月伶早就醋意大發,但不快嘅情緒無處發洩,唯有打俾穎怡嚟聽自己訴苦。

「我得閒呀~」穎怡感受到月伶嗰邊嘅情緒,識相地答道:「你係咪想飲嘢?」佢望一望個鐘,估唔到已經差唔多九點幾。

「係呀~我地各自拎啲嘢飲啦。」月伶有力無氣咁講道:「去你屋企樓下嗰度好無?」

穎怡「OK」咗聲就收咗線。十五分鐘後,着住黑色外套嘅穎怡就出現咗喺樓下公園嘅入口,拎住袋啤酒挨住石柱,喺度東張西望咁搵月伶嘅身影。

「到未呀仆街…」一陣寒風吹過,穎怡扯高自己嘅口罩,條頸縮入件外套度。佢百無聊賴咁望入公園左邊,提前睇吓仲有冇空位。



「啊~咁熟口面嘅?」穎怡睇到一個喺不遠處跑緊嘅人,佢覺得對方嘅身形有種講唔出口嘅熟悉感,但係佢日常生活中又冇啲咁高大嘅男性朋友。

「係邊個呢?」穎怡放咗袋酒喺石壆度,好奇咁側身觀察嗰個跑緊過嚟嘅男仔。個男仔跑得愈近,佢嘅五官就愈清楚。

男仔距離穎怡愈嚟愈近,穎怡亦認真咁打量對方嘅外貌— 皮膚白凈、有米八高,深邃嘅雙眼懾人心弦。

「等等,咁熟口面嘅!?我屌!」穎怡終於認到男仔嘅身份,即刻轉身匿埋喺石柱後面。

「頂…點解會喺呢個時候撞到佢。」穎怡開始慶幸自己着住全黑嘅衫,幸好着得唔顯眼,唔係嘅話就可能俾靚仔當眾指罵自己係偷拍狂。



穎怡回首望返公園入面,發現靚仔已經跑遠咗,幸災樂禍咁揞住心口。

「望乜鳩呀?」穎怡嘅膊頭突然有隻手拍落嚟,嚇到佢成個人震咗震。

「屌你唔好成日嚇我啦。」穎怡擰轉頭見到係月伶,就一臉嫌棄咁撥開對方隻手。

貪靚嘅月伶好少會冇打扮過就出街,但係今晚月伶淨係紮咗條馬尾,素面朝天就出咗嚟。穎怡發現佢嘅異態,識相咁幫手拎埋對方嗰袋酒行入公園。

「你爭人錢呀?」月伶問道。佢望住穎怡鬼鬼祟祟,不斷四周圍望嘅神態,嗰一刻有衝動想扮唔識隔籬嗰條友。



「唔好諗太多~」穎怡笑住敷衍月伶,佢搵到一個比較隱蔽嘅位就放低兩袋酒。

「你搞咩嚟?」穎怡用紙巾抹一抹罐面,然後開咗罐酒遞俾月伶,佢好奇咁問道:「你今日下晝唔係仲好地地㗎咩?」

「係呀,嗰陣仲好開心添!」月伶除低口罩,啜走冒出嚟嘅氣泡。佢思量片刻,然後講道:「係唔知點解個阿桃又會出嚟囉。」

「咁又係,你見我今日都唔太想應佢啦。」穎怡附和道:「佢好似想特登激你咁。」

「曦曦前曦曦後,我都想咁叫佢啊。」月伶心灰意冷咁苦笑起嚟,將手上面嗰罐酒一飲而盡。

穎怡又再開多罐酒俾月伶,兩個人默默無言咁遙望喺公園其他打情罵俏嘅情侶。 

「暗戀咗佢咁耐,你唔攰咩?」穎怡率先打破沉默,用膊頭撞一撞月伶。

「點會唔攰啊師兄…」月伶翻過身,又舉起酒飲咗一大啖。



「邊個唔想move on啊?成件事就好似…你明知做個份卷一定會炒,但係你死都要頂硬上咁。但係我放唔低佢啊」佢腦海浮現以往同曦銘相處嘅點點滴滴,諗起自己喺對方心目中可能只係一個師妹嘅事實,不自覺地用手揞住對眼,沒精打采地講道。

「我覺得成個人好似唔再屬於自己嘅咁,九成心情都受佢嘅一舉一動影響。」月伶繼續緩緩講道,穎怡亦默默咁聽佢訴苦。

「明明我喺佢眼中可能係一個不值一提嘅存在,但係我總係有股莫名其妙嘅佔有慾…見到佢同其他人行近啲就會好介意,更加唔使講佢同其他女打機嗰陣。」月伶愈講,個心就愈沉。

「唔好頹住,我都幫你行咗第一步啦,咪幫你睇吓個條女咩料囉。」穎怡一想像到月伶心灰意冷嘅樣子,就更加堅定咁要出手幫佢。

「老實講,我而家反而有啲希望桃味糖係曦銘條女。咁我至少會知難而退,唔使再活喺呢種不停呷醋嘅循環中。」月伶開始自嘲道。

「可能下個更可愛呢~」穎怡用手拍咗拍月伶嘅膊頭去安慰佢。

「佢已經係最可愛嗰個啦,唔會再有下一個。」月伶啞然失笑:「就算有咁多個人追我,我都唔覺佢哋有咩特別好。」 



「放心啦,我實盡力幫你。」穎怡安慰道,佢漫不經心望去遠處,好奇咁諗到底靚仔走咗未。

果然,穎怡喺公園出口嘅位置睇到熟悉嘅身形。然而位置太遠,佢唔知道靚仔究竟望緊去邊。

「點解可以咁陰魂不散…」穎怡即刻心虛咁將視線移開。

「點解可以又會撞到佢嘅?」跑完步嘅浩俊輕輕咁喘住氣,佢望住穎怡坐嘅位置,感覺自己最近嘅運氣好得唔尋常。
已有 0 人追稿