中四那年，我因為五毫子而成名: 1.5 勇闖學生會

「我頭先問左我隔離位，佢地話投訴小食部都冇乜用，之前試過有同學買左個麵，一打開面頭有條蟲，小食部唔肯換比佢，仲地話『起室外食野係咁嫁啦』，個同學投訴都冇用。」Robin說。

我聽到毛管戙：「下咁恐怖，啲衛生咁差嘅。」

在這裡讀了四年，我沒有去過學生會，對於我這些一般的學生來說，學生會只不過是借球類的地方，他們搞的活動我沒有去過，甚至連他們的成員，我一個名字都講不出來。

會室的門是開著，我和Robin兩個直接行入去。入面大概是半個課室的大小，燈光有點暗，雜物很多，亂到像堆填區，堂堂一間地區的Band 1學校竟然有一個這樣的地方。

左邊有幾個排球，右邊幾個籃球，還有大量衣服很亂的散落在不同角落，旁邊還有一張摺床打開的。在後面有好多雜物，堆到像人一樣高。房間裡有一股怪味，像是陳年汗味跟濕氣一齊混合一起味道，總之此地不宜久留。





近門口的位置有一張檯，上面有一疊表格，應該借球類的時候需要填寫的。可是，眼前沒有人。

「Hi，有冇人起到？」Robin問。

這一瞬間。我覺得我們兩個像在探險，就像電影入面男女主角勇闖古堡，有許多未知的等著我們，但我們只認識了不足半日。
「不如走啦，好似冇人。」Lily拉著我跟我說，她不說話的話我也忘了她的存在。

「咩事啊？借野自己搞掂佢啦。」有個男生從雜物裡走出來，隱約見到他穿著校服，但襯衣都飛出來，頭又像打風般亂。

「你係咪學生會嘅人？」我問。





「係啊。」他的眼睛好像睜不開，應該是被我們吵醒。

「係咁嘅，我想投訴小食部，你地會唔會幫到我反映？」Robin問。

「係咩事啊，講黎聽下？」他一副漫不經心的樣子。

我把一切告訴這個陌生男子。

「哦，咁你想我點幫你？」他不想管我們似的，還打了個呵欠。





我一時之間想不出我到底想要什麼。坦白說，我沒有金錢上的損失，只不過總覺得不能這樣就算。

「你地係咪可以同佢地反映下？」我問。

「嗱，我地都淨係可以同學校反映，佢地再同小食部反映。」

「咁你幫我反映啦。」我說。

「哦，我同學校講下啦，你寫低你地個名同聯絡電話啦。」那個那生繼續漠不關心的說，然後遞了一張memo紙給我們，我把資料寫在紙上。

「我希望你真係幫到我地。」我把memo交給他說。

「你叫咩名？我地之後有咩可以搵翻你？」我問。





「學生會打雜，Justin，有咩再黎會室搵我。」那個男生說。

既然任務已經完成，我們還是快點離開這個鬼地方。

「好，bye。」Robin說。

我們兩人，不，是我們三人，就這樣離開會室。
「睇佢個款都唔會幫到我地。」Robin無奈的說。

「不如算啦。」Lily依舊低聲說著。

我回應：「都係嘅。其實我都唔知我想咩結果，始終佢收唔收啲硬幣都係佢商業決定。佢最多都係道歉姐，但係應該都冇乜可能。」

「Joyce，不如咁樣諗喇，起呢件事上面你最讓你深深不忿嘅係咩？」Robin忽然問我。





我思考了一會，然後回答：「我諗係阿姐嘅態度，佢咁樣話我地。」

「我諗啊姐嘅態度都唔係一日練成，應該有好多受害者……不過冇人會著緊呢件事，真係去做咩實際行動。」Robin眉頭深鎖的分析著。

「我都覺得係嘅，不過等埋學生會處理再算啦。」我說。

在這個學校裡面，我只是一個只專注讀書的小女生，我沒有參與過任何學生組織。說要搞什麼行動，我也不知道從何開始。

「都係，睇定啲先。不如我地交換電話，你需要幫忙嘅時候可以搵我？」Robin主動提出。

「好。」這是我人生第一次被人「抄牌」，眼前的還是一個長得帥氣的男生。

Lily一直在我身邊沉默著，我明白她不想在糾纏下去。

「其實你係咪唔想追究落去？」我問Lily。





「唔……我係覺得追究落去冇意思。」Lily一臉沮喪。

「我明，我唔會逼你。」我拍拍她的肩膀。

回家的路上，我還是想著Robin的話，到底我們可以做什麼？

其實我也不是很想糾結下去。如果不是他提議去學生會，或許我已經放棄追究下去。

事到如今，Robin似乎很著緊這一件事情，比起我們兩個都要重視，讓我這個當事人不得不繼續下去。