世界讓我們在一起: 二. 再遇

第二章。再遇

滴住水既我唔知點樣就上咗巴士，全程望住黑色西裝褸上面既小水珠，嘗試回想嗰個人既樣、動作同語氣，心諗：唔知聽日仲會唔會撞倒佢呢？

落車之後我立即以光速跑翻學校，以為搭倒班巴士就實冇死，點知都係差嗰0.01秒，趕唔切係鐘聲響完前踏入校園，比訓導陳sir捉到正：「程洛宜，開學典禮先黎遲到，睇黎有人想罰企喎。」

正當我以為last year先黎出醜經已係史上最𤓓既事既時候，先知道原來柒開真係有條路——啱啱比遮我既嗰個人竟然係學校禮堂出現，仲要坐係第一行第一個位，亦即係我罰企既正前方。

專心望住校長講嘢既佢似乎冇發現我係啱啱嗰個女仔，不過係我打咗個大乞嗤，令到幾乎全場靜曬之後，都相信佢好難唔發現。我一臉難堪咁抬頭望向佢，見到既首先係佢驚訝既樣子，3秒後再變成無奈一笑，好似表示緊自己完全唔明點解會有人咁白痴一樣。我下意識移開咗視線，過咗一段時間先敢再望翻過去。





我既角度淨係見到佢既側面，發現原來佢輪廓都幾深，下顎線非常明顯，笑起上黎仲有個小酒粒。聽校長係典禮介紹先知原來佢係今年既新老師，叫鄭望繁，教science同physics既。啲中一bb就幸福啦，有個咁靚仔既班主任。

罰企咗成粒鐘開學典禮終於完喇。我攬住仲濕濕地既西裝䄛，係教員室出面嗌咪：「鄭望繁老師丫唔該。」大概係冇估倒第一日翻學就會有同學搵佢，見佢個樣都有啲意外，但係當佢見到西裝䄛既時候就知咩事：「哦，同學你黎還件褸比我？」
「係呀係呀，唔該曬你今朝。」
「唔洗唔該，下次記得帶遮喇。」
點解佢可以咁溫柔架呢？啊，你把遮我仲未還呀！都未講得出口，佢就已經翻番入教員室。
算啦，下次再還。

我一入到班房，mandy就捉住我問：「喂，乜你咁遲架，成朝都唔見人既？你有冇見到新黎嗰個busy sir呀？超靚仔呀！」
「靚仔呀sir就有見過，busy sir就冇。咩人黎架，個名咁怪既？」




「佢叫鄭望繁丫嘛，咪即係繁忙鄭囉，busy cheng呀！」
「咁快就幫人改埋花名，你都得㗎喇你。」
「busy sir真係好靚仔架，今朝係學校門口見到佢，啲頭髮比雨dup濕咗少少，但係佢撥走啲水嗰下型到呢！人又高，腳又長，簡直係男神level呀！」
「咁佢又真係幾靚仔既。」
「如果佢教我地physics就好喇，日日對住老楊真係人都癲。」
老楊係我地班主任兼physics老師，份人冇咩嘢，就係長氣咗啲，上堂悶咗啲咁。

一講老楊，老楊就到。

佢處理完開學既班務之後，就開始語重心長咁講：「你地仲有半年倒就考dse㗎喇，唔好再玩玩下，依個時候應該已經做好應試準備㗎喇。我知我地班同學physics既成績參差不齊，所以9月尾會有個physics test，如果唔過30%，我或者會打比家長勸drop科，你地好自為之啦。」




其實我既physics初中都已經唔係話好好，但係就係對physics有種莫名既喜歡，雖然好多時候都聽唔明，但係我都係會儘量理解。只可惜成績依然一直上唔到去，我真係唔希望到最後要drop咗佢呀。
正當我擔心緊既時候，老楊又話：「physics department係商議之後決定係放學後開tutorial，覺得有需要既同學可以留低補課。」
唉，有需要既同學在此，希望真係有用啦。
但係估唔到tutorial既呀sir竟然又係鄭望繁！