條女有鳩而我冇賓周: 4

對月伶而言，曦銘係白月光、係暖陽，係點亮人心嘅晨曦。然而所有美好聯想只能埋藏於心底裡，從來冇衝口而出嘅勇氣。

「曦銘太好啦，我配唔上佢。」月伶以無數藉口解釋多年來嘅望而卻步，但時間從未沖淡滿懷心思。

由中學起，月伶身旁不乏狂蜂浪蝶，但不論係扣人心弦嘅情書，定係譁眾取寵嘅表白場面，通通都比唔上望到曦銘時嗰一瞬間嘅心動。

只不過係一刻悸動，只不過係一抹微笑，又或許係曦銘眼底裡嘅溫柔，不費吹灰之力地溶化冰山，溫暖月伶嘅內心。

看似係上落樓梯時咁啱相遇，其實係月伶精打細算嘅浪漫。擦身而過時，餘光中總會夾雜住無限愛意，生怕對方會發現自己嘅小心思。





即使兩個人喺曦銘畢業後就各散東西，但月伶為咗可以偶遇心上人，考文憑試前不惜挑燈夜讀，後來掹車邊做到對方嘅同校師妹。

「係愛呀哈利！」海螢聽完故事後感嘆道，絕世大魔王竟然會有被收服嘅一日。

月伶唔敢一口咬定繾綣纏綿為愛，沉重嘅字眼不同於望見曦銘時輕快嘅感覺。

只要係曦銘，一切赴湯蹈火都有意義，飛蛾撲火亦理所當然。

無處安放嘅思念轉化成焦慮，月伶隻手彷彿裝咗摩打咁不斷邀請曦銘加入隊伍。





「喂？」月伶望到曦銘入隊時，生怕對方會被真面目嚇走，聲線中不可一世嘅輕蔑一瞬間就被抹走，化成一片溫柔。

LAN線牽起兩人緣份，迷人杏眼彷彿出現於月伶面前，慌張地捽捽眼，遺憾地發現只不過係幻想，曦銘僅僅係加入咗遊戲中嘅隊伍。

窗外雨勢變大，隨住「轟隆」一聲，一個陌生嘅icon出現於眾人眼前，剎月伶一個措手不及。

「佢係我朋友。」曦銘開口公佈不速之客嘅身份，但抹不走月伶嘅擔憂，更有種不詳預感。

朋友？月伶孤疑地想道，要知道自己早就將曦銘身邊所有異性都查個底翻天，生面孔令月伶倍感不安。





「大家好啊～」陌生女聲柔情似水，輕輕地流入各人耳中，卻令月伶打咗個冷震。

「我叫阿桃，係曦銘嘅同學。」對方繼續開口道，價格低廉嘅mic令聲線中帶有沙沙電音，但無阻大家斷定對方係年齡相若嘅女大學生。

阿桃icon中係一個背影，貼身白色Tshirt勾勒出主人凹凸有致嘅姿態，黑色長髮間露出部分白皙皮膚，為人留下無限遐想。假如月伶係艷麗嘅紅玫瑰，咁阿桃係淡雅清香嘅茉莉花。

「哦…係啊？」月伶感到晴天霹靂，滿面春風頓時沉落去，意識到自身地位受到空前威脅。內心酸得令一舉一動更為艱難，手指凝結於滑鼠左鍵上，萬分唔情願去開始遊戲。

月伶輕輕掃過窗外晚色，心裏面同樣地落起大雨。然而雨水無處排解— 月伶歸根究底只係曦銘嘅師妹，從來無權過問對方嘅感情生活，更何況係一個素面未謀嘅網友……憂愁漸漸積聚起嚟，直至滿瀉嘅一刻。

「開game未？」月伶情緒低落時明顯得可怕，穎怡睇唔過眼，重新㩒開變聲器，完美地掩飾真實性別。雖然曦銘係一齊打機嘅好機友，但仍未去到坦誠相對嘅程度。

經過變聲器精心調整出嘅磁性男聲令月伶靈機一動，嘴上連忙答道「好呀好呀」，喺㩒落「開始遊戲」嘅一刻起，月伶就喺Whatsapp度向穎怡求救。

月伶：幫我媾咗條女佢





只要穎怡媾走阿桃，咁我咪唔使煩。妒火焚心隨住救命稻草出現嘅一刻全然消退，只要能夠喺曦銘懵然不知嘅情況下保住地位，月伶就會無所不用其極，出盡千方百計剷除對手。

穎怡：傻咗個鼻？

穎怡收到Whatsapp時下意識就反駁月伶嘅計劃，上一秒先打算避下風頭，下一秒朋友竟然就拜託自己幫手媾女。毫不轉彎抹角嘅回應盡顯不滿。

月伶：係命令嚟，唔係詢求緊你嘅同意

月伶霸道嘅性格一直令穎怡束手無策，那怕內心有一絲不情願，穎怡仍然願意盡力而為。

「唉…唔通睇住朋友見死不救咩？」穎怡情不自禁地講出口，滑鼠移向發送交友邀請嘅嗰欄，決絕地向阿桃發出「挑戰書」。