[中學][純愛]讀男校嘅我，到底係咪真係咁難識女仔？: 夢醒

我執好晒嘢，換好晒衫，坐咗喺張梳化度，我一直回想緊啱啱個夢，個夢係幾咁真實，幾咁歷歷在目，每一個細節都記得一清二楚，就好似尋日發生一樣，一切都好深刻。搭正十二點我就著好鞋，孭好袋就出咗去,

「呀媽！我出去啦！」

無人應，正常嘅，畢竟今日放假，佢瞓到黃朝百晏都係合乎國情嘅。我一打開門口就見到佢等緊我，嚇親就有少少嘅，都無諗過佢會等我，

「你出門口啦。」

佢把聲依舊咁甜美，笑逐顔開咁講，佢笑起上嚟真係好靚，有如天使墮落凡間一樣，佢嘅每個神情都可以融化每一個人，同時可以激發鐵漢嘅柔情，一笑傾城，



「係呀，等咗好耐？」

「都係啱啱出嚟咋嘛。我哋去等𨋢啦。」

話就話大家係鄰居，但係我哋之間好似隔咗捧牆，而且空氣中多咗種氣體叫做尷尬，大家都唔願打破，只係驚對方唔慣自己太熱情，慢慢疏離自己，不過呢種尷尬一定要打破㗎啦，

「你想做咩先？」

「你話事啦，呢度你熟過我呀嘛。」



「食嘢先？」

佢點一點頭，跟住我哋就行咗去東大街，畢竟個度係最多嘢食同埋近我哋個邊。打破尷尬氣氛講就易，做就難，要搵共同話題都唔係咁易。就係呢個時候，我個腦彈咗一個想法出嚟｛問下佢點解搬過嚟啦｝如是者我就膽粗粗咁開口問，

「係呢，點解你會搬過嚟嘅？」

「我都唔知呀，好似因為細佬比人踢出校所以急住要搵新學校，咁啱我呀婆喺呢度有層樓，所以我哋就全家搬過嚟囉。」

「估唔到Argon咁鬼激動喎。」



我哋有講有笑，大家都分享咗自己細個嘅7事。同時佢話想食車仔麵，跟住我哋就行咗入去一間區內幾出名嘅車仔麵店，我哋嗌咗兩碗三餸麵，我發現佢都鍾意食豬大腸同埋牛柏葉，我哋食嘢嘅時候都講唔少嘢，細至學校啲搞笑嘢，大至對唔同時事嘅獨立見解。我眼前呢個女仔點解可以如此Local，亦都同我咁多共同興趣同埋見解，喺我哋之間個捧牆已經喺不知不覺間越嚟越薄。時間過得真係快，話咁快就嚟到行街嘅環節啦！

「哇！我咁大個女都未見過咁多㗎。」

「呢度係眾所周知嘅美食街嚟㗎嘛，多就梗係多啦，再唔係，我哋下次再約多一次出嚟？」

我緊張到唔敢呼吸，點解我會咁問㗎，佢會唔會覺得我過於熱情㗎。

「如果今次行程令到我滿意嘅話，我再答你啦」

我感受到前所未有嘅壓力，如果今次炒咗，咪以後都唔可以同佢出街？
================
你要習慣沒法相愛的苦楚