那些年，我最愛的兩個女孩子: 3

大家小學果時，大約到四年級左右，就會開始同女仔玩，應該係話開始知道咩叫鍾意一個人，當時鍾意一個同學，就係想同佢小息一齊相處咁樣。而男仔想吸引女仔注意呢，就會用最簡單直接方法，蝦佢。所以雪凝就係俾班男仔蝦得最多果個，而日日都蝦佢整估佢果個呢，就係我。
 
當時我坐佢後面，而佢就扎住對麻花辮，我一向都好鍾意女仔扎呢種辮，終於我忍唔住，伸手去掹佢條辮一下，不過，佢竟然冇嬲，奇蹟。
 
而雪凝都俾班男仔改左個花名，叫微波爐，因為當時嘅佢，係平胸
 
如是者我每日總要掹下佢條辮先安樂，而佢都會轉身拍我個頭當反擊
 
「微波爐 !!!!!今日未掹妳條辮呀!!!」
 




「唔俾你掹呀!!!」
 
不過佢自己又走過黎俾我掹一下，佢真係好得意。就係咁樣，我先會鍾意佢。
 
「阿風呀，你生日想要咩呀?爸爸送俾你」
 
「我想要隻錶，我而家都未有錶」
 
「要唔要G-shock?定係想要家姐果款baby G?」
 




「爸爸，一街都係呢D電子錶啦，有冇D特別D架?」
 
「特別D?冇問題!!爸爸送俾你啦」
 
終於係我生日果日，我收到一隻手動機械錶，錶面上有粒紅星同潛艇
 
「爸爸，呢隻係咩錶黎架?」
 
「呢隻係1960年代，蘇聯北方紅旗艦隊潛艇部隊軍錶，係要用手動上鍊架」
 




「咁得意嘅?點上鍊架?」
 
「拿，拉出呢到…」
 
爸爸好用心咁教我上鍊
 
「爸爸，你點解揀呢隻錶俾我嘅?」
 
「阿風，爸爸知你係學校比較活躍好動，你呢，就要好似潛艇一樣，默默潛航，少說話多做事，一攻擊就要一擊即中」
 
「明白!!」
 
呢隻錶我真係好鍾意好鍾意，但估唔到，佢係兩個月後就爛左，仲係俾雪凝整爛
 
「死人頭!!!成日蝦我!!!我要反擊啦!!!」




 
雪凝帶住幾個女仔夾手夾腳捉住我，仲用羽毛球拍去拍我，係佢一下拍落黎果時，我伸左手去擋，點知就聽到啪一聲
 
大家聽到咁嘅聲都心知不妙，我望一望我隻錶，真係爛左，雪凝整爛左我份生日禮物
 
「對…對唔住呀….我賠返俾你丫」
 
佢又點知我有幾鍾意呢隻錶丫，我自己一個返埋位，除左隻錶收好佢
 
就係果日開始，我就冇再理過雪凝，就係我唔理佢果一日開始，惡夢正式降臨我身上。