女主視角
-
聽到佢返嚟之後我突然間有個主意,我嗱嗱臨熄晒啲燈,之後瞓返上張床扮瞓着咗。以我嘅了解佢一定會入嚟望一望我,到時就係行動嘅開始!
-
果不其然佢攝手攝腳咁樣行咗入嚟,正當佢喺床邊望住我,我一下彈起跟住雙手抱住佢條腰將佢抱入我懷中,佢嗰一下好驚訝,之後下意識甩開我隻手。
-
正當佢要走嘅時候,我使出左女人最強大嘅武器—眼淚。係佢準備行出去嗰陣時,佢聽到我嘅抽泣聲,之後見到我塊面兩邊嘅淚水直直向下流,佢即刻心軟坐係我身邊,跟住係咁同我道歉。
-
「對唔住我錯啊...我整親你,我真係過意唔去...你唔好喊啦。」佢講到佢隻眼都有啲紅。
-


「我都冇怪你...你唔好諗咁多,知唔知你唔係我隔離我好辛苦...我喺學校已經冇朋友,今日冇咗係你隔離陪我傾偈食飯,我真係好唔習慣,你唔會拋棄我...?」我真係邊講邊喊。
-
「我唔會....我願意做你唯一嘅好朋友,呢個係我嘅緣份亦係我嘅榮幸。」佢一邊用隻手抹走我塊面啲眼淚,一邊同我講。
-
「好啦好啦,我今次就大人有大量原諒你今日冇陪我啦!呢件事有懲罰㗎!」我摸一摸佢個頭同佢講
-
「下,你咁講好驚喎?咩懲罰嚟㗎??」佢嚇到企返起身。
-
「嘻嘻,我依家諗唔到,遲啲再同你講。」
-


「搞到我心思思,咁我返出去沖涼先啦。」正當佢又打算出去嘅時候,我一手捉住佢。
-
「唔好走住,聽聞你係因為一件事先搞到而家咁自卑,介唔介意講吓?」
-
「下,邊個同你講㗎?我唔想講喎...」佢扁住嘴同我講。
-
「唔得,講咗呢件事就當係你嘅懲罰!」我死纏住佢
-
「唉,都唔知邊個同你講....肯定又係Jason,我沖完涼入嚟同你講啦。」佢好無奈咁樣搖一搖頭之後行咗出去。
-


「真係好想知咩事...令到佢嘅性格同以前相差咁遠....」我心諗,亦都期待陣間佢會講咩。
-
-
-
之後幾個章節應該都係前傳,前傳嘅經歷係半真半假,到時可以估下邊個部份係真,邊個部份係假~
已有 0 人追稿