一百首歌 一百種感覺: 天下無雙 陳奕迅

給我信心 當我未如願
披雨戴風問寒送我暖
親切眼光 舒我亂和倦
從無更改心照總不宣

每對愛人又好，就算係一啲比較親密嘅朋友都好，喺啲無盡如意嘅時候，只要得到身邊人嘅支持，好似可以幫自己叉足電咁，令自己得到力量去將身邊唔如意嘅事迎刃而解。香港嘅流行曲歌詞，大多都以押韻同對偶為主，林振強先生喺呢幾句歌詞裏面就充分體現到呢一點。喺唔如願嘅時候得到身邊人去送暖，用一個親切嘅眼神已經係一種表達方式，我相信當你唔如意嘅時候得到呢啲嘢，就算幫唔到你去解決問題，起碼你已經贏左對方對你嘅重視。不論係愛情或者係友情，只要你得到呢啲嘢，就算個難題最尾係解決唔到，你都已經係一個贏家。

一切也不 推說亂和倦
一次你都未曾去計算
給了再給 始了便無斷




無條件分擔各種辛酸

當一個人好想有另一半去陪你分擔自己嘅辛酸，只要佢無條件咁支持你，唔去斤斤計較，你已經可以話係贏左。但係現實中，每對愛人之間總會出現好多斤斤計較嘅情節，生活上嘅大小事，雙方都會向對方諸多挑剔。當出現呢種情況嘅時候，仲可以點樣同對方分擔大家嘅辛酸呢？現實之中，每對情侶分開嘅原因，出軌永遠都唔係其中一個最嚴重嘅原因。反而大多數分手嘅原因好多時都係大家互相計較生活上所出現嘅小問題。一段愛情最理想嘅結局係走到最後，唔係結左婚就等於係最後，而直到另一半百年歸老先係真正嘅最後。當大家都對自己另一半係咁抱怨，仲點可以一齊行到尾，點可以做到真正嘅天下無雙呢？所以，都係好好咁幫你另一半分擔大家嘅辛酸同唔如意嘅事，咁樣先係真正嘅愛。