讓Miss Lam本來已很是緊張的心情更雪上加霜。

         終於，同學都起立了，Miss Lam續說：「今日有Miss Chan同校長黎同我地一齊上堂，大家同校長同Miss Chan打招呼先。」

「Miss Chan早晨。」只有零星的敬禮聲，讓Miss Lam很是尷尬。

「各位同學早晨。」Miss Chan說道，臉上仍掛着那抹微笑。



「校長早晨。」敬禮聲一樣微弱，若只聽聲音，大概會以為課室只有三，兩個學生。

Miss Lam沒想到學生對校長的禮貌不僅沒有改善，反更是冷淡，教她更是不安。

「各位同學早晨。」校長說，微笑時幾乎要擠爆臉頰的肥肉。

「Miss Lam早晨。」然而，當對Miss Lam打招咪時，由於有了阿祖和肥仔文的聲音，頓時響亮不少，與方才形成強烈對比，也不知是好事還是壞事。

「各位同學早晨，坐低，拎你上一堂嘅筆記出黎。上一次我叫咗你地返去做筆記第6頁嘅填充。」



「有無人未做？未做嘅企起身。」Miss Lam其實很想這樣說，但她知道班上會做功課的人才是小數，若她真這樣說，大概大半班都需站起來，場面定很難看，便把說話換成了：「我依家比5分鐘時間你地同隔離位互相檢查大家嘅答案，如果有唔識或者答案唔一樣嘅，都可以趁依5分鐘時間討論下，一齊搵個正確答案出黎。」說罷，她按響了掛在黑板的計時器。

接着，校長從後排的座位站了起來，到處巡視學生的筆記，邊看邊搖頭。

「咇咇咇！」五分鐘過去，計時器響起。

「好啦，時間夠，好，第一條橫線應該填咩？」

「香港嘅政治制度應該係三權分立。」學霸子傑說。



「無錯⋯⋯」看着手上教師版的筆記，竟與自己本來製作的有所不同，竟由「三權分立」變成了「行政主導」，本來的「公民抗命」、「雨傘革命」、「反修例事件」都通通被刪去。

點解會咁嘅？Miss Lam驚訝，抬頭看着Miss Chan，她卻頭也不抬地看着手上的觀課評分紙。

她好像突然明白校長為甚麼堅持要這天來觀課了，不是因為Miss Chan的推波助瀾，而是故意要殺她一個措手不及，因為他們要看清楚她是教師還是教畜。

         明明三權分立才正確，難道要身為教師的她睜着眼睛說謊嗎？其身不正，又何以教學生做個誠實正直的人？

         然而，一子錯滿盤皆落索，只要她說錯一句話，就可以馬上被釘牌，每個月唐三樓的租金、兩老的家用、已付了多年錢的保險、買樓的計劃⋯⋯通通都要泡湯。

         理想有價，只是她沒想到是這麼沉重。

當Miss Lam正掙扎時，目光剛好對上校長嚴厲的眼神，在等待她作出抉擇。

Miss Lam環視了整個課室一圈，看着平日都只會伏在桌上睡覺的學生，今天竟都坐直了身子，有的還炯炯有神地看着自己，尤其是那幾位少數勤力讀書的同學，正手執原子筆等待她的答案。



她始終無法違背自己的良心。

「答案應該係⋯⋯」

然而，當Miss Lam快要說出答案時，班上一位內地來的學生卻打斷了她，說：「唔係喎，前幾日電視先講完，係行政主導先啱喎Miss。」

這句話再一次打亂了Miss Lam的思緒，像是在水中浮沉多時好不容易抓緊的一塊浮板。她深呼吸了一口氣，說：「無錯，答案應該係行政主導先啱，如果有同學寫錯咗嘅記得改返個正確答案上去。」

「Miss，點寫呀？」Amy邊舉手邊問道。

Miss Lam頹然走到黑板前，拿起一根白色的粉筆，閉眼搖搖頭，還是開始寫那四個大字。

Miss Lam的手一邊寫，一邊有一種說不出的噁心與厭惡感從心底蔓延，蔓延到肺部、喉嚨、口腔——原來自己與電視上那些睜眼說空話的高官沒甚麼分別，原來她在不知不覺間已成了他們的一份子，成了個為了三萬多元月薪可以把課室僅餘的星火都淹埋的教畜。



