世界讓我們在一起: 一. 初遇

第一章。初遇

「早晨，係陳意妍陪大家睇天氣。外圍雨帶今日開始影響本港，預測多雲，有狂風驟雨同幾陣雷暴......」

「呀b，天氣報告話今日會落雨呀，記得帶遮呀」坐係電視機前面既婆婆對住我依個正暴風吸入緊早餐既人講。

「咳咳，知喇，咳咳。」口入面含住成個腿蛋治既我差啲啃死。「媽咪，我遲到喇，唔食喇，拜拜！」我以九秒九既速度著好鞋，跑落樓，發誓唔要做開學日既遲到生，係全校人面前罰企，因為絕對會比人笑死。

要準時翻到學校就必須搭到8點正既嗰班巴士，而由屋企去巴士站就需要10分鐘既路程。望一望錶，今次仆街了，已經係0755，今次真係冇得我唔跑(真係好憎跑步，嚴格黎講係所有運動）。





或者追巴士先黎落雨係一個我專屬既詛咒，諗住係書包拎把遮出黎，但係發現我只係喺婆婆叫我帶遮既時候幻想咗一下擺把遮入書包既情景，aka根本冇帶。

白色既校裙係好似開左水龍頭咁既烏雲底下就黎變see through，但係同罰企相比起黎，我更介意後者。正當我要進入自我催眠既狀態，無視所有人既眼光，無所畏懼咁奔向看似近在咫尺既巴士站既時候，一把男聲叫住咗我：「同學，同學。」

我令轉身望向佢，係一個睇落似廿幾歲既男仔，著住白色恤衫，一隻手拎住遮，一隻手拎住件西裝褸，語氣帶點緊張咁講：「不如我比把遮妳丫。」下一秒就塞咗把遮比我，再下一秒搵件西裝幫我kum住咗個身，語重心長咁講咗句：「做女仔要識保護自己，知道嘛？」

突如其來比咁樣一個暖男關心既我呆咗咁企咗係路中心，目送佢急步走向馬路邊截咗架的士就走咗。