條女有鳩而我冇賓周: 17

「原來已經差唔多一點，好彩已經完sem。」頭痛欲裂嘅穎怡俾刺眼嘅陽光曬醒，佢唔情願咁轉身望去枱上面嘅鐘，然後拖住腰酸背痛嘅身軀行出房，慢條斯理咁梳洗好。

穎怡揞住自己額頭，唞咗啖氣。佢坐返喺床上面，開始回想起尋晚發生嘅事。

「我要繼續飲呀～」成身酒味嘅月伶想喺穎怡手上搶走罐酒。穎怡一手扶住爛醉如泥嘅月伶，一手拎住袋飲剩嘅酒。佢恨不得即刻將月伶綁喺燈柱度，等佢酒醒再送佢返屋企。

兩個人搖搖晃晃咁行到月伶屋企樓下嗰陣，月伶突然擺脫穎怡原本圈住自己嘅手臂，轉身正面望住穎怡。

「點呀白卡婆？」穎怡企咗喺月伶對面，無奈咁翹起雙手望住對方。



「我今年完之前會努力放低佢㗎啦。」月伶指住穎怡，一本正經咁講道。而穎怡企咗喺月伶對面粒聲唔出，好似等緊佢講埋下一句咁。

「但仲有個幾禮拜就下一年啦喎～」穎怡開玩笑咁講道。一陣冷風忽然吹過，令兩個人開始清醒過嚟。

「其實我鳩噏。」月伶愣咗愣，然後苦笑道：「我成世人都唔會走得出佢手指罅㗎喇。」

「嗯。」穎怡好似預咗會聽到呢個答案咁，點一點頭就擰轉身返屋企。

「叮！」穎怡嘅手機突然響起Whatsapp嘅提示聲，將佢嘅思緒扯返去現實。



佢望住月伶大張聲勢咁喺Whatsapp度召喚朋友打機，即刻識相咁㩒入英雄聯盟。

一加載到遊戲大廳，佢就收到來自胖虎嘅組隊邀請。

「月伶、胖虎、小明，仲有桃味糖？」穎怡內心詫異道：「點解個組合咁奇怪嘅？」

「點解可以咁冤魂不散？」月伶望住阿桃嘅icon，感到愈嚟愈唔耐煩。佢深深咁唞咗啖氣，決定同阿桃今日嚟個了斷。

「胖虎、小明、驚驚，早晨啊！」月伶充滿活力嘅聲喺穎怡耳邊響起，穎怡反而打咗個冷震，感覺月伶今日有啲異常。



「早呀！齊人就開Game啦！」胖虎興高采烈咁講道。

張月伶：你一陣最好唔好出聲

穎怡望到螢幕上方彈出嚟嘅message，終於知道點解會有種不祥預感。

喺另外一邊嘅螢幕，浩俊一見到月伶同驚驚同時出現就冷笑咗一聲。佢喺畫面一加載到戰場嗰刻就飛快咁打咗行字。

阿桃：早晨啊驚驚～

「女神同兵一齊出現…」浩俊摩拳擦掌咁諗道：「今鋪一定好好玩。」

阿桃​：驚驚你應承過會carry我

阿桃：但係你成日打完一鋪就走，好傷心



「哇。今日玩攻心計？」穎怡明明打算呢舖扮啞唔出聲，點知一嚟就收到阿桃衝住自己而嚟嘅問題。

西鐵線驚驚：而家咪補償緊你

穎怡言簡意賅咁覆咗桃味糖，費盡心思咁逃避成為炮灰嘅下場。

「呀桃，睇嚟你同驚驚好熟喎～」月伶別有用意咁拖長自己嘅語氣，蠢蠢欲動咁想開始刁難阿桃。