條女有鳩而我冇賓周: 14

喺另一邊嘅螢幕背後，浩俊同曦銘傾緊電話。

「好彩你肯嚟咋！」曦銘謝天謝地道：「我完全唔敢單獨同月伶玩。」

浩俊嘅存在就係曦銘背後嘅軍師，曦銘總會喺猶豫不決嘅時候詢問浩俊嘅意見，而沉默寡言嘅浩俊亦總會不厭其煩咁以最短嘅答案去回應曦銘。

浩俊輕輕咁「嗯」咗聲，腦海浮起月伶下晝時對住電話大吵大鬧嘅場面。

真係諗唔明點解佢會對咁惡嘅人咁上心。浩俊望住螢幕上月伶嘅icon，心入面無奈咁諗道。



雖然自己都不外如是……浩俊回想起幾年前對自己大吵大鬧嘅一個人，嘴邊不禁微微上揚。

「硬係覺得月伶好似對我有敵意咁。」浩俊諗道：「不過好彩佢嘅朋友都算好玩。」佢嘅視線停留喺驚驚嘅icon上。

驚驚本來係活躍玩家嚟，點解今晚又唔online嘅？浩俊不禁好奇起對方嘅事，可能係因為趕完deadline太攰？

遊戲加載到戰場前嘅最後一刻，月伶突然開口講道：「阿桃你咁靚，仲未有男朋友咩？」殺浩俊一個措手不及。

雖然曦銘深知浩俊喺擔當網絡人妖一事上得心應手，但​從來冇想像過浩俊喺遊戲中會咁有魅力，連月伶都對浩俊有興趣起嚟。



佢係咪因為尋晚嘅事喺度報仇？浩俊聽到月伶充滿敵意嘅問題時，不禁驚訝咁戚起眉，但佢默不作聲，冇答到曦銘嘅問題。

浩俊反而開口回答月伶：「下～你咁講曦曦會誤會㗎。」

激下你先。浩俊諗道，佢感覺到月伶對佢同曦銘之間嘅事饒有興趣，決定放手一搏。

「借住你嚟過橋先。」曦銘嗰邊傳嚟嫌棄嘅聲音，浩俊唯有略略解釋自己嘅動機。

誤會啲咩？到底你哋係咩關係？月伶所操作嘅角色忽然就死咗，佢嬲到再也無法專注喺遊戲中。



「咁奇怪嘅？」曦銘語氣之間充滿疑惑，喃喃自語道：「月伶好少咁早死㗎喎…」

啊～睇嚟我嘅影響力都幾大㗎喎～浩俊心入面慨嘆，佢醒起月伶同曦銘相處嗰陣嘅模樣，意識到月伶嘅死因正正就係源於自己嗰句說話。

「日頭嗰陣曦銘仲同我講話你哋係普通朋友咋喎。」月伶不出所料地將自己真正嘅想法毫無遮掩咁展露出嚟。

「係咩？原來我哋係咁㗎咋？」浩俊嘅語氣中帶住可惜，有意無意地挑起月伶嘅怒火。

月伶直接熄咗mic，憤怒嘅淚水喺眼眶中打滾，到底穎怡同海螢死咗去邊？點解要自己去面對令人心碎嘅呢一切，仲要自己根本有心無力，無辦法亦無資格去解決面前呢個貼住曦銘嘅不速之客。

冇交流嘅遊戲令人呵欠連連，更加令大家失去默契，場遊戲就咁就好快輸咗。

浩俊眼見月伶完咗場遊戲就即刻offline。曦銘亦都走咗去同其他人組隊，本身齊人嘅隊伍就咁就不歡而散。

咁無趣嘅，小小刺激就唔玩。浩俊苦悶咁望住隊伍散band。



「阿仔？點解你又攤喺度唔郁？」李太敲敲門就入咗去浩俊嘅房度，佢不滿咁抱怨道：「你而家好出去跑幾圈先返嚟。」

「嗯。」浩俊換上深藍色嘅衛衣同黑色運動褲，打算去附近嘅公園散下心。

「成日淨係掛住坐喺度打機…」李太見浩俊終於肯喺返學以外嘅時間出門口，欣慰咁唞咗啖氣。

到底佢哋三個之間係發生咩事呢？浩俊行出街之後不禁疑惑道，最近發生嘅一切彷彿隱隱約約咁透露出真相，但事實又好似冇想像中咁簡單。