我嚮往嘅，係一段平平淡淡嘅愛情。: 我只係想一段平平淡淡嘅愛情

「我覺得都係分開好啲，唔係只會浪費大家嘅時間。」

我咁樣同女朋友講，應該話係前女友。某一晚因為一個導火線而令我講晒心入面想講嘅嘢出嚟，我哋就分開咗。

對我嚟講自由度好緊要，唔係話比我出去蒲出去溝女個種「自由」，而係需要私人空間個種自由。我好習慣一個人安靜落嚟，一邊聽住歌、毫無目的咁㩒吓手機，思考一下人生，回憶吓以前嘅經歷再諗點樣可以做好少少。講得好聽啲就叫思考人生，難聽啲就只係發白日夢。相信大家都有呢啲時侯，可能冇我咁大需要，但人總要有一個私人空間停落嚟。

而我前女友就好似唔係好明我嘅需要。即使喺未真係開始一齊嘅時侯我已經有同佢講：「我係一個好需要私人空間嘅人嚟，可能會令到另一半覺得我唔理佢，不過我真係好需要。」而佢當時就話了解同明白，果然戀愛係會令人降低智商。你睇吓啲情侶就知啦，冇啦啦叫自己另一半去雪櫃攞雪糕比自己食，仲要叫人喂。大佬你有手有腳，仲要間屋唔係大... 哈哈係啊，我係憑實力單身。但係我覺得一齊生活浪漫過做一個廢人要比人照顧。

「其實有冇諗過佢唔係真係鍾意你？」我朋友點醒咗我。





之前有提過共依存嘅問題，我前女友同我一齊個時，正正係呢種心態。所講嘅佢唔係真係愛我，意思並唔係佢出面有第二個，更加唔係佢偷食，而係喺佢個心入面我係一位可以比到安全感佢，或者佢可以依懶嘅人。佢需要我陪佢多過佢需要我愛佢。點解咁講？因為佢喺Whatsapp文字上有講過「我愛你」之外，我冇親耳聽過佢講呢三隻字。而我由一開始到分手前都冇懷疑到呢個問題，因為戀愛令我智商下降。

「對唔住，原來我到呢個moment先發現，其實你個心漸漸走遠，但我就感受唔到你依然努力想取悅我、維繫呢段感情嘅行動，忽視左你有一啲行為其實只係因為嗰個係我先至去做，而冇珍惜到你，冇好好回應你，反而要求就越來越多，仲去責備你、想去命令、埋怨你。忽視左你本來就係一個好高敏感度嘅人，係一個好要求自由嘅人：唔鐘意俾人點、俾人管、唔鐘意人哋話一就一話二就二。係我冇好好小心處理我哋嘅感情，反而我將你嘅改變、行動、付出變咗理所當然，而忘記咗你係因為我而去做任何事。」

「唔知點解我好心疼你，因為你喺任何事上面你已經都好努力，但就好似滿足唔到人哋或者自己嘅期望。其實我覺得我自己對你都造成傷害。我話你自私，其實我都好自私。我唔知幾時開始我哋嘅溝通出現咗阻滯，而令到我仲沉溺喺過往而忽略咗你嘅感受，仲依為段感情好穩定，大家都好了解大家好愛大家，但係原來只係我一廂情願。其實我依家都好想攬實你、好想錫你，我想話俾你聽你永遠有我喺後面。
可能我冇講好耐啦 但係一直都放喺心底，我愛你。」

佢喺分手嘅個晚不斷地打千字文比我，佢嘅「輸入中」維持咗成晚。好似想藉住呢一堆毫無感情嘅文字想打動我，令到我心軟、回心轉意。但係無奈地，一切嘅發現都嚟得太遲。只要佢願意放多少少細心喺我身上，我覺得呢一切未必會發生。「未必」會發生嘅原因？好簡單，因為呢一段嘅關係一開始就已經錯咗，致命傷係佢當初接受咗我嘅表白。

「我一開頭可能冇咁愛你，的確我都係抱住一個試吓嘅感覺，但係試吓試吓我就發現你係我一個好欣賞嘅人，我覺得可以同你行到落去，然後到你返香港我同你嘅真實相處我更加想確定係你。」





佢一開始並「冇咁愛我」所以喺文字上冇乜點講過，甚至喺面對面嘅情況吓佢冇講過「我愛你」。唔知呢個定論可唔可以攞諾貝爾獎，但係我可以相信呢句說話係啱嘅。或者會有讀者話長距離戀愛先係呢段關係嘅關鍵問題所在，因為愛情係需要時間去培養，唔會一時三刻就可以愛意萌芽。呢個諗法本身冇問題而且我係十分之同意，但係培養嘅階段唔應該喺一段戀人嘅關係入面出現。如果一開始並唔係真心愛我嘅話，我比較希望佢唔接愛我嘅表白。呢一段關係由一開始就已經錯晒，致命傷係佢嘅接受。

「我只係想要一段平平淡淡嘅愛情。」

人愈大想要嘅嘢愈嚟愈少，雖然我應該冇資格去講呢番說話，但係我真係開始對於愛情嘅憧憬冇咁多幻想。我覺得只要有一個女人真係明白我嘅，咁樣就已經好足夠。而要做到呢個條件，應該都要有返咁上下時間去互相了解。我唔再期望認識多啲異性朋友，或者係去溝女。時不時我都諗，可能未來會同自己一齊行到最後嘅人已經喺你身邊，只不過大家都未有刷出火花、未有時間真係去了解對方。我嚮住嘅只係一段平平淡淡嘅愛情，唔需要有幾轟烈，亦唔需要特登去製造浪漫；日常生活之中有對方，一日一日好慢咁了解對方更加多，經過無限次嘅離開同失望都會比對方吸引回轉，咁樣就已經足夠。

「所謂了解一個人並唔係知道嗰個人幾多幾多嘅嘢，而係知道嗰個人嘅諗法同生活態度；因為你知得再多嘅嘢，都只不過係過咗去嘅回憶，而佢點樣生活同諗法先係實實在在面對緊你同佢嘅關係。」—— 栩梧

《完》