那些年，我最愛的兩個女孩子: 5

「阿風，今日有冇俾人寫手冊呀?」
 
「有…」
 
「又係蝦雪凝呀?」
 
「佢都冇同老師投訴，係其他女仔多事之嘛」
 
「你可以少d蝦佢呢」
 




「咁係佢同我勾手指尾，話由得我蝦佢架嘛」
 
「爸爸睇得出你地兩個係好好朋友」
 
「不過佢整爛我隻錶呢…」
 
「唔洗怕，會整到嘅。爸爸教你唱果d歌你識唱未呀?」
 
「識就識，不過我唔明d英文講咩喎」
 




「英文就等家姐教你啦」
 
「家姐成日蝦我嘅」
 
「家姐會好錫你啦，你有功課唔明就問家姐或者契媽知唔知?」
 
「契媽邊教到我呀?」
 
「當年你契媽係爸爸同學，果陣我地兩個讀書爭第一都爭到死咁，你話契媽讀書叻唔叻?」
 




詩敏經常會偷偷地跟住契媽入黎探爸爸，當時佢6歲
 
「契爺!!我畫左幅畫俾你呀!!你要快d好返帶我地去玩呀!!」
 
「嘩!!詩敏，幅畫好靚喎，有咁多人嘅?」
 
「係呀!!呢個係爸爸同媽媽，呢個係契爺你同契媽，呢個係家姐!!」
 
「咁中間呢兩個呢?」
 
「呢個新娘子係我，新郎係哥哥，我大個要同哥哥結婚，我要做哥哥新娘子」
 
「哦…咁妳要乖d先得啦，哥哥唔鍾意唔乖嘅女仔架」
 
「知道!!」




 
「Tony你要努力作戰落去，我地學校嘅人唔會咁易放棄」
 
「Margaret，妳知我知咩事，以後我屋企要麻煩妳幫手照顧啦」
 
「我應份嘅…」
 
「妳…仲有冇嬲我當年冇揀妳?」
 
「大家都幾廿歲人啦，有仔有女，仲講d咁嘅野做咩丫」
 
「我有d慶幸冇揀妳，如果當年我揀左妳，我唔知妳今日會點捱。我知妳表面好堅強，但係一轉身d眼淚就會不停流出黎」
 
「Tony…你唔好咁講啦」
 




「傻妹，妳仍然係咁傻」
 
「我同咁多年前一樣，冇變過，你都仍然係第一位」
 
「我都係，所以我想妳好好照顧我屋企」
 
「我知道Sally有幾辛苦」
 
「咁拜託妳同Terrance啦呀…我有樣野收埋好多年，一直冇機會送俾妳」
 
爸爸拎出條頸鍊出黎，幫契媽戴起佢。契媽戴左陣就擰擰頭自己除左
 
「Tony，我地自己各自有家庭…我地…已經返唔到好似以前果種關係」
 
契媽真係愈講愈傷心




 
「有時我望住詩敏，都覺得佢係我個女咁」
 
「傻啦，佢係我同Terrance嘅…」
 
「我明，不過妳都成日覺得逸怡逸風係妳對仔女…如果唔係，妳點會幫佢地改名。果一晚…我地…唉…算啦」
 
「Tony…」
 
「詩敏過黎丫」
 
「知道!!」
 
爸爸幫詩敏戴起條鍊，呢條鍊就咁跟住詩敏一世
 




「契爺送條鍊俾妳，妳要乖乖地知唔知?」
 
「知道!」
 
家姐好識趣咁帶我地兩個出去
 
「家姐?爸爸同契媽做咩呀?」
 
家姐當時對眼紅哂，望一望病房
 
「我地俾d時間爸爸同契媽兩個人相處下啦，佢地…等左好多年啦」
 
其實我唔係唔知，當年爸爸係女校男生，同一時間，媽媽同契媽都鍾意左爸爸。佢地三個係好朋友關係，最後爸爸揀左媽媽，因為契媽係果種好有強勢嘅人，爸爸知道佢屋企一定唔鍾意契媽，所以冇揀契媽。但咁多年黎，我都知爸爸最愛係契媽，契媽之前不停入醫院，爸爸總係第一個去探佢去照顧佢。
 
第二日星期五，我仍然好攰咁返學校，到左下晝，我個心突然好亂，突然流出眼淚。爸爸夠鐘啦……