條女有鳩而我冇賓周: 3

「你係咪有病呀？？鍾意扮男人溝女人？仲要欺騙我感情？」公主病原本嬌滴滴嘅語氣轉變成歇斯底里嘅叫罵，刺耳得令穎怡忍唔住拎開兩邊耳機。
 
儘管公主病激動嘅情緒毫無減退嘅趨勢，穎怡心底卻變得愈發沉重，對方嘅說話恍如尖尖嘅銀針般刺入穎怡嘅弱點。

「原來淨係得我一個一廂情願，喺度妄想可以同你發展。」公主病氣急敗壞咁破口大罵，更漸漸染上哭腔。

「嘉琪，對唔住。」穎怡提到公主病嘅真名，嘗試令語氣聽落更真誠。

想當年，我都係另一個你。



「點解唔早啲同我坦白？點解要等我咁鍾意你嗰陣先嚟hurt我？」公主病嘅鼻音變得愈來愈重，最後連一句完整嘅句子都講唔完。

唔係，我原意唔係咁。穎怡嘅情緒隨住公主病嘅一番說話波動起嚟，呼吸不由自主地逐漸加重，不堪回首嘅回憶如潮水般重新湧上心頭。

此時此刻喺面前大吵大鬧嘅公主病，正正就係穎怡嘅影子。

「穎怡，對唔住。」似曾相識嘅說話如咒語般喺穎怡嘅耳邊響起。

穎怡頓時僵坐原地，周遭環境轉眼間變成幾年前嘅網吧。



「其實我係一個女人。」面前屏幕顯示出令穎怡不寒而慄嘅句子，穎怡恨不得立即拔腿就跑，逃離自己最懼怕嘅場景。無奈雙腳失力，只能徬徨無助地再次面對令自己心碎嘅一切。

正值青春期嘅少女荷爾蒙無時無刻渴望著與異性接觸，然而少女心事晦澀難懂，情意只能隱藏於一來一往間。

自從阿俊闖進生活，無盡空虛終於有所寄託，魂牽夢縈嘅對象從此有了名字。

距離產生美— 電腦屏幕唔單止掩蓋青澀嘅臉容，更小心翼翼地保護住羞澀別扭嘅少女心，於是所有心意毫無遮攔地展現於字裡行間，以蓄勢待發嘅狀態等待對方一一接收。

「所以你係利用緊我去買點數卡？」謊言如利刃般劃破名為初戀嘅包裝，毫不留情地斬斷初萌嘅情芽。



「對唔住。」對方支支吾吾好一段時間，最後只得出三隻字，將穎怡深深地打入無底深潭。

於是「阿俊」兩字就如夢魘般蟄伏於腦海深處，所謂轟轟烈烈嘅初戀充滿遺憾。穎怡內心對愛情嘅期望亦漸漸黯淡— 主動只會加快走向失敗嘅結局。

「夠啦。」月伶強行中斷耳邊嘅喧鬧，亦將穎怡拉回現實。

穎怡回過神來，慌忙地抹走臉上嘅淚水。窗外突然落起連綿大雨，滴滴雨點從天而降，仍無法沖刷心底憂愁。

「算啦，我冇事。」公主病似乎已經接受殘酷嘅現實，聲線中毫無起伏。

公主病匆匆退出穎怡所在嘅隊伍，剩低三個人面面相覷。

「我有冇講過…你地誤會咗？」千言萬語漫上喉嚨，最後只有乾澀生硬嘅解釋。

「噢⋯」海螢同月伶不約而同地感嘆道，一時誤會竟掀起洶湧大浪，而無辜嘅穎怡就慘被淹沒。



窗外點點滴滴，代人流起眼淚，穎怡一言不發嘅模樣令其餘兩人愈益內疚。

「打機？我見到曦銘on咗。」月伶問道，一個熟悉嘅名字映入眼簾，令佢心動不已。