理性男孩要點樣識女仔？: 新的學年，新的開始。

「『一日之計在於晨，一年之計在於春，一生之計在於勤。』唔好好努力讀書，唔專注於學業，大個就乜都做唔到，剩係可以做乞兒呀！」

呢一句簡直就係我人生截至而加嘅座右銘，令我學會自律，令我學會努力，令我學會專心……條毛咩！日日過著一模一樣嘅生活，簡直就係最大嘅懲罰，返到屋企每日最大嘅娛樂竟然係做數學題目呀，做到有反社會人格啦。

今日終於可以返學，唔使留喺屋企呢一個地獄，一踏出家門，嘩～出面嘅空氣真係特別清新。「格格！」正正喺呢一個時候，我嘅鄰居加同班同學「盧仔」，我地通常叫佢做讀音相似嘅「騾仔」，我地入𨋢之後，為左消除尷尬，我選擇先讚佢：「嘩！冇見一排你又高左啦喎，這高高的鼻子，雪亮的眼睛，紅潤的小嘴，都深深吸引著我，啊～盧仔呀盧仔，為何你是盧仔呢⋯⋯」未等我講完，盧仔就已經頂唔信。

「知你有文學氣息啦文青，收返埋啦，好嘔心呀。」

「你都唔知我呢段時間經歷左啲咩呀！我不知幾辛苦呀，難得可以出黎，梗係要大玩特玩啦⋯⋯」





就係咁，我同盧仔一邊返學，一邊傾計，不亦樂乎。

「話時話，而家都高中啦喎，你不如去識下女仔啦。」

呢一句說話，令到我感到受到侮辱，令到自己嘅安全受到威脅，因而令顱內荷爾蒙分泌急速增加，使其血管擴張，令血壓上升，呢種現象簡稱：我嬲左。

呢個時候，我好理性咁講；「問你一個問題：識女仔嘅目的係咩？鐘意一個人其實即係腦內分泌嘅荷爾蒙令多巴胺分泌增加，令自己血管擴張，使其心跳加速，令其產生所謂鐘意嘅感覺。加上，一種細胞不論係單細胞生物定係複細胞生物，都有7種生物特徵：呼吸作用、移動、排泄、對事物敏感、吸收營養、繁殖、生長。當中冇任何一項係情感，愛情對人類嘅生存根本就無需要。」

我脫口而出，就係咁，我利用自己嘅知識成功令佢收左聲。





未完待續→