[純愛]幻想: 第四章—忽然同居(上）

返到屋企好快沖完涼攰到即刻瞓咗。一起身，原來已經12點，我食完少少嘢之後拎啲功課出嚟做，畢竟你幾唔開心但係功課都係要做。
-
做咗一陣之後，突然間諗返琴晚海旁嗰件事。之後膽粗粗ig pm嗰個女仔，問佢今晚幾點。其實撳咗發送制之後，我真係好淆底。好彩佢好順攤咁樣話22:00碼頭等。我終於放低咗心頭大石，跟住內心反而有啲興奮，有啲期待會發生咩事。
-
夜晚自己整咗少少嘢食，食完之後有啲感慨。平時夜晚屋企人都會煮少少家常便飯，唔係話好好食，但係點都有家的溫暖嘅感覺。依家變咗自己一個煮，溫暖嘅感覺瞬間變成孤獨嘅感覺。
-
屋企淨返一個人自己住，以前成日好想呢件事發生。但係真係發生咗又唔係好想，人真係矛盾。冇人打理啲家頭細務，拖地、洗衫、摺衫、洗廁所乜都要自己做晒，又攰又麻煩。
-
食完野做埋啲家務之後，玩下玩下電話咁又10點，於是我就換衫行咗落去碼頭。
-


行到碼頭等咗一陣，見到佢喺遠方慢慢行過嚟，佢着住普通黑色T恤，黑色真理褲。我比佢吸引到望實佢。
-
之後佢行過嚟打我個頭「望夠未呀變態佬～」
-
跟住我就尷尷尬尬咁樣同佢喺海旁慢慢散步，跟住我都了解咗少少佢嘅家庭背景。佢係一個單親家庭，阿爸好細個嗰陣時死咗，阿媽每個月都有25日要返大陸做嘢，平時好少見屋企人，都係自己一個生活，所以佢對我嘅處境都好同情。
-
傾吓傾吓我係咁訴苦，又話屋企好悶，好靜，好無聊，好想有人陪我一齊住。
-
跟住佢就講咗一句令我內心好驚訝但好暗爽嘅說話「不如我嚟你屋企住呀～多個人熱鬧啲呀嘛，又可以照顧下你，驚你自己一個住到死咗都唔知，哈哈」
-


雖然我內心好開心，但係我都寸番佢「講呢啲？我自己都可以照顧到自己啦～話時話你屋企人俾你咁樣去人哋屋企住咩？」
-
佢好平靜咁樣講「其實我屋企都唔理我，所以我想做咩都得」佢講到呢度隻眼有少少紅，於是我即刻轉話題「咁你幾時去我嗰邊住？」跟住佢有啲開心咁樣講「不如而家我拎啲嘢過嚟啦，反正同一條村」
-
下，一晚之間屋企突然間多咗個姐姐一齊住。不過無妨，多個人熱鬧啲，而且有人可以照顧我呀嘛，令到我係喪親之痛外都有啲期待之後嘅生活。