條女有鳩而我冇賓周: 18

阿桃：秘密嚟㗎

「咁在意做咩呢？」浩俊不屑道：「已經有曦銘喇，仲想要埋驚驚？」

浩俊刻意隱瞞佢同驚驚之間嘅事，嘗試令其他人對兩人之間嘅關係浮想聯翩。當佢嗰句話send到出嚟嗰陣，穎怡嚇到倒吸一口氣，意識到自己似乎已經成為風暴嘅中心。

「哦～」月伶若無其事咁笑道：「對唔住，我份人好奇心比較重。」

「佢唔係以為我真係會信佢呀？」螢幕後嘅月伶咬牙切齒咁喺內心鬧道，佢一向唔會浪費時間出手接觸自己嘅情敵，然而月伶今次感覺阿桃零舍難應付。



「講起秘密—」月伶欲言又止：「阿桃你個樣都幾神秘㗎喎～幾時賞面俾我哋睇吓你真樣啊？」佢講完之後嘴角不知不覺咁扯起一個意味深長嘅微笑。

「佢以為我冇俾人問過呢種問題咩？」浩俊聽到月伶嘅挑釁之後愣咗愣，隨即得心應手咁覆咗對方。

阿桃：我個樣冇你咁好睇，怕醜啊(o´罒`o)

「阿桃你唔使驚㗎喎！」胖虎出聲附和月伶：「睇你icon就知係靚女嚟！」

浩俊清楚自己而家處於不利嘅處境，然而如果將佢哋嘅請求視若無睹，反而會令其他人起疑。



正當浩俊仲考慮緊最恰當嘅解決方法嘅時候，驚驚忽然英雄救美，緩解咗令浩俊難堪嘅氣氛。

西鐵線驚驚：人哋怕醜就唔好逼人啦

見你之前幫過我，就救下你啦。雖然穎怡知道月伶刻意刁難阿桃，但係佢仍然會惜香憐玉，唔忍心見到對方俾人逼到無路可退。

「點解要幫我？」浩俊望住驚驚幫手解圍嘅舉動，心入面迷茫咁問道：「佢唔係鍾意月伶架咩？」

「驚驚。」月伶故意喺叫穎怡嗰陣加重語氣：「我哋女仔傾偈，你哋啲男人就唔好插嘴啦。」



穎怡深知自己嘅一時心軟令到月伶開始唔耐煩，佢即刻識相咁唔再出聲。

「係喎！你哋sem break未？」月伶見冇人再敢講嘢，就開咗另外一個話題：「你哋聖誕有無約啊？」

「毒撚邊會又人約呀？」小明一臉嫌棄咁講道：「月姐你擺明想笑我哋。」

「唔係想笑你哋啊！」月伶用住委屈嘅語氣解釋道：「喺度諗緊我哋公會要唔要嚟聚下咋～」

「好呀好呀！」胖虎心花怒放咁答道：「月姐叫得一定去！」

月伶眼見驚驚同小明都表示會出現，下一秒就開始關心仍然未出聲嘅桃味糖。

「咁阿桃你呢？」月伶溫柔咁問道：「你入咗我哋公會嗰一刻，我就當咗你係自己人㗎喇～」

「就俾我睇吓你有幾靚！」月伶心入面輕蔑咁諗，佢冇再問落去，興趣盎然咁等待桃味糖嘅回覆。



阿桃：下～但係我嗰排好忙喎

浩俊聽到月伶嘅問題後深諳不妙，佢暫時唔想就咁暴露自己嘅性別，唯有作咗個藉口去婉拒對方。

「但點解唔去呢？」浩俊嘅內心突然有把聲問道：「你唔係好想玩佢哋嘅咩？」浩俊嘅眉頭瞬間緊皺起嚟，努力咁將呢種危險嘅諗法壓落去。

「我仲好好奇究竟阿桃真人會有幾靚添！」月伶惋惜咁講道：「咁唯有下次再約你啦！」

浩俊彷彿放下心頭大石咁唞咗啖氣，然而佢腦海入面仍然有種衝動鼓勵緊佢出去。

「話時話，最近呢隻game嘅人妖變得愈嚟愈多。」月伶氣定神閒咁提起新話題：「我真係唔明點解佢哋唔講嘢、又唔見得人，仲會有人上釣。」

「係啊！我早排先聽到朋友話遇到一個人妖。」胖虎和應道：「嗰個床上的手指呀！唔知你哋仲記唔記得佢。」



「唔係呀嘛…佢講嗰個人妖應該係我嚟。」浩俊一聽到熟悉嘅名就開始頭痛。

「係囉～」月伶憂心忡忡咁認同道：「阿桃你要小心啲啊！」

「你真係鍥而不捨。」浩俊冷笑咗一聲，深知月伶意指自己係人妖。

阿桃：其實我可以出嚟嘅

阿桃：你哋唔會係人妖架可

浩俊語氣一轉，突然答應月伶嘅邀約。

「緊係唔會係人妖啦！」月伶見自己成功引蛇出洞，興奮咁講道。

「當你發現原來自己嘅假想敵係男人嗰陣，你會點呢？」浩俊一諗起月伶見到佢真人嘅反應，就開始期待起聚會嘅到臨。



自從阿桃應承咗會出嚟之後，月伶就冇再刁難對方，吱吱喳喳咁同胖虎討論聚會嘅地址同日期。