我嚮往嘅，係一段平平淡淡嘅愛情。: 我只係一個仆街
我嚮往嘅，只係一段普普通通嘅愛情。
當身邊嘅朋友見到面具底下嘅我截然不同，卻非常體諒、甚至係更加想了解落去嘅時候，我不禁懷疑，依家呢段關係只不過係寂寞嘅附屬品。
一對情侶一齊嘅契機，不過係兩個人之間有冇火花。或論呢個火花係一件事、係一個行動、或者係環境；只要花火係兩個人嘅心入面燃起，朋友嘅關係就會變成情侶關係。呢一對情侶之間有冇愛嘅存在，無從得知。可以肯定嘅係，佢哋各自有維持關係嘅學問。
「啱啊，係一個學問。」朋友回答我。
回憶、激情、承諾，關懷；呢啲都能夠成為維繫感情嘅一條線，甚至更多。學問在於你點樣將呢條線變得更加穩定，從而令你產生對某個人嘅思念同想念。線越穩定，想念之情就更加多同濃烈。
從前失戀會聽五月天嘅突然好想你。因為打從心底突然好掛住曾經愛過我嘅佢，並無咩特別嘅隱喻。
「突然好想你，你會在哪裡？」
大部分嘅人都應該淨係記得呢句。但係隨住時間嘅過去，呢一句並唔重要。反而係Bridge嘅最後個一句：「為何我們還是要奔向各自的幸福和遺憾中老去？」來得更加容易打破我嘅淚線。而家對我黎講，「突然好想你」嘅「你」並唔係一個人，而係一種感覺。我想念嘅係幸福。即係比人睇透但係會體諒，更多嘅係愛上面具下嘅呢個我。
「渣男。」
已經唔係第一次有人咁話我，但係我唔否認，因為我真係好自私地想對方付出。人係自私，但我都想講吓我理想嘅愛情。我要求好簡單，只要建基於大家嘅日常生活就可以。大家唔需要放大家係第一位，但係生活唔可以離開大家。比個例子大家：平時各有各返工，但係放假食個飯，係一個場所到休息吓，放慢吓生活就已經好足夠。一次嘅見面唔需要勉強講太多嘢：安靜時安靜，吵鬧時吵鬧。我覺得呢種相處嘅方式對大家黎講係最舒適，唔會有任何壓力，而又做到陪伴嘅效果。老實講，「陪伴」並唔係「陪」同「伴」咁字面，好因人而已。但係我冇咗呢樣嘢真係唔得。
「陪伴」對我黎講係好好好重要，同時平淡就可以：只要有睇得透我嘅人係身邊就夠。的確我唔需要搞到又去呢到又去個到，買個餸煮吓飯就已經可以。我所追求嘅愛情生活只不過係平平淡淡。再深入啲講嘅話可以係一種家庭生活。可能大家已經咁覺得 — 我作為一個男性卻有一顆少女心，想結婚，想有一個家庭。我渴望有第二個家，而非一段出生入死，轟轟烈烈嘅愛情。
大家可以話我太天真，諗得太夢幻，已經稱得上夢想中嘅愛情生活。但呢個只不過係一種自然產生嘅現實，難道拍拖戀愛唔係以結婚為前提，想要一個屬於自己嘅家？
「諗係咁諗，但係做出黎唔會咁簡單。」
有人咁同我講。不過唔好唔記得，要出軌嘅話返工同同事食餐飯都可以出到軌。既然要愛上一個人並唔係難事，咁點解維繫一段愛情係一件修羅等級嘅事？我可以答，因為人係自私。
講講我同自己女朋友嘅相處。好老實講，好多時都係佢demand大於我demand，因為我需要嘅嘢好少。有時候順路見一兩面，5分鐘都可以、或者係約出黎食個飯就夠。女生多數都想你同佢去吓邊到創造一吓回憶，甚至想你陪佢行吓街揀吓衫。反而比較平淡嘅食飯或者送佢返屋企呢啲會係似「交差」多啲。但係我比較鐘意呢種「交差式」嘅相處。點解會用「交差式」黎形容？因為唔排除有男人想hea鳩條女而選擇用啲唔使花時間嘅方式去拍拖。而決定你係咪hea鳩條女嘅界線就在於你係咪享受同珍惜呢十分鐘至半個鐘嘅事。
「當兩個人係埋一齊而係相愛嘅話，一切事物，無論大小事都會異常珍惜。」
呢個想法可能係一個烏托邦，視乎你點樣行動。「夢想只在於想，咁終究呢個只係一個夢；夢想而努力實踐，或者會變成現實，最後會成為一個目標。」唔記得係邊套戲到睇返黎，但係對我影響好深，不論係事業定係愛情。我一直都對於自己好想實現嘅嘢有一種執念，唔係我點撐得到依家。
曾經有一位師兄叮囑過我：「好女仔嚟㗎人哋，唔好放手啊！」
的確係好女仔，我亦都知愛情係需要磨合。但到依家，係自己女朋友面前只有窒息嘅感覺。
「咁即係你唔夠鐘意佢囉。」有位師姐咁同我講。
不過分手真係咁易？此時此刻嘅決定，係一場賭局：放手令自己可以有更多嘅私人空間，定係等多陣繼續嘗試去磨合。難聽啲講，其實只係賭緊之後有冇一個理想嘅伴侶。
「分手啦！唔好再拖住人哋啊，渣男。」今日又比人話多一次自己係渣男。雖然師姐只係用玩弄我嘅語氣去話我，但確實我係拖泥帶水，唔肯果斷處理。畢竟我賭緊嘅係自己未來嘅幸福，而籌碼係某位女生嘅青春，相信冇乜邊個會唔猶豫。究竟點樣做先係一個好嘅做法？呢一場賭局點樣做先係合適？跟注、加注，定係棄牌。
我嚮往嘅只係一種平平淡淡嘅愛情生活，而呢種「平淡」並唔係社會上嘅日常，而係罕有嘅幸福。磨合或者有用，但要將女生嘅青春當做籌碼加注係呢場有好多變數嘅賭局，為嘅只係自己嘅幸福。
係放手同捉緊之間我變得無力，然而情緒冇辦法發洩，終究我只係一個迷失自我、徘徊係面具上嘅人，為嘅係我唔需要付出咁多嘅愛情烏托邦。
簡單啲講：我只係一個仆街。
《續》