是非黑白，在那四個白色字被寫出來的一刻顛倒。

「唔係喎Miss，我小學都係讀三權分立架喎。」阿祖看着黑板的字說。

聽到這句，Miss Lam寫字的手停了下來。

「咩呀，明明行政主導先啱。」剛才那一位同學堅持說道。

「我都記得小學學嘅明明係三權分立。」聽到阿祖的話，學霸子傑也和應道。

唉，我究竟要點答佢地先啱，Miss Lam猶豫、糾結，過了良久，班上同學都開始議論紛紛，她才轉過身，面向學生說：「係，三權係分立，不過由行政主導。」
「咁講都得？你肯定？」阿祖瞪大雙眼看着Miss Lam。

「算吧啦，你唔係以為Miss Lam睇落後稍為後生少少，就同其他老師有咩唔同呀嘛？哈，佢咪又同其他老師一樣，為咗份糧攣大眼講大話。」陳珊珊轉着手上的筆說。



經過上次那件事，陳珊珊被她的姑姐Miss Chan訓斥了一番，自那次起，她便收斂了不少。事實上，她連三權分立是甚麼都不大記得，但當聽到阿祖和子傑都在反駁Miss Lam，她還是忍不住往裏添鹽加醋。

這句話讓Miss Lam本來已內疚的心更是往下墜，使她無法再繼續掩埋良心。

「既然大家對依個答案有唔同嘅睇法，咁不如俾份功課大家，大家今晚返去就住香港嘅政治制度做下資料搜集，然後將相關資料Upload上Google-classroom，我地下堂再討論呀。依家我地填住下題嘅答案先？子傑，下一題你寫咗啲咩呀？」Miss Lam看着子傑問道。

「喔，下一題係⋯⋯」

就這樣，Miss Lam草草帶過了那題的答案，課堂得以順利進行。只是Miss Lam沒留意到，所謂的順利只是對她而言，阿祖卻再沒拿起筆寫過一個字。

 
午飯時間，同學都紛紛離開課室，只剩阿祖還坐在座位上。

「喂，你唔出去食野呀？」肥仔文走到阿祖身邊問道。



「唔啦，你去啦。」阿祖從書包拿出一個保溫飯盒和一對餐具。

「哇，你帶飯呀？我有無睇錯，咁多年都未見過你帶飯喎。」肥仔文驚訝地問道，看到阿祖打開飯盒，一陣香辣的味道撲鼻而來，更教他羨慕，說：「哇，好似好吸引喎。」

「羨慕呀？」阿祖得戚地說。

「估唔到Miss Lam咁識煮野食。」

「我都無諗過⋯⋯咪住，你啱啱講咩話？」阿祖瞪着肥仔文問道。

「我話估唔到Miss Lam咁識煮野食囉，整舊黎食呀。」肥仔文咽了一下口水，雙眼直勾勾地盯着飯盒裏的雞肉不放。

「你點知依個飯盒係Miss Lam煮架？」阿祖驚訝地問道。

「唔知架，我段估架咋，見你咁嘅反應，姐係我撞啱啦。唉，死啦，咁我咪要比晒啲Game你？但⋯⋯」

肥仔文苦惱，卻不知現在的阿祖感興趣的已不再是他手上的遊戲。阿祖打斷肥仔文道：「齋靠估？你有無咁醒呀？」

「喂，你咁咩意思，質疑我智商咁話啦喎。」肥仔文不滿地說。

「講．真．話，唔係嘅我一陣就去你屋企掃晒你啲Game。」

「咪呀，呀媽話我再同你有來往就斬開我一碌碌架，我都係瞞住我媽架咋。」

看着眼前的媽寶，阿祖反了個白眼，說：「咁你講啦！」

         「車，係Yuki姐前幾日走黎問我，話：『點解阿祖日日都同Miss Lam同一架車返黎』，我咪估你同Miss Lam住埋咗一陣，咁你又唔識煮餸，個飯盒好自然就係Miss Lam整架啦，係咪呀？咁都要⋯⋯」

         聽到Yuki的名字，阿祖再一次打斷肥仔文的話，着急地問道：「咁你點答佢？」

         「咁你又唔洗咁擔心，我雖然唔聰明，但都未蠢到爆你大鑊嘅。咪同佢Miss Lam咁啱住嗰頭，好近所以一齊返囉。不過佢份人咁醒，分分鐘已經估到都唔出奇。喂，整舊黎試下呀，好肚餓呀。」

         明明我同Miss Lam咁早返黎，Yuki幾乎遲到嗰刻先返架，點解佢會知架？究竟係邊個話佢知？阿祖心想，若有所思地看着Yuki那只剩下書包的座位，沒有留意肥仔文正在偷吃自己的飯盒。

         「喂，你地兩個係到做咩？」肥仔文身後傳來一把渾厚的聲音，嚇得肥仔文一時沒夾穩手上的雞塊，整個掉了在地上。

         「呀，可惜。」肥仔文惋惜道，轉身一看，正想追究是誰害他的雞塊掉到地上，發現站在門口的竟是Leung Sir，馬上改口道：「Sorry呀，我地就走架啦。」

         根據校規，午飯的時候，學生只可出外，或在小食部前的餐椅上用餐，課室是不容許學生逗留的。剛巧今天是Leung Sir巡樓，自然是要趕走他們的。
「唔係喎，我見你地連飯盒都打開埋，似係想係到開餐喎。」

         Leung Sir踏進課室，走到二人身邊，發現一個打開的餐盒，而裏面的餸菜竟還和自己剛才吃的有幾分相似，浮現出疑惑的表情。

         看着Leung Sir的神情，阿祖能猜到他在想甚麼，故意刺激他道：「係呀，今日嘅辣子雞同西蘭花實在太吸引啦，你睇下幾多辣椒，幾足料，仲熱辣辣架，呀Sir，要唔要試下呀？」阿祖捧起飯盒用力吸了一下還熱氣騰騰的香氣，再遞到Leung Sir面前，故意要他看清楚盒子裏的飯菜。

         細看之下，Leung Sir發現這不僅是幾分相似，簡直是一模一樣。Leung Sir疑惑的目光從飯盒移到阿祖身上，剛好對上他那雙得戚又帶點邪氣的單眼皮，彷彿在告訴他沒有猜錯，這正是Miss Lam親手做的飯盒。

         「依個唔係一個合理嘅理由，你地咁大個已經中五，無可能唔知唔可以係課室到食野。跟我落教員室，一人一個警告。」

         「吓，Sorry囉Leung Sir，最多我地即刻走，唔好記警告咁煩啦。」肥仔文哀求道。他怕的不是警告，而是要寫那張無聊的反思紙。

「洗咪咁呀Leung Sir，平時啲老師見到都係講兩句趕走我地就算，你下下唔係缺點就警告，咁落去好快比你用爛架喎。」阿祖還是沒有收拾的意思，還連忙把雞塊和飯都塞進口裏。

「楊祖耀，我已經講咗唔可以係課室食野，你做咩仲食？」Leung Sir瞪大雙眼道。

「咁反正係咪都要比你記，咁緊係食多兩啖先算啦吓嘛。」阿祖埋所當然地道說。

「楊祖耀，你唔需要我見你家長，然後記你缺點架可？我知你同你姐夫關係唔係好好架咋，再比佢知道你係學校搞咁多事，你係咪想入返去？」Leung Sir威脅阿祖道。

自從那次記了阿祖缺點後，Leung Sir去了找訓導主任蓮姐了解阿祖的情況，發現阿祖的成長背景複雜，不僅來自單親家庭，還曾被關進男童院，即使現在和姐姐一起居住，還是不時和姐夫吵架。

Leung Sir以為姐夫是阿祖的致命傷，卻沒想到早已被逐出家門的阿祖擔心的根本不是這件事。

「哈，Leung Sir，你除咗識威脅學生仲識啲咩？」

「我唔係威脅你，我係提醒、警告你好自為之。」Leung Sir瞪着阿祖說。

「大家咁話啦。」

「你咩意思？」

「無呀，我意思係提醒你唔好下下威脅學生，未必Work架，Leung Sir。」

「楊祖耀，呀Sir點教學生唔洗你教，你再咁多嘴，就唔係一個警告咁簡單。」Leung Sir開始不耐煩地說道。

「OK～」阿祖一臉不置可否的樣子說道。

         「食咗你舊雞一啖就要記警告，唉，早知唔食啦。」肥仔文後悔道。

然而，雖然被記警告，可看着Leung Sir那不悅的樣子，阿祖沒半點不快，倒在暗爽起來。