「傻仔~咁我地可以打機未呀?」過咗一陣,Chris摸住我個頭問

「嗯,可以呀」我入去廁所洗面,比自己回復番心情先再出去

「呀賢,點解插唔入既?」我出到黎見到Chris攞住Switch既overcook碟諗住插入去PS5,我的天呀!

「唔係咁架啦~」我將PS5同Switch既分別話比Chris知,當然講埋冇通用碟啦~

「咁麻煩架~」Chris就晒眉頭



睇黎佢都唔明點解會咁樣,咁做想賺盡你啲錢呀!!但又大把人願意倒錢

我係PS5上面買咗Overcooks。我都唔諗咁多啦,要開開心心同Chris打陣機,唔好浪費佢一番好意呀

我地一齊玩兩人廚房,點估到Chris真係咩都唔識傢!佢連一開始點樣控制個人仔都唔識,搞到個人仔手腳痙攣咁,經過我多次教導之下,佢控制既人仔終於變返一個正常人

「點呀,玩唔玩得掂呀」

「掂呀,你睇下我玩得幾叻」Chris聚精會神咁樣望住個螢幕,睇黎已經上哂癮



「喂!呀賢去救火呀」Chris好緊張咁指揮我要做野,短時間內佢已經著曬迷,真係好後悔教咗佢玩呀.....

「呀賢!上菜呀」果然呢隻係考驗愛情同友情既遊戲

「幫緊你!幫緊你!」我開始有少少噪底

「Yea~下一關」Chris好興奮咁講,吓~唔撚係呀,仲要比佢指揮到幾時呀......我享受唔到打機既樂趣呀!PS5居然用黎玩overcook?

「不如我地落街食飯囉~」望下個鐘都唔早啦,Chris應該都開始餓啦,要襯呢個時候停止佢繼續玩呀



「好啦~轉頭番上黎再玩過」吓,我冇撚聽錯呀,真係要諗過辦法先得~

落到樓下,天氣真係好凍呀!好自然地拍住咗Chris,因為佢隻手同暖包一樣咁暖呀,真係會令到我不自覺就拖住~我地一邊行一邊傾點樣可以配合得好啲,睇黎佢真係好鐘意玩喎

「唔好意思呀~我地暫時淨係做外賣咋」當我地想入去既時候,門口個姨姨阻止左我地

「我地食咩呀?」Chris攞住個餐牌比我睇

「咁不如食咕嚕肉同埋八珍豆腐煲~」見到餐牌上有咕嚕肉就諗起Cindy,唔知呢一間餐廳會唔會好食得過Cindy煮架啦,我不知不覺就諗起Cindy... 唔知佢而家點樣呢... ...

「好呀~」Chris諗住係銀包攞錢出黎

「我黎啦~」我立即搶先一步攞錢出黎,佢已經送咗PS5比我啦,邊有意思仲要佢比埋飯錢

我地一邊震一邊等外賣,真係好撚凍呀!旁邊既Chris凍到震緊,有辦法啦!我打側個身企係風吹既方向幫Chris擋風,而Chris好自然咁攬住我



「好凍呀」Chris講完之後攬得我更實

「靚仔~你個外賣呀!」我接過外賣之後,就嗱嗱聲返屋企啦

「你番上去先啦~」去到樓下,Chris突然咁講

「好呀」可能係買女人野,我係到唔方便,咁我唔阻佢啦~

我上到去將啲餸放上碟,再砌返好佢搞到好似係屋企煮咁樣。雖然係外賣,但都要有啲儀式咁令佢睇落似住家飯,一陣食落都好味啲啦,等埋Chris番黎就食得啦~

「我番黎啦~」Chris一打開門,隻手攞住幾罐啤酒

「食得飯啦~」我拍一拍隔離張凳示意佢坐低



「嗱!」Chris遞咗啤酒比我,估唔到佢會買啤酒飲

「做乜買酒飲既」佢唔似係飲開酒既人喎

「咁你唔開心呀麻,飲下酒個人咪會開心返啲啦~」Chris攞起支啤酒撞向我支啤酒

「嗯!」我點頭回應之後大大啖飲一啖啤酒,嘩!爽呀!

我一食咕嚕肉係Cindy煮既味道呀!我差啲忍唔住喊咗出黎,我真係好掛住Cindy,好想問佢點解仲未覆我WhatsApp

「呀賢你做咩呀?」

「冇野呀」我大大啖飲,希望可以盡快沖淡咕嚕肉既味道

我開始越飲越大啖,因為我唔想再食咕嚕肉,同時都冇心情再食飯,慢慢眼前既視野都變得好迷幻,好似有少少醉醉地,我望住面前既Chris點解變得咁靚既~



「呀賢,你唔好飲得咁急啦...」

「Chris~」我將個頭挨緊Chris,好自然錫咗佢一啖...Chris既嘴唇好軟綿綿呀